“Oupwe etiwafengenikemi lefilemi, nge ousap lal ren.”​—1 PET. 4:9.

KÉL: 50, 20

1. Ikkefa ekkewe weires ekkewe popun Chón Kraist ra nóm faar?

APOSEL Petrus a mak ngeni ekkewe “choisä mi toropasfeil lon ekewe fanü Pontus, Kalatia, Kapatosia, Asia me Petinia” eli lefilen ekkewe ier 62 me 64. (1 Pet. 1:1) Chiechiach kana ra feito seni sókkopaten leeni. Ra kúna “pwichikaren ewe riaföü,” are riáfféúmwáál me a lamot ngeniir emmwen me apéchékkúl. Ra pwal manaw lón ewe fansoun mi fókkun efeiengaw. Petrus a makkeei: “A arapoto sopolan mettoch meinisin.” Ekiseló chék, kis seni engol ier, Jerusalem epwe kataló. Met epwe álisi ekkewe Chón Kraist ekis meinisin ar repwe likiitú lón ekkena fansoun weires?​—1 Pet. 4:4, 7, 12.

2, 3. Pwata Petrus a pesei pwiin kewe Chón Kraist ar repwe awasélaéch? (Ppii ewe sasing lepoputáán ei lesen.)

2 Eú mettóch Petrus a pese ngeni pwiin kewe Chón Kraist ar repwe féri, ina ar repwe ‘etiwafengeniir lefiler.’ (1 Pet. 4:9) Ewe kapasen Krik fán iten “awasélaéchú aramas,” a wesewesen wewe ngeni “tongei are kirekiréch ngeni aramas sise sissileer.” Nge Petrus a peseer ar repwe awasélafengeniir ‘lefiler’  are etiwafengeniir inaamwo ika ra fen sissilefengeniir me chiechifengen. Ifa usun ar awasélaéch epwe álisiir?

3 Ar féri ena mettóch epwe eririfengeniir. Nge ifa usun ren en? Ka chemeni ewe fansoun mi apwapwa lupwen emén a etiwok ngeni imwan we? Me lupwen ka etiwa emén lón imwom, a efisi ámi oupwe ririéchfengen. Ach awasélai pwiich kewe a suuki alen ach sipwe sissileer. A lamot ngeni ekkewe Chón Kraist lón fansoun Petrus we ar repwe pacheéchfengen lón ewe fansoun mi chék lallapóló osukosuk. Lón ekkeei “ränin lesopolan” mi pwal lamot ach sipwe ina usun.​—2 Tim. 3:1.

4. Ikkefa ekkewe kapas eis sipwe pwóróus wóór lón ei lesen?

4 Ifa usun sia tongeni ‘etiwafengenikich lefilach?’ Met a tongeni eppeti ach sipwe awasélaéch me ifa usun sipwe ataweei? Met a tongeni álisikich ach sipwe ewe sókkun waséla mi múrinné?

ALEN ACH SIPWE AWASÉLAÉCHÚ ARAMAS

5. Ifa usun sipwe tongeni awasélaéch atun án Chón Kraist kewe mwich?

5 Atun ekkewe mwich: Jiowa me an we mwicheich ra etiwakich le fiti ekkewe mwich. Sia mochen pwe meinisin chón fiti ach mwich repwe meefi kinamwe, nge ákkáeúin ekkewe minefééto. (Rom 15:7) Mi lamot sipwe álisiir le meefi kinamwe lón ach kewe mwich ese lifilifil fouter are napanaper. (Jas. 2:1-4) Ika ka kúna emén waséla, pwata kese etiwa an epwe mómmóót reom? Neman epwe pwapwa ika ka álisi le weweiti met epwe fis atun ewe mwich, are kútta ekkewe wokisin ra álleawu. Ena mettóch epwe múrinné lón ach “etiwaöchü ekewe wasöla.”​—Rom 12:13.

6. Itá ié kewe sipwe fókkun awasélaéchúúr?

6 Fán iten ach ekis chúúnikich are mwéngéfengen: Fán chómmóng aramas me lóóm ra kan awasélaéchú aramas ren ar etiwer ar repwe mwéngéfengen lón imwer, me ena mettóch a pwári pwe ra mochen chiechi ngeniir me kinamwefengen. (Ken. 18:1-8; Souk. 13:15; Luk. 24:28-30) Itá ié kewe sipwe fókkun awasélaéchúúr? Pwiich kewe lón ach we mwichefel. Mi lamot sipwe lúkúlúkfengen lefilach me pwiich kewe me tuppwélfengen lón ei fansoun mi chék ngangngawoló. Lón ewe 2011 ewe Mwichen Soupwúngúpwúng a siwili kulókun án ewe familien Bethel lón Merika Káéén Ewe Leenien Mas, seni 6:45 lefááf ngeni 6:15. Pwata? Ewe esilesil a erá pwe neman ena siwil epwe ámecheresaaló án ekkewe chón Bethel etiwa ekkóch etiwetiw are ar etiwafengeniir ika epwe sárekkái ena káé. Ekkóch keangen ofesilap ra pwal féri ena. A suuki ngeni chón ewe familien Bethel ar repwe sissilefengeniir.

Sia tongeni etiwa ekkewe minefé ren ach ekis chúúnikich are mwéngéfengen are ló kukkunou ekis?

7, 8. Ifa usun sia tongeni awasélaéchú chókkewe mi etto eáni afalafal?

7 Fán ekkóch pwiich kewe seni pwal eú mwichefel, ekkewe chónemmwen mi wisen sáifetál, are chón tupun Bethel ra eáni afalafal lón ach we mwichefel. Sia tongeni awasélaéchú pwiich kana lón ekkena atun? (Álleani 3 Johannes 5-8.) Eú alen ach sipwe tongeni féri ena, ina ren ach etiwer lón imwach kewe ren ach ekis chúúnikich are mwéngéfengen.

8 Iei met emén Chón Kraist fefin seni Merika a erá: “Ren fite ier, ám me pwúlúwei we aua kúna feiéchún ám awasélaéchú chómmóng chókkewe mi eáni afalafal fengen me pwúlúwer kewe lón imwem we.” A meefi pwe iteiten ar féri ena, a apéchékkúlaló ar  lúkú me a pwal apwapwa. A erá: “Esap fán eú ám niamam ren ám féri ena.”

9, 10. (a) Ié kewe a lamot ngeniir ach sipwe eleenier ren ekis fansoun? (b) Chókkewe mi chék kúkkún imwer ra pwal tongeni álillis? Áweweei.

9 Ekkewe waséla mi nómottam: Lón fansoun lóóm, eérenien aramas ar repwe eleenia ekkóch waséla. (Hiop 31:32; Filim. 22) Ikenái, epwe wor atun neman mi lamot sipwe pwal ina usun. Fán chómmóng a lamot ach sipwe eleenia ekkewe chónemmwen mi wisen sáifetál lupwen ra chuuri ekkewe mwichefel. A pwal ina usun ren ekkewe chón sukul mi fiti ekkewe sókkopaten sukulen Paipel fán iten ach we mwicheich, me ekkewe chón álillis lón ewe angangen kaú. Nge ifa usun ren chókkewe mi ta seniir imwer kewe ren feiengaw watte, choweán taifun, chechchechin fénú me metakkan? Eli epwe lamot ngeniir leeni repwe nóm ie tori an a fférsefál imwer kewe. Sisap ekieki pwe chókkewe chék mi wor imwer mi watte repwe tongeni álillis. Neman ra fen álillis fán fite me lóóm. Nge en, ka tongeni eleenia emén inaamwo ika mi chék kúkkún imwom we?

10 Emén Chón Kraist mwán lón South Korea a chechchemeni ewe atun a eleenia lón imwan we ekkewe chón fiti sukul fán iten ach we mwicheich. A makkeei: “Lepoputáán ua pireir pokiten ua kerán pwúpwúlú me a chék kúkkún imwem we. Nge aua enletin pwapwa ren ám eleenia ekkena esin chón sukul. Pokiten aua kerán pwúpwúlú, aua tongeni kúna úkúkún pwapwaan án ekkewe pwúpwúlú angangfengen me achochofengen lón ar angang ngeni Jiowa.”

11. Eli pwata epwe lamot óm kopwe awasélaéchú chókkewe mi minefééto ngeni óm we mwichefel?

11 Chienach kewe minefééto ngeni ewe mwichefel: Ekkóch pwiich kewe are unusen eú famili, eli ra mwékút ngeni leeniom we. Eli ra etto pokiten óm we mwichefel a osupwangen álillis. Are iir ekkewe pioneer mi kefil pwe repwe etto pioneer lón óm we mwichefel. Ina eú watteen siwil fán iter. Epwe lamot ar repwe eérenaaló ewe mineféén leeni, mineféén mwichefel, me eli pwal mwo nge ewe mineféén fós are eéreni. Iwe sia tongeni etiwer ren ach ekis chúúnikich are mwéngéfengen are ló kukkunou ekis? Ena mettóch epwe álisiir an epwe wor minefé chiechier me eérenaaló watteen siwilin nónnómur.

12. Ifa ewe pwóróus mi pwári pwe ese pwal lamot óm kopwe ammólnatá chómmóng mettóch ren óm kopwe awasélaéch?

12 Ese pwal lamot óm kopwe ammólnatá chómmóng mettóch ren óm kopwe awasélaéch. (Álleani Lukas 10:41, 42.) Emén Chón Kraist mwán a chechchemeni met a fis lupwen iir me pwúlúwan we ra kerán wiliti misineri. A erá: “Aua chúen alúwél me fépwúl, aua minefé me ause mwo kon lipwákéch, me aua kan meefi pwos. Lón eú pwinin, pwúlúwei we a fókkun pwos me ua resin álisi nge ese pwák rei. Mwirin, ina epwe kulók 7:30, emén a fichifich wóón asamem we. Emén chón káé a etto me a uwei úlúféú ochám kurukur. A etto chuurikem pwe epwe  etiwakemito ngeni ewe leeni pokiten ám minefé misineri. Aua etiwaalong lón imwen we me éúnú konik. Mwirin aua ffér únúmem tea me chocolate. Ausaamwo sile fósun ena fénú Swahili me ese pwal sile fósun Merika.” Pwiich na a erá pwe minne a fis, a álisiir le poputá le chiechi ngeni chón ekkewe mwichefel me a álisiir ar repwe pwapwa.

KOSAP MUT NGENI OCH METTÓCH EPWE EPPETUK LE AWASÉLAÉCH

13. Ifa usun óm awasélaéch epwe álisuk?

13 Ka fen pireir le awasélaéchú aramas? Ika ewer, iwe epwe solap ewe feiéch mi suuk ngonuk ren óm kopwe pwapwaiti óm chiechi ngeni ekkewe waséla repwe itá chiechiom tori feilfeiló chék. Óm awasélaéch, ina eú mettóch mi fókkun múrinné pwe epwe eppeti tipitipingaw. Ina minne, itá pwata emén epwe pireir le awasélaéch? A wor ekkóch popun.

14. Met ka tongeni féri ika ese naf are ese wor óm fansoun me péchékkúl le awasélaéch are etiwa án ekkewe ekkóch etiwok?

14 Fansoun me péchékkúl: A fókkun chómmóng án néún Jiowa kewe aramas angang me wiser. Eli ekkóch repwe tongeni meefi pwe ese naf are ese wor ar fansoun me péchékkúl le awasélaéchú aramas. Ika a ina usun meefiom, iwe neman a lamot óm kopwe siwili óm schedule pwe kopwe tongeni awasélai aramas are etiwa án ekkewe ekkóch etiwok. A lamot ena pokiten Paipel a pesekich ach sipwe awasélaéch. (Ipru 13:2) Ina minne, ach awasélaéchú aramas, ina eú féffér mi pwúng. Nge ren óm kopwe awasélaéch, eli mi lamot kopwe ekisikisaaló óm fansoun le féri ekkewe mettóch rese kon lien lamot.

15. Ikkefa ekkóch popun eli ekkóch ra meefi pwe rese tongeni awasélaéch?

15 Meefiom usun pwisin en: Ka fen mochen awasélaéchú aramas nge ka meefi pwe kese tongeni? Neman pokiten ka nisássáw are lólilen pwe kese silei met oupwe aasoosfengen wóón, are noum kewe waséla resap pwapwa. Are neman ese kon watte noum moni me ka lólilen pwe kese tongeni awora ngeni noum kewe waséla met ekkewe ekkóch ra awora ngeniir. Nge chechchemeni pwe ese pwal lamot epwe tokorárá ewe imw. Noum kewe waséla repwe pwapwa ika a limeliméch imwom we, torotoréch me ka chiechiéch ngeniir.

16, 17. Met ka tongeni féri lupwen ka lólilen ren óm awasélai aramas?

16 Ika ka lólilen ren óm awasélai aramas, iwe esap chék en pwe a pwal ina usun ekkewe ekkóch. Emén mwán mi ásimaw lón Britain a erá: “Sia kan ekis niwokkus atun sia ammólnatá fán iten ekkewe waséla. Nge lón meinisin ach angang ngeni Jiowa, epwe fen lap ewe feiéch me pwapwa sia angei, lap seni ewe niwokkus sia meefi. Ua mmen pwapwaiti ám chék akkaasoos me ún kofi me nei kewe waséla.” A éch ach sipwe kan ákkáfánni néúch kewe waséla. (Fil. 2:4) Lape ngeni aramas ra pwapwa le apwóróusa pwóróusen manawer. Nge lupwen sia kunoufengen, neman ina chék ewe atun sia tongeni rongorong pwóróuseer. Emén mwán mi ásimaw a pwal erá: “Ai etiwa chiechiei kewe lón imwei we seni ewe mwichefel, a álisiei le wewefichiitiir me silefichiir, ákkáeúin ren pwóróuseer ren ifa usun ra silei ewe enlet.” Ika ka áfánni noum kewe waséla, iwe kopwe kúna pwe meinisin repwe pwapwaiti ámi kunoufengen.

17 Iei alon emén fefin mi pioneer mi kan  eleenia chón sukul mi fiti ekkewe sókkopaten sukulen Paipel fán iten ach mwicheich: “Lepoputáán, ua lólilen pokiten ese kon pwal chómmóng piseki lón imwei we, nge mesin chék pisekin aramas. Nge pwúlúwen emén me lein ekkewe sense lón ena sukul a ekinamwe ei. A erá pwe lupwen iir me pwúlúwan we ra fiti ewe angangen sáifetál, ekkewe fansoun mi éch seni meinisin, ina ar nónnóm ren emén mi ásimaw lón pekin lúkú nge ese kon lien pisekisek, nge a ámecheresaaló nónnómun manawan me nefotofot wóón an angang ngeni Kot usun chék iir. Ena mettóch a áchema ngeniei met mama a kan ereni néún kewe: ‘A mürina ach mongöfengen iasai, nge mi wor tong lefilach.’” (SalF. 15:17) Ese wor popun ach sipwe lólilen, pokiten ach tongei néúch waséla, ina met mi wesewesen aúchea.

18, 19. Ifa usun ach awasélaéch epwe álisikich le péútaaló ekkewe memmeef mi ngaw sia eáni usun ekkewe ekkóch?

18 Meefiom usun ekkewe ekkóch: Mi wor emén lón óm we mwichefel ka kan mángaw ren? Ika kese achocho le péútaaló ekkena memmeef mi ngaw, iwe repwe chék nóm reom. Ika mi wor emén kese kan sani napanapan, iwe neman kese mochen etiwa eménna lón imwom we. Are eli mi wor emén a ekinása letipom me lóóm nge a weires ngonuk óm kopwe likitaló.

19 Ewe Paipel a erá pwe ika ka awasélaéch ka tongeni ámúrinnééló óm riri ngeni ekkewe ekkóch, pwal mwo nge chón oputom kewe. (Álleani Än Salomon Fos 25:21, 22.) Ika ka etiwa emén lón imwom we, eli kopwe tongeni péútaaló ekkewe memmeef mi ngaw  me kinamwe ngeni eménna. Ka tongeni poputá le kúna napanapan kewe mi múrinné, ekkewe Jiowa a pwal kúna lupwen a lukeato ngeni ewe enlet. (Joh. 6:44) Lupwen tong a amwékútuk le etiwa emén ese ekieki pwe kopwe etiwa, iwe a tongeni poputááni eú chiechiéchfengen lefilemi. Nge ifa usun kopwe túmúnú pwe tong ina met epwe amwékútuk? Ka tongeni apwénúetá ewe pesepes lón Filipi 2:3: “Ousap ekieki pwe oua mürina seni ekewe ekoch.” Mi lamot sipwe ekieki ekkewe mettóch pwiich kewe ra múrinné senikich wóór. Neman sia tongeni káé seni ar lúkú, likiitú, are ekkóch napanaper kewe napanapen Chón Kraist. Ach ekieki usun napanaper kewe mi múrinné epwe alóllóólaaló ach tongeer, me ámecheresaaló ach sipwe awasélaéch.

KOPWE EMÉN WASÉLA MI MÚRINNÉ

Ekkewe chón awaséla ra ka ammólnatáéchú fán iten néúr kewe waséla (Ppii parakraf 20)

20. Pwata me ifa usun sipwe pwáraatá pwe kich mi alúkúlúk lupwen sia etiwa eú etiwetiw?

20 Tafit, ewe soumakken kélfel a eis: “Ai Samol mi Lapalap, iö epwe tongeni tolong lon imwom mi pin?” (Kölf. 15:1) Mwirin ena, Tafit a pwóróus usun ekkewe napanap Jiowa a mochen néún kewe waséla repwe eáni. Eú me leir, alúkúlúk. A erá: “A apwönüetä an pwon a eäni fän akapel, inamwo are a weires ren.” (Kölf. 15:4) Ika sia etiwa eú etiwetiw, mi lamot sisap atai chilóón chék ika mi fókkun wor popun ach sipwe atai. Neman ewe chón etiwakich a fen ammólnatá fán iten ach etto ren, iwe sipwe asolapa an angang weires ika sia atai. (Mat. 5:37) Ekkóch aramas ra atai eú etiwetiw ren ar repwe tongeni etiwa pwal eú etiwetiw me rer pwe a éch seni ewe akkomw. Nge mi ésúfél ena are pwári tong? Itá sipwe aúcheani met chék ewe chón awasélakich a awora fán itach. (Luk. 10:7) Ika mi lamot sipwe atai, iwe sipwe pwári ach tongeer me áfánniir ika sia mwittir esile ngeniir.

21. Ifa usun ach súféliti eérenien ewe fénú a álisikich ach sipwe emén waséla mi múrinné?

21 A pwal lamot ach sipwe súféliti eérenien ekkewe fénú. Lón ekkóch fénú, ese wor ngawen án aramas etto chuuri emén inaamwo ika rese etiwer. Nge lón ekkóch fénú, a éch ar repwe akkomw esilesil ngeni chón ewe imw pwe repwe wareitiir. Lón ekkóch leeni, ewe chón awaséla epwe amwéngééni néún kewe waséla ekkewe sókkun mwéngé mi múrinné seni meinisin, nge chón an we famili repwe chék tapw mwiriir. Nge lón ekkóch fénú, meinisin ra chék taitap. Lón ekkóch eéreni, ekkewe waséla ra kan uwei och mwéngé. Nge lón ekkóch leeni, ewe chón awaséla a fen sani án ekkewe waséla resap uwou mettóch. Lón ekkóch eéreni, fán súfél ekkewe waséla rese etiwa ewe áeúin me ewe oruuen etiwetiw. Nge lón ekkóch leeni, a ésúfélúngaw ika sise etiwa ewe áeúin etiwetiw. Mi lamot sipwe féri úkúkún ach tufich pwe ewe chón awasélakich epwe pwapwa le etiwakich.

22. Pwata a lamot ach sipwe ‘etiwafengenikich lefilach’?

22 Petrus a erá: “A arapoto sopolan mettoch meinisin.” (1 Pet. 4:7) Lón ei fansoun, epwele fis ewe riáfféú mi fókkun lapalap, ewe sisaamwo kúna fán eú. Mi lamot ach sipwe eáni ewe sókkun tong mi alóllóól ngeni pwiich kewe, nge ákkáeúin pokiten ach ei fénúfan a chék ngangngawoló. Án Petrus ei kapasen fén a fókkun weneitikich: “Oupwe etiwafengenikemi lefilemi.” (1 Pet. 4:9) Ewer, awasélaéch ina eú mettóch mi apwapwa me mi lamot iei me tori feilfeiló chék.