Paipel a apasa pwe an kewe kapasen emmwen ra feito seni Kot me “ra aüchea fän iten afalafala ewe kapas mi let, ra amiritikich, ra apwüngükich.” (2 Timoty 3:16) Mi pwúng ena? Nengeni ifa usun etipachemen ewe Paipel a fen álisi aramas le ttii seniir ekkóch osukosuk mi fókkun watte lón manawer me mwen an epwe unusen nemeniireló.

ÁEÁMWÁÁLLIN SAKAW

Delphine, ewe sia fen pwóróus usun lón ewe lesen mwen ei, a meefi pwe an aúrek a efisi an epwe chék mochen úkkúnnúpuch. Ese wor ngawan me ren Paipel únnún sakaw fán éúkúkéch, nge a erá: “Kosap chiechi ngeni ekewe mi ünümong wain.” (Än Salomon Fos 23:20) Áeámwáállin sakaw, ina eú me lein met ekkewe mi tongeni efisi watteen osukosuken inis, talóón riri lefilen aramas, me málóón fite million aramas iteiten ier. Lape ngeni ekkena osukosuk itá esap fis ika aramas ra chék apwénúetá án ewe Paipel kapasen emmwen mi wor miritin.

Delphine a apwénúetá án Paipel kapasen emmwen. Iwe, a apasa iei: “Ua mirititi pwe ai aúrek esap pwák ren sakaw. Ua apwénúetá ewe kapasen emmwen mi etipachem lón Filipi 4:6, 7, ewe mi erá: ‘Ousap lolilenäsini och mettoch, nge . . . oupwe tüngor fansoun meinisin.’ Iteiten pwiin, ika ua kan meefi án aúrek epwele nemenieiló, ua iótek ngeni Jiowa. Ua uwawu ngeni meefiei meinisin kapachelong ai memmeefin song, metekin letipei, me letipengawei. Ua tingormaú ngeni an epwe álisiei le eáni ekiek mi múrinné. Sorotá, ua túmúnú le wesewesen péútaaló ekkena memmeef. Ai ikkiótek a álisiei le ánnefota ai ekiek wóón met mi nóm rei nge esap fen wóón met ese nóm rei. Ua filatá ai usap chúen ún sakaw. Pokiten ua fókkun aúcheani kinamween letipei iei, iwe use chúen mochen féri met epwe tongeni efisi an epwe péút seniei ren ena kinamwe.”

 MANAW MI LIMENGAW

Manaw mi limengaw, ina eú me lein ekkewe mettóch mi fókkun ámeteki me áweiresi letipen aramas. Nge ekkewe kapasen emmwen lón Paipel ra tongeni álisikich ren kataween sókkun féffér mi efisi osukosuk, áwewe chék ren núesik, me sasingin me kachitoon kapasingaw. Emén alúwél itan Samuel a erá: “A mmen mecheres ngeniei ai núesik. Fán ekkóch use kon sani emén nge ua tongeni esilla pwe eménna a saniei. Iwe usun a mmen apwapwa ngeniei ai upwe núesik.” Ekkóch ra fen tipi ngeni Samuel pwe a kan núwengaw, inaamwo ika mi wor atun ese ekieki pwe a ina usun. Iwe pokiten ena, a filatá an epwele chék núnúesik. Nge mwirin a lólilen ren met a féfféri. Iwe a erá: “A efeiengaw pokiten ua poputá le eérenaaló ai upwele ekieki chék pwisin ngang.”

Samuel a álleani eú pwóróus fán iten ekkewe teenage wóón ewe jw.org website. Iwe a ekieki alon Än Salomon Fos 20:11, ewe mi erá: “Pwal lapalapen manauen eman semirit [are, “át,” NW footnote] a pwä ren an föför, ika a limöch o pwüng lon mine a föri.” Ifa usun ena mettóch a álisi Samuel? A mirititi pwe minne a féri ese liméch me ese pwal pwúng. Iwe, a erá iei: “Ua pwal mirititi pwe emén sáráfé mi núesik a ámááraatá ekkewe napanap ese fichiiti iir mi pwúpwúlú. Ua poputá le ekieki pwe ika ua pwúpwúlú, iwe epwe ifa meefien pwúlúwei we ika a kúna ai núesik ngeni pwal emén fefin. Ena mettóch a álisiei le mirititi pwe mi efeiengaw ena féffér. Inaamwo ika mi mecheres ewe mettóch núesik, nge saminne mi pwúng ena féffér.” Samuel a siwil. An túmúnú seni ena féfférún núesik a pwal álisi le ttii seni manaw mi limengaw.

Antonio a fen nóm fán feiengaw watte ren an eáni manaw mi limengaw. I emén mi umwesimwesin katol sasingin me kachitoon kapasingaw. Inaamwo ika a fen pwúlúweni emén a fókkun tongei, nge a chúen tuttur lón an kakkatol sasingin me kachitoon kapasingaw. A apasa pwe an ekieki usun 1 Petrus 5:8 a enletin álisi. Ewe mi erá: “Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.” Antonio a apasa: “Ekkewe sasing mi limengaw ra chék chéúfetál, me ra tongeni chék mwéch lón ekiekich. Ena wokisin a wesewesen álisiei le ekieki usun ia a feito me ie ekkena sóssót. A lamot ai upwe eérenaaló le mwittir ekieki pwe ekkena sasing mi limengaw ra feito seni Satan. Iei ua silei pwe Jiowa chék a tongeni álisiei le ‘amolaei o mamasa,’ pwe upwe tongeni fiu ngeni ekkewe mettóch mi maunei ekieki, letipei, me ai ririin pwúpwúlú.” Antonio a kúna ewe álillis mi lamot ngeni, me a unusen péútaaló an féffér mi ngaw. Iwe, ena mettóch a álisi le ttii seni ekkewe pwal ekkóch watteen osukosuk.

A ffat pwe ewe Paipel a awora ekkewe kapasen emmwen mi tongeni álisi aramas le ttii seniir watteen osukosuk. Nge ifa usun ren ekkewe osukosuk a fen tté wareer me ra fen nóm ren langattam fansoun? Sipwe ppii ifa usun án Kot we Kapas a tongeni álisikich le pwákini ekkena esin osukosuk mi weires.

Án Paipel emmwen mi álilliséch ra tongeni álisikich le ttii senikich ekkóch osukosuk