Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

Jiowa A Aúcheani Óm Apasa “Amen”

Jiowa A Aúcheani Óm Apasa “Amen”

JIOWA a aúcheani ach fel ngeni. A ‘afäli o aüselinga’ néún kewe chón angang, me a aúcheani meinisin ar féfférún fel ngeni pwal mwo nge ekkewe mi chék kisikis. (Mal. 3:16) Áwewe chék, ekieki ewe kapas eli sia kan akkapasa fán chómmóng. Ina ewe kapas “amen.” Itá Jiowa, a aúcheani pwal mwo nge ena chék eú kapas? Ewer, a aúcheani! Ren ach sipwe silei pwata, sipwe etittina weween ena kapas me ifa usun néúnéún lón ewe Paipel.

“EKEWE ARAMAS MEINISIN REPWE APASA, ‘AMEN’”

Ewe kapas “amen” lón fósun Merika a wewe ngeni “epwe ina usun” are “fókkun ina.” A pop seni ewe popun kapas lón fósun Ipru mi wewe ngeni “kopwe tuppwél,” “kopwe alúkúlúk.” Fán ekkóch ra néúnéú ena kapas lón pekin kapwúng. Mwirin án emén eáni kapasen akkapél, epwe apasa “amen” pwe epwe affata pwe a enlet minne a apasa, me a tipeeú ngeni mwirilóón met a eáni akkapél wóón. (Num. 5:22) Lupwen eménna a akkapél mwen mesen aramas lón pekin kapwúng, iwe epwe amwékútú le mochen apwénúetá met a eáni pwon.​—Ne. 5:13.

A mak lón Tuteronomi sópwun 27 eú pwóróus mi amwarar ren néúnéún ena kapas “amen.” Mwirin án ekkewe chón Israel tolong lón ewe Fénúen Pwon, ra mwichfengen lón ewe leeni lefilen ewe chuuk Epal me ewe chuuk Kerisim pwe repwe rongorong álleaan ewe Allúk. Resap chék aúseling nge repwe pwal pwári lón ar kapas pwe ra etiwa ena Allúk. Ra féri ena ren ar apasa “Amen!” mwirin ar rong álleawuun anúmamaúen álleasolap. (Tut. 27:15-26) Anchangei méngúngúún fitengeréú mwán, fefin, me semirit lupwen ra kapas fán léúwommóng! (Jos. 8:30-35) Ese mwáál rese ménúki ekkewe kapas ra eáni lón ena rán. Me ekkena chón Israel ra apwénúetá minne ra apasa, pwe ewe Paipel a erá: “Chon Israel ra angang ngeni ewe Samol mi Lapalap lon ränin manauen Josua meinisin, pwal lon ränin manauen ekewe souakom mi manauatam seni Josua, ir mi silei ekewe föför meinisin ewe Samol mi Lapalap a föri fän iten Israel.”​—Jos. 24:31.

Jesus a pwal néúnéú ena kapas “amen” ren an epwe affata lúkúcharen minne a apasa. Nge a féri ena lón ewe esin napanap mi kkóló aúchean. A néúnéú “amen” (mi afféú lón fósun Merika ngeni  “enlet”) me mwen an epwe erá och mettóch pwe epwe affata pwe minne a erá a enlet, nge ese néúnéú mwirin an pélúweni eú pwóróus. Fán ekkóch, a enniwili ena kapas, ren an apasa “amen amen.” (Mat. 5:18; Joh. 1:51) Ina minne a alúkúlúkú ekkewe chón aúseling ngeni pwe an kewe kapas ra fókkun enlet. Jesus a tongeni fós fán lúkúlúk pokiten Kot a fen ewisa ngeni an epwe apwénúetá meinisin an kewe pwon.​—2 Kor. 1:20; Pwär. 3:14.

‘EKKEWE ARAMAS RA APASA, “AMEN,” O MWAREITI JIOWA’

Ekkewe chón Israel ra pwal néúnéú “amen” lón ar mwareiti me iótek ngeni Jiowa. (Ne. 8:6; Kölf. 41:13) Ren án chókkewe mi aúseling ewe iótek apasa ena kapas mwirin ewe iótek, ra pwáraatá pwe ra tipeeú ngeni masouen ena iótek. Ina minne, meinisin ra tongeni fiti ewe iótek me pwapwaiti ar fel ngeni Jiowa lón ena napanap. Ina met a fis lupwen King Tafit a wato án Jiowa we pworofel Jerusalem. Atun ewe apwapwa, Tafit a eáni eú iótek mi achchúngú letiper lón eché kél mi mak lón 1 Kronika 16:8-36. A fókkun chúng letipen ekkewe chón fiti ren án Tafit kewe kapas, ina popun “ekewe aramas ra apasa, “Amen”, o mwareiti ewe Samol mi Lapalap.” Ewer, minne ra apasa fán tipeeú a alapaaló apwapwaan ena rán.

Ekkewe popun Chón Kraist ra pwal néúnéú ewe kapas “amen” lupwen ra mwareiti Jiowa. Fán chómmóng ekkewe chón makkeei Paipel ra apachaalong ena kapas lón néúr kewe taropwe. (Rom 1:25; 16:27; 1 Pet. 4:11) A pwal mwo nge mak lón ewe puken Pwärätä usun án ekkewe mi nóm láng elingaaló Jiowa ren ar apasa: “Amen! Ousipwe mwareiti Kot.” (Pwär. 19:1, 4) Ekkewe popun Chón Kraist ra kan apasa “amen” mwirin ar iótek lón ar kewe mwich. (1 Kor. 14:16) Iwe nge, rese kan chék apasa ena kapas pokiten chék ina eérenier.

POPUN A AÚCHEA ÓM APASA “AMEN”

Mwirin ach enniwili uruwoon me pwóróusen ena kapas “amen,” sia tongeni weweiti pwata a mmen aúchea ach sipwe apasa “amen” mwirin eú iótek. Lupwen sia apasa “amen” lón pwisin ach kewe iótek,  sia pwári pwe ina enletin meefiach. Me lupwen a chúng letipach le apasa “amen,” pwal mwo nge lón letipach atun emén a iótek mwen aramas, iwe sia pwári pwe sia tipeeú ngeni met a eáni iótek. Sipwe ppii pwal ekkóch popun lamoten “amen.”

Sia aúselingéch atun án emén iótek pokiten ina kinikinin ach fel. Sia fel ngeni Jiowa esap chék ren ach tipeeú ngeni masouen ewe iótek nge pwal ren napanapach atun ewe iótek. Ach mochen pwe ach “amen” epwe feito seni enletin letipach, epwe tongeni álisikich le eáni ekiek mi pwúng usun iótek me ach afóta ekiekich wóón ewe iótek.

Sia tipeeúfengen lón ach fel ngeni Kot. Atun emén a iótek, meinisin chón ewe mwichefel ra aúseling fán tipeeú ngeni minne a eáni iótek. (Föf. 1:14; 12:5) Lupwen a chúng letipach le fiti pwiich kewe lón ar apasa “amen,” iwe a pwal alapaaló ach tipeeúfengen. Ese lifilifil ika sia léúwommóng le apasa “amen” are sia chék apasa lón letipach atun ena iótek, nge a tongeni amwékútú Jiowa le pélúweni.

Ach apasa “amen” a álisatá ach mwareiti Jiowa

Sia mwareiti Jiowa. Jiowa a áfánni ach kewe kisikisin féfférún fel ngeni. (Luk. 21:2, 3) A silei masouen letipach me met a amwékútúkich le féri mettóch. Sia tongeni lúkúlúk pwe Jiowa a pwal mwo nge áfánni ach apasa “amen” fán tipetekison atun sia chék tongeni aúseling ewe mwich wóón phone. Atun sia apasa “amen,” sia fiti chón ewe mwichefel lón ar mwareiti Jiowa.

Me rech usun itá a chék lamot kisikis ach apasa “amen,” nge a fókkun aúchea. Me ren eú puken káé Paipel pwe ren án néún Kot kewe aramas néúnéú ena eú kapas, ra tongeni pwáraatá ar “lúkúlúk, enletin tipeeú, me unusen ápilúkúlúk lón letiper.” Amwo iteiten ach apasa “amen” epwe apwapwaai Jiowa.​—Kölf. 19:14.