Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

Manawach A Wesewesen Wor Lamotan!

Manawach A Wesewesen Wor Lamotan!

Eú chék ier mwirin málóón pwúlúwen Faizal we, tokter ra ereni pwe epwe reirei ngasangasan. A erá: “Lupwen ua álleani ewe puken Hiop, ua silei pwe a wor popun án Jiowa apachaalong ena puk lón ewe Paipel. Lupwen sia álleani ekkewe pwóróus lón Paipel mi weneitikich, ina alen ach sipwe kúna oururun metekin letipach.” A pwal apasa: “A chúen lamot ach sipwe manaw.”

Tarsha a chúen chék kúkkún lupwen inan we a má seni. Iei alon: “Ach silei ewe Chón Férikichetá a atoto ngenikich aúchean manawach, ápilúkúlúk, me pwapwa, pwal mwo nge fán chómmóngun ach kewe osukosuk. Jiowa a fókkun tongeni akkapéchékkúlakich me ákkálisikich le likiitú iteiten rán.”

EKKEWE lesen mwen ei ra áiti ngenikich ifa usun sókkopaten osukosuken manaw a tongeni fókkun áweiresikich, iwe usun sise chúen tongeni likiitú. Lupwen ka riáfféú ren pwisin óm osukosuk, neman kopwe ekieki ika mi chúen wor lamoten óm kopwe manaw are ika mi wor ié a áfánni óm kewe weires. Kopwe lúkúlúk pwe Kot a áfánni óm kewe weires. En ka aúchea me ren.

Iei alon ewe soumakken Kölfel 86 usun an lúkúlúk wóón Kot: “Lon ränin ai riaföü üpwe kökköruk, pun en kopwe pälüeniei.” (Kölfel 86:7) Iwe nge, neman kopwe ekieki, ‘Ifa usun Kot epwe pélúweni ai kékké “lon ränin ai riaföü”?’

Inaamwo ika eli Kot esap mwittir pwákini óm kewe osukosuk, nge an we Kapas, ewe Paipel a alúkúlúkuk pwe a tongeni ngonuk ewe kinamween letip epwe elikiituk. “Ousap lolilenäsini och mettoch, nge lon ämi osupwang meinisin oupwe iotek o tüngor ngeni Kot pwe epwe alisikemi. Oupwe tüngor fansoun meinisin fän kilisou. Iwe, än Kot kinamwe mi tekia seni ach tongeni weweiti epwe tümwünü lelukemi me ekiekimi.” (Filipi 4:6, 7) Kese mochen ekieki ifa usun ekkeei wokisin ra alúkúlúkú ngenikich pwe Kot a tongekich.

Kot A Tongeok

“Sap eman ekewe nichok Kot a manlükala . . . oua aüchea seni chomong nichok.”​Lukas 12:6, 7.

EKIEKI MWO: Ese wor aúchean ekkewe kúkkúnún nichok me ren aramas, nge Kot a aúcheaniir. Kot a áfánni iteiten emén me emén ekkewe kúkkún nichok me a aúcheani ménúmanaw meinisin. Nge i a fókkun aúcheani aramas lap seni ekkewe nichok. Aramas, iir férien Kot mi amwarar lap seni férian kewe meinisin wóón fénúfan, pún ra ffér lón “püsin lapalapan” me a wor ar tufich le ámááraatá me pwári napanapan kewe mi fókkun echipwér.​—Keneses 1:26, 27.

“Ai Samol mi Lapalap, en ka atittinaei, ka pwal sileei. . . . ka silei ai ekiek kana . . . Kopwe sotuniei o silei ai ekiek.”​Kölfel 139:1, 2, 23.

EKIEKI MWO: Kot a fókkun silefichuk. A silei alóllóólun meefiom. Neman ekkóch rese weweiti óm kewe osukosuk me aúrek lón manawom, nge Kot a tongeok, me a mochen álisuk. Ena mettóch epwe ámmeef ngonuk pwe a chúen wor lamoten óm kopwe manaw.

 A Wor Aúchean Manawom

“Kopwe aüselinga ai iotek, ai Samol mi Lapalap, ai siö epwe toruk. . . . Kopwe aü selingom ngeniei o müttir pälüeniei, lupwen üa köruk. . . . Epwe aüselinga än ekewe chon riaföü iotek.”​Kölfel 102:1, 2, 17.

EKIEKI MWO: Usun itá seni chék me lepoputáán ewe atun aramas ra nóm fán riáfféú, Jiowa a fen ákkáfánni iteiten chénún mesen chókkewe mi kechiw pokiten ar riáfféú. (Kölfel 56:8) A pwal kapachelong chénún mesom. Kot a chechchemeni meinisin óm kewe sóssót me ssúrún mesom pokiten ka aúchea me ren.

“Kosap pwal apilüküngau, pun ngang om Kot. Üpwe apöchökülok, üpwe pwal alisuk. . . . Pun ngang om Kot ewe Samol mi Lapalap . . . mi ürenuk, ‘Kosap niuokus, ngang üpwe alisuk.’”​Aisea 41:10, 13.

EKIEKI MWO: Kot a chék mmólnetá le álisuk. Ika ka turutiw, i epwe amwéchúketá.

A Wor Ápilúkúlúk Allim fán Iten Mwachkkan

“Iei usun Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.”​Johannes 3:16.

EKIEKI MWO: Ka fókkun aúchea me ren Kot, ina popun a tipemecheres le fangóló manawen Néún we Jesus pwe epwe eú asorun méén kepich fán ásengesum. Ena asor a suuki ngonuk óm kopwe eáni ewe sókkun manaw mi pwapwa me aúchea tori feilfeiló chék. *

Ikaamwo ka riáfféú me usun itá kese chúen tongeni likiitú fan, nge kopwe káéfichi án Kot we Kapas, me apéchékkúla óm lúkú ewe ápilúkúlúk allim Kot a pwonei. Epwe atoto pwapwa me alúkúlúkuk pwe a wor lamoten óm kopwe manaw.

^ par. 19 Ren óm kopwe alapaaló óm silei ifa usun kopwe feiéch seni án Jesus asor, katol ewe video Chechchemeni Málóón Jesus, wóón www.jw.org. Ttiki PUK > VIDEO > ÁM MWICH ME ANGANGEN AFALAFAL.