EKKÓCH RA APASA AAPW. Emén tokter a erá pwe ach néúnéú ewe Paipel lón an emmwenikich, a usun án emén sense néúnéú eú puken science minen lón ewe 1920 le asukula pekin science lón ei fansoun. Emén ese lúkú Paipel epwe pwal mwo nge eisinuk ika kopwe tongeni néúnéú eú puken káitin computer minen lóóm le pwákini néúnéún eú mineféén computer. Weween, ekkóch aramas ra meefi pwe ewe Paipel ina eú puk minen lóóm lóóm me ese chúen fókkun wor lamotan.

Itá pwata emén epwe áeá ena esin emmwen minen lóóm lón ei fansoun mi kon lap tipachemen computer minefé? Lón ei fansoun, a chék wokkor pwóróus wóón Internet usun ekkewe mineféén emmwen me kapasen éúréúr. A kan kakkatowu ekkewe prokram wóón TV usun meefien ekkewe sókkopaten aramas, áwewe chék ren ekkewe soukáé mi silelap usun ekiekin me mwékútúkútún aramas, souemmwen usun manawen aramas, me ekkewe soumak. A mmen sóssókkopat ekkewe puken álillisin pwisin manawen aramas lón ekkewe sitowaan amémé puk, me ena esin business a mmen chéúló me watte winnan.

Inaamwo ika mi chék wokkor ekkena pwóróus minefé, nge pwata aramas repwe pwal chúen seppiti ewe Paipel, ewe puk minen arapakkan 2,000 ier a ló? Esap pwe mi fen pwúng ekiekin chókkewe rese lúkú Paipel iir kewe mi erá pwe ach néúnéú eú puk minen lóóm le emmwenikich usun chék nge sia néúnéú puken science are puken computer minen lóóm? Nge ren enletin, ese kon lien pwúng ar apépééi eú puk ngeni ewe Paipel. Science me tipachemen computer a chék mwittir sissiwil, nge ese sissiwil met mi lamot ngeni manawen aramas, pwe ra chúen mochen silei popun ra manaw me ra mochen kúna pwapwa, núkúnúkéch, ririéch lón famili, me chiechi mi éch.

Inaamwo ika ewe Paipel ina eú puk minen lóóm, nge a fós usun ekkena mettóch aramas ra osupwangan me a fós usun pwal ekkóch mettóch. Paipel a pwisin apasa pwe ena puk a mak fán emmwenien néúch we Chón Fératá. A awora emmwen fán iten unusen kinikinin manawach me a atufichikich ach sipwe pwákini mettóch mi áweires ngenikich. (2 Tim. 3:16, 17) Pwal och, ewe Paipel a apasa pwe a awora kapasen emmwen mi chék fich fansoun meinisin, me an emmwen esap fókkun lamotongawoló! Ewe Paipel a pwisin apasa: “Än Kot kapas a manau.”​—Ipru 4:12.

Mi wesewesen pwúng alon Paipel kana? Itá ewe Paipel ina eú puk ese chúen weneiti ach ei fansoun, are a fen fókkun lamot me álilliséch me lein ekkewe puk meinisin, weween pwe ina eú puk mi manaw? Ei Leenien Mas, iei áeúin me lein ekkewe puk mi kkóló aúchean, a ffér pwe epwe álisuk le kúna pélúwen ekkena kapas eis.