Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 LESEN 24

Amóeló Meinisin Ekiek mi Ú Ngeni Áitien Kot!

Amóeló Meinisin Ekiek mi Ú Ngeni Áitien Kot!

“Aia awesi ekewe kapas mi mwäl o ataetiu . . . meinisin mi epeti än aramas repwe silei Kot.”​—2 KOR. 10:5.

KÉL 124 Akkamwéchú Tuppwél

MINNE SIPWELE KÁÉ *

1. Ifa án aposel Paulus we éúréúr ngeni ekkewe Chón Kraist mi kepit?

IEI án aposel Paulus éúréúr: “Ousap apirü pomwen fanüfan.” (Rom 12:2) Paulus a mak ngeni ekkewe popun Chón Kraist. Pwata a eáni ena esin éúréúr mi chou ngeni ekkena mwán me fefin mi fen fangóló manawer ngeni Kot me kepit ren an we manaman mi fel?​—Rom 1:7.

2-3. Ifa usun Satan a achocho le okullukich seni Jiowa, nge ifa usun sipwe úttawu ekkewe ekiek mi ngaw mi fen warar lón ekiekich?

2 Paulus a lólilen pokiten ekkóch Chón Kraist ra tipetipeló ren ekiek mi efeiengaw seni án Satan ei fénúfan. (Ef. 4:17-19) A tongeni fis ena ngeni ese lifilifil ié. Satan a fókkun mochen okullukicheló seni Jiowa, nge pokiten i koten ei fénúfan, a tongeni áeá sókkopaten mettóch ren an epwe otupukich. Áwewe chék, ika sia mochen itetekia are iteféúló, iwe a tongeni áeá ena le okullukich seni Jiowa. A pwal mwo nge tongeni áeá minne sia fen káé me lón imwach, lón sukul me seni chókkewe sia nóm rer, me efisi ach sipwe poputá le áppirú an ekiek.

3 Mi tufich ach sipwe úttawu ekkewe mettóch mi fen warar lón ekiekich? (2 Kor. 10:4) Nengeni met Paulus a apasa: “Äm aia awesi ekewe kapas mi mwäl o ataetiu . . . meinisin mi epeti än aramas repwe silei Kot. Aia liapeni sokun ekiekin aramas meinisin, pwe repwe aleasochis ngeni Kraist.” (2 Kor. 10:5) Ewer, ren án Jiowa álillis, sia tongeni amóeló ekkena sókkun ekiek mi ngaw usun chék án eú sáfei tongeni amóeló  efeiengawen och poison. Iwe, án Kot we Kapas a tongeni álisikich le amóeló efeiengawen poisonún ekiekich seni án Satan ei fénúfan.

“ASÖFÖLA UNUSEN LETIPEMI”

4. Ikkefa ekkewe siwil chómmóng me leich sia fen féri lupwen sia kerán etiwa ewe enlet?

4 Kopwe nesékúrú ekkewe siwil mi lamot ka féri lupwen ka kerán etiwa ewe enlet seni án Kot we Kapas me filatá le angang ngeni Jiowa. Chómmóng me leich sia úkú seni ach kewe féffér mi ngaw. (1 Kor. 6:9-11) Sia fókkun kilisou ren án Jiowa álisikich le féri ena!

5. Ikkefa ekkewe ruu mettóch Rom 12:2 a erenikich ach sipwe féri?

5 Iwe nge, sisap fókkun meefi pwe ese chúen lamot ach sipwe sópweló le féri ekkesiwil lón manawach. Inaamwo ika sise chúen féri ekkewe tipis mi chou sia piin féfféri me mwen ach papatais, nge a chúen lamot ach sipwe achocho le túmúnúkich seni met mi tongeni otupukich le liwiniti féfférúch kewe me lóóm. Ifa usun sipwe féri ena? Iei met Paulus a erá: “Ousap apirü pomwen fanüfan, nge oupwe mwüt ngeni Kot pwe epwe awilikemi o asöföla unusen letipemi.” (Rom 12:2) A lamot sipwe féri ekkeei ruu mettóch. Áeúin, mi lamot ‘sisap apirü pomwen fanüfan,’ are mut ngeni an epwe etipetipakich. Oruuan, mi lamot sipwe ‘awilikich’ ren ach siwili ach ekiek me féffér.

6. Met sia káé seni alon Jesus kewe lón Mateus 12:43-45?

6 Ewe siwil Paulus a fós usun ese chék wewe ngeni siwililóón napanapach me lúkún, nge ina ewe sókkun siwil mi weneiti iteiten eú me eú kinikinin manawach. (Ppii ewe pwóór “ Unusen Wililó me lón are Lúkún Chék?”) Mi lamot sipwe unusen siwili alóllóólun letipach, ekiekich, meefiach, me mochenich. Ina popun, a lamot ngenikich meinisin ach  sipwe pwisin eisinikich, ‘Ekkewe siwil ua fen féri ren ai upwe wiliti emén Chón Kraist, ra chék weneiti napanapei kewe me lúkún, are ua enletin wiliti emén Chón Kraist ren met a nóm lón letipei me ekieki?’ A mmen lamot sókkofesenin ekkena ruu mettóch. Minne Jesus a apasa lón Mateus 12:43-45 a áiti ngenikich met a lamot emén epwe féri. (Álleani.) Alon kana ra áiti ngenikich ei lesen mi lamot: Ese naf ach sipwe péútaaló ach kewe ekiek mi ngaw, nge mi pwal lamot ach sipwe siwili ekkena ekiek ngeni ekkewe ekiek mi múrinné Kot epwe pwapwa ren.

“LETIPEMI ME EKIEKIMI EPWE FOKUN SÖFÖSEFÄL”

7. Ifa usun sipwe siwili letipach me ekiekich?

7 Mi tufich ach sipwe siwili wesewesen napanapach me lón? Iei met án Kot we Kapas a apasa: “Letipemi me ekiekimi epwe fokun söfösefäl, oupwe fokun angei ewe manau mi fö mi för lon lapalapen Kot o pwäla lon eu manau mi enletin pwüng me pin.” (Ef. 4:23, 24) Ewer mi tufich ach sipwe siwili napanapach me lón, nge ese mecheres. Ese naf ach sipwe chék nemeni pwisinkich me úkú seni ach féri met mi ngaw. Nge mi lamot sipwe siwili ‘letipach me ekiekich,’ weween mochenich, féfférúch me popun sia féri och mettóch. Nge a lamot sipwe kan achocho le féfféri ekkena siwil.

8-9. Ifa usun pwóróusen emén Chón Kraist mwán a menlapei lamoten án emén epwe siwili letipan me ekiekin me lón?

8 Sipwe nengeni pwóróusen emén pwiich mi mwánesól me lóóm. Mwirin an úkú seni an sousakaw me fiu ngeni aramas, a fich ngeni an epwe papatais, me a eú leenien áppirú mi múrinné lón sópwun we. Nge eú pwiin, ekiseló mwirin an papatais, a ppiitá eú sóssót ese tepereni. Emén mwán mi sakaw a ló ren imwan we me mochen fiu ngeni. Akkomwan, pwiich na a engiló ngeni an esap appélúwa. Nge lupwen ewe mwán a turunufasa iten Jiowa we, me ikena ie pwiich na mi kerán papatais a fókkun song me ese chúen tongeni engiló. A towu me awata ewe mwán. Pwata a féri ena? Inaamwo ika an káé Paipel a álisi le ú ngeni an mochen fiu, nge esaamwo siwili masouen letipan me an ekiek. Weween esaamwo siwili wesewesen napanapan me lón.

9 Iwe nge, pwiich na ese fangetá. (SalF. 24:16) Ren álillisin ekkewe mwán mi ásimaw, a akkachocho an epwe feffeitá. Ló, ló, ló, a tongeni wiliti emén mwán mi ásimaw. Nge me lúkún ewe Leenien Mwich lón eú pwinin, a pwal kúna ena esin sóssót a kúna fite ier a ló. Emén mwán mi sakaw itá epwele awata emén me lein ekkewe mwán mi ásimaw. Iwe, met pwiich na a féri? A chék fós ngeni ewe chón sakaw fán mosonoson me tipetekison, me cháácháári pwal mwo nge álisi le liwiniti imwan we. Pwata a sókkóló met pwiich na a féri lón ena atun? Pún pwiich na a fen féri siwil lón letipan me ekiekin. A wililó ngeni emén mi tipetekison me emén mi chék kúkkútta kinamwe, minne mi elingaaló Jiowa!

10. Met a lamot sipwe féri ren ach sipwe siwili napanapach me lón?

10 Ekkena siwil rese mwittir fis are automatic. Mi lamot sipwe fókkun “achocho” ren fite ier. (2 Pet. 1:5) Ekkena siwil rese chék fis pokiten sia fen nóm lón ewe enlet ren fansoun langattam. Nge mi lamot sipwe angang weires me féri úkúkún ach tufich le siwili napanapach me lón. Mi wor fitu mettóch mi lamot sipwe féri pwe epwe álisikich le féri siwil. Sipwe pwóróus wóón ekkóch me leir.

 USUN ACH SIWILI EKIEKICH ME LETIPACH

11. Ifa usun iótek epwe álisikich le féri siwil lón letipach me ekiekich?

11 Iótek, ina ewe áeúin mettóch mi lamot sipwe féri. Mi lamot sipwe eáni án ewe soumakken kélfel ei iótek: “Ai Kot, kopwe föri loi eu leluk mi limöch o fangelong loi eu ngün mi fö o pos.” (Kölf. 51:10) Mi lamot sipwe mirititi lamoten ach sipwe siwili letipach me ekiekich. Ifa usun sipwe lúkúlúk pwe Jiowa epwe álisikich le féri ena siwil? Án Jiowa ei pwon ngeni ekkewe chón Israel mi lúkúmach lón fansoun Isikiel we a alúkúlúkúkich: “Üpwe ngeniir eu leluk mi fö, üpwe pwal fangelong lor eman ngün mi fö. . . . o ngeniir eu leluk mi pwetete,” weween eú leluk mi tipemecheres le álleasochisi án Kot emmwen. (Is. 11:19) Jiowa a chék mmólnetá le álisi ekkewe chón Israel le féri siwil, iwe a pwal mmólnetá le álisikich.

12-13. (a) Met a lamot sipwe ekilonei me ren Kölfel 119:59? (b) Ikkefa ekkewe kapas eis kopwe pwisin eisinuk?

12 Ekilon, ina ewe oruuen mettóch mi lamot. Lupwen sia álleanifichi án Kot we Kapas iteiten rán, mi lamot sipwe awora fansoun le ekilonei are ekiekifichi ekkewe siwil mi lamot sipwe féri lón ekiekich me meefiach. (Álleani Kölfel 119:59; Ipru 4:12; Jas. 1:25) Mi lamot sipwe etittina ika a fen nóm rech och ekiek me memmeef mi pwári pwe sia tipetipeló ren ekiekin fénúfan. Ika sia esilla eú mettóch sia apwangapwang wóón, iwe mi lamot sipwe wenechar me angang weires le péútaaló ach kana apwangapwang.

13 Áwewe chék, pwisin eisinuk: ‘A pwal mwo nge wor ákkáekis memmeefin lólówó lón letipei?’ (1 Pet. 2:1) ‘Ua meefi pwe ua lap seni ekkewe ekkóch pokiten nónnómui, úkúkún ai sukul are wéúi?’ (SalF. 16:5) ‘Ua meefi pwe ra aúcheangaw chókkewe sap iir chón fénúei we, are ese nóm rer ekkewe mettóch a nóm rei?’ (Jas. 2:2-4) ‘Ua kan sani mettóchun lón án Satan ei ótót?’ (1 Joh. 2:15-17) ‘Ua kan sani ekkewe minen apwapwa mi apéchékkúla féfférún mwánesól me sikepwach?’ (Kölf. 97:10; 101:3; Am. 5:15) Minne ka pélúwen ngeni ekkena kapas eis a tongeni pwári ekkóch mettóch mi lamot kopwe angang woor. Sia apwapwaai Semach we lón láng atun sia urusawu ekkena ekiek me memmeef mi fen té warer lón letipach.—Kölf. 19:14.

14. Pwata a fókkun lamot ach sipwe filiéch chiechiach mi múrinné?

14 Filiéchú chiechi mi múrinné, ina ewe aúlúngátin mettóch mi lamot. Chiechi a tongeni eú feiéch are eú minen efeiengaw ngenikich. (SalF. 13:20) Ese mwáál chienach kewe chón sukul are chón angang rese tongeni álisikich le eáni án Kot ekiek. Iwe nge, sia tongeni kúna ewe sókkun chiechi mi fókkun múrinné lón ach kewe mwich. Me ikena ie, kich pwisin sia tongeni péchékkúletá are alóllólakichetá lón “ach eäni chen me föför mürina.”—Ipru 10:24, 25.

“PÖPÖCHÖKÜLELA LON ÄMI LÜKÜ”

15-16. Ifa usun Satan a sótun siwili ach ekiek?

15 Iwe nge, chechchemeni pwe Satan a fókkun achocho le siwili ach ekiek. A áeá sókkopaten asukul me lúkú pwe epwe atai án Kot emmweni manawach me ren an we Kapas mi enlet.

16 Satan a kan eáni ewe esin kapas eis a eisini Efa lón ewe tánipiin Eten: “Ifa usun, Kot a wesewesen apasa pwe . . . ?” (Ken. 3:1) Lón ei fénúfan mi nóm fán nemenien Satan, fán chómmóng sia rong ekkewe esin kapas eis epwe efisi ach sipwe tipemwaramwareiti minne  sia lúkú, áwewe chék: ‘Ifa usun, Kot a wesewesen apasa pwe a oput án mwán me mwán, me fefin me fefin pwúpwúlúfengen? Kot a wesewesen apasa pwe ese mochen óm kopwe féri apwapwaan Krismas me uputiw? Kot a wesewesen apasa pwe ese mochen óm kopwe angei chcha? Emén Kot mi tong a wesewesen apasa pwe ese mochen óm kopwe chiechi ngeni chón óm famili are chienom mi katowu?’

17. Met sipwe féri lupwen emén a eisinikich ewe esin kapas eis mi etipemwaramwara ach lúkú, me met Kolose 2:6, 7 a erá pwe a tongeni fis?

17 Mi lamot sipwe núkúchar lón ach lúkú. Ika sise kútta pélúwen ekkewe kapas eis mi lamot usun ach lúkú, iwe sia tongeni poputá le tipemwaramwar ika mi pwúng minne sia lúkú. Ekkena tipemwaramwar ra tongeni eingawaló ach ekiek me atai ach lúkú. Iwe, met mi lamot sipwe féri? Án Kot we Kapas a erenikich ach sipwe siwili ach ekiek pwe sipwe ánnetatá ngeni pwisinkich “met mi mürina me unusöch, pwal met mi apwapwai i.” (Rom 12:2) Ren ach káé iteitan, sia tongeni ánnetatá ngeni pwisinkich pwe mi enlet met sia káé seni Paipel, me unusen lúkú pwe án Jiowa kewe allúk ra pwúng. Iwe, sipwe usun efóch irá mi warar, sipwe ‘pöpöchökülela lon ach lükü.’​—Álleani Kolose 2:6, 7.

18. Met epwe álisikich le ttii senikich efeiengawen án Satan ei ótót?

18 Ese wor ié epwe tongeni akkapéchékkúlaló óm lúkú me lúkumw pwisin. Ina popun kopwe chék sópweló le akkasefééi letipom me ekiekum. Ikkiótek iteitan me tingor álillisin án Kot we manaman mi fel. Ekkekilon me ekketittina minne ka kan ekieki me met a kan amwékútuk le féri och mettóch. Filiéch chiechiom mi múrinné me chiechi ngeni chókkewe mi tongeni álisuk le ewilaaló óm ekiek. Ika kopwe féri ena, iwe kopwe ttii sonuk efeiengawen án Satan ei ótót, me atai “ekewe kapas mi mwäl o . . . meinisin mi epeti än aramas repwe silei Kot.”​—2 Kor. 10:5.

KÉL 50 Ai Iótekin Fangóló Manaw Ngeni Jiowa

^ par. 5 Nónnómun manawach, eéreniach, me minne sia káé lón sukul a tongeni anapanapa ach ekiek. Neman sia esilla pwe sia fen eáni och ekiek mi ngaw nge a fen té waran me a weires ach sipwe úttawu. Ei lesen epwe áiti ngenikich ifa usun sipwe tongeni amóeló ekkewe ekiek me féffér mi ngaw sia fen eániir.