“Kot esap eäni föför esepwüng, esap manlükala ewe angang oua föri me ewe chen oua pwäri ngeni i.”​—IPRU 6:10.

KÉL: 4, 51

1. Ifa ewe mettóch kich meinisin sia kan mochen?

MET meefiom lupwen emén ka sissilei me súféliti a ménúkaaló itom we are fen ngaw seni ena, ese esillók? A fókkun eletipengaw ena. Pwata? Pún emén me emén leich sia kan mochen ekkewe ekkóch repwe áfánnikich. Iwe nge, ar silei ika kich ié, esap chék ina met sia mochen repwe silei. Sia mochen ar repwe silei met sókkun aramas kich me met sia fen féri lón manawach.​—Num. 11:16; Hiop 31:6.

2, 3. Met a tongeni fis ren ach mochen án aramas repwe aúcheanikich? (Ppii ewe sasing lepoputáán ei lesen.)

2 Nge ika sise túmúnúéch, ei esin mochen án aramas repwe aúcheanikich, a tongeni páe ngeni ngaw. Án Satan ei ótót a tongeni efisi ach sipwe mochen iteféúló me aúchea. Lupwen a fis ei, sise ngeni Semach we mi nóm láng, Jiowa Kot, ewe iteúéch me ewe sókkun fel mi fich ngeni.​—Pwär. 4:11.

3 Lón fansoun Jesus we, ekkóch néúwisin lamalam ra eáni  ekiek ese pwúng usun án aramas silleniir. Jesus a éúréúra néún kewe chón káé, a apasa: “Oupwe afälikemi ren ekewe Sensen Allük, ra sani ar repwe fetalfeil fän üfer mi langatam, ra pwal sani än aramas repwe kapong ngeniir fän suföl lon ekewe lenien amömö. Ra aea ekewe lenien mot än ekewe meilap lon ekewe imwen felikis, pwal ekewe leni fän iten aramas mi iteföüla lon ekewe lenien kametip.” A pwal apasa: “Ätekewe repwe küna apwüng mi fokun chou.” (Luk. 20:46, 47) Iwe nge, Jesus a mwareiti ewe fefin mi wéúngaw mi má pwúlúwan mi eáni asor rúúeféú kúkkún senis, nge ese mwáál ese wor emén mi kúna minne a féri. (Luk. 21:1-4) A ffat pwe án Jesus ekiek usun ewe mettóch silleló a fókkun sókkóló seni án ekkewe ekkóch. Ei lesen epwe álisikich le eáni ekiek pwúng usun ewe mettóch silleló, ewe sókkun ekiek Jiowa Kot a mochen ach sipwe eáni.

EWE SÓKKUN SILLELÓ MI MÚRINNÉ SENI MEINISIN

4. Án ié sillenikich epwe kon múrinné seni meinisin, me pwata?

4 Án ié sillenikich epwe kon múrinné seni meinisin? Esap ina met chómmóng aramas ra kan achocho ngeni ar repwe angei ren ar fiti sukul tekia, sópwéch lón pekin business, are iteféúló lón pekin minen apwapwa me kunou. Paulus a áweweei ena lupwen a apasa: “Iei ämi öüwa silei Kot, ika fen itiitin pwe Kot a silei kemi. Iwe, ifa usun, pwata öüwa kulsäfaliti ekkewe mettóchun öörüni mi apwangapwang me lamwotongaw pwe öüpwe mochen fööteksäfäl fän nemenier?” (Kal. 4:9, Agapé) A eú feiéch mi amwarar án ‘Kot epwe silei kich,’ ewe mi Tekia Seni Meinisin lón láng me wóón fénúfan! Jiowa mi silei ika kich ié, a tongekich, me a mochen sipwe arap ngeni. Jiowa a férikichetá pwe sipwe tongeni wiliti chiechian.​—SalAf. 12:13, 14.

Jiowa mi silei ika kich ié, a tongekich, me mochen sipwe arap ngeni

5. Met a lamot sipwe féri pwe sipwe sill me ren Kot?

5 Sia silei pwe Moses i chiechien Jiowa. Lupwen a tingormaw ngeni Jiowa, a erá: “Kopwe aiti ngeniei om akot,” iwe, Jiowa a pélúweni: “Üpwe fokun föri meinisin mine ka tüngor, pun üa sileek [“sileek ren itom,” NW], ka pwal küna ümöümöch me rei.” (Eks. 33:12-17) Jiowa a pwal tongeni sillenikich. Nge met sia tongeni féri pwe sipwe wiliti chiechien Jiowa? A lamot ach sipwe tongei i me fangóló manawach ngeni i.​—Álleani 1 Korint 8:3.

6, 7. Met a tongeni efisi péútúlóón ach chiechi ngeni Jiowa?

6 Iwe nge, a lamot ach sipwe akkamwéchú ach chiechi mi aúchea ngeni Semach we lón láng. Usun chék ekkewe Chón Kraist lón Kalatia, a lamot ach sipwe úkútiw le slave ngeni án ei fénúfan kewe “öörüni mi apwangapwang me lamwotongaw,” kapachelong ewe sópwéch me itetekia ra pop seni. (Kal. 4:9, Agapé) Ekkena Chón Kraist lón Kalatia ra fen silei Kot, me Kot a fen pwal sileer. Nge Paulus a apasa pwe ekkena Chón Kraist ra “kulsäfaliti” ekkewe mettóch mi lamotongaw. Ina minne, a eisiniir lón ei itiitin kapas: ‘Pwata oua liwinsefáliti me poputásefál  le slave ngeni ekkewe chék mettóch mi umwes me lamotongaw?’

7 Mi pwal tongeni fis ngenikich ena? Ewer, mi tongeni. Usun chék Paulus, lupwen sia silei ewe enlet neman sia likitaló iteféúlóch me sópwéchúch lón án Satan ei ótót. (Álleani Filipi 3:7, 8.) Neman sia pennúkúóló ewe tufichin fiti och sukul nge ese kamé, angang mi múrinné, are tufichin angei watteen moni. Are neman kich mi tongeni iteféúló are wéúéch pokiten sia angéch lón pekin kél are pekin urumwot. Nge sia likitaló meinisin ekkena mettóch. (Ipru 11:24-27) Esap fókkun eú alen tipachem ika sipwe niamam ren ekkena kefil mi múrinné sia féri me meefi pwe epwe kon múrinné manawach ika sia chei ekkena mettóch. Ena esin ekiek epwe tongeni efisi ach sipwe liwinsefáliti ekkewe mettóch lón ei fénúfan, ekkewe sia fen apwúngaló pwe iir “mi apwangapwang me lamwotongaw.”

APÉCHÉKKÚLALÓ ÓM MOCHEN SILLELÓ ME REN JIOWA

8. Met a tongeni apéchékkúlaló ach mochen silleló me ren Jiowa?

8 Ifa usun epwe péchékkúleló ach mochen silleló me ren Jiowa pwe sisap chúen mochen silleló me ren ei fénúfan? A lamot sipwe nefótófót wóón ekkeei ruu mettóch mi enlet. Áeúin, fansoun meinisin Jiowa a kan sissileeló chókkewe mi angang ngeni fán tuppwél. (Álleani Ipru 6:10; 11:6) Me ren Jiowa, emén me emén néún kewe chón angang mi tuppwél iir mi aúchea, ina minne a meefi pwe eú “föför esepwüng” an esap áfánni emén leir. Fansoun meinisin, Jiowa a kan silei “chokewe ir nöün.” (2 Tim. 2:19) I a silei fetálin “ekkewe aramas mi pung” me a silei ifa usun epwe amanawer.​—Kölf. 1:6; 2 Pet. 2:9.

9. Eáni eú kapas áwewe ren ifa usun Jiowa a pwári an echeni néún kewe aramas.

9 Fán ekkóch Jiowa a pwári an echeni néún kewe aramas lón napanap mi fókkun aúchea. (2 Kron. 20:20, 29) Áwewe chék, ekieki ifa usun Jiowa a seláni néún kewe aramas lón ewe Setipar atun án Farao we mwichen soufiu mi péchékkúl a cheer. (Eks. 14:21-30; Kölf. 106:9-11) Minne a fis a mmen amwarar pwe inaamwo ika a fen 40 ier ra ló nge ekkewe aramas lón ekkena leeni ra chúen fóffós usun. (Jos. 2:9-11) A fókkun eú minen apéchékkúl ngenikich ach chechchemeni ifa usun Jiowa a tongei néún kewe aramas lóóm me áeá an manaman le selániir, pún ekiseló chék Kok seni Makok epwe maunekich. (Is. 38:8-12) Lón ena atun, sipwe fókkun pwapwa pwe sia kútta chenich me ren Jiowa nge esap me ren ei fénúfan.

Fán ekkóch, Jiowa a efeiéchú néún kewe chón angang lón napanap rese tepereni

10. Ifa pwal ewe pwóróus mi enlet sipwe nefótófót wóón?

10 Ewe oruuen pwóróus mi enlet a lamot sipwe nefótófót wóón, ina án Jiowa tongeni áfánnikich lón napanap sise fókkun tongeni tepereni. Ika aramas ra féri minne mi pwúng ren án aramas repwe chék mwareitiir, Jiowa esap ngeniir liiwiniir. Pwata?  Pún usun met Jesus a apasa, ika aramas ra mwareitiir, iwe ina liiwiniir. (Álleani Mateus 6:1-5.) Iwe nge, “le monomon” Jiowa mi kúna chókkewe mi féri minne mi pwúng ngeni ekkewe ekkóch nge ese wor a áfánniir. I a kúna minne ra féri, me i a ngeniir liiwiniir are efeiéchúúr. Me fán ekkóch, Jiowa a liiwini néún kewe chón angang lón napanap rese tepereni. Sipwele pwóróus usun ekkóch me leir.

JIOWA A ÁFÁNNI EMÉN FÉPWÚL MI TIPETEKISON LÓN NAPANAP ESE TEPERENI

11. Ifa usun Jiowa a áfánni Maria?

11 Jiowa a filatá emén fépwúl mi tipetekison itan Maria pwe epwe inen Jesus, Néún we. Maria a nónnóm lón ewe kúkkún telinimw itan Nasaret mi towaw seni Jerusalem me ewe imwenfel mi ling lón. (Álleani Lukas 1:26-33.) Pwata Jiowa a filatá Maria? Ewe chónláng Kapriel a ereni pwe a kúna chen me ren Kot. Seni minne a apwóróusa ngeni aramasan we, Elisapet, sia tongeni silei pwe i a fókkun chiechiéch ngeni Jiowa. (Luk. 1:46-55) Jiowa a kan akkattola Maria me a ngeni ei feiéch ese fókkun tepereni pokiten neminna a tuppwél ngeni.

12, 13. Ifa usun Jesus a kúna assamol atun a uputiw me ewe atun Maria a uwei ngeni ewe imwenfel mwirin 40 rán?

12 Lupwen Jesus a uputiw, ié kewe Jiowa a ereni usun uputiwan? Ese ereni ekkewe néúwisin mwú mi tekia lón Jerusalem me Petleem. Nge a fen ereni ekkewe chón masen siip lón ewe leenien atake lúkún Petleem ren an tiinaaló rer chónláng. (Luk. 2:8-14) Mwirin, ekkeei chón mmas ra chuuri ewe ménúkol mi kerán uputiw. (Luk. 2:15-17) Ese mwáál, Josef me Maria ra fókkun máirú ar kúna án ekkóch áfánni Jesus lón ena esin napanap. Napanapen án Jiowa féri mettóch a sókkóló seni án ewe Tefil. Lupwen Satan a tiinaaló ekkewe soufúú pwe repwe chuuri Jesus me seman kewe me inan, meinisin lón Jerusalem ra silei pwóróusen uputiwen Jesus, iwe ei a efisi watteen osukosuk. (Mat. 2:3) Mwirilóón, chómmóng semirit ra ninniiló.​—Mat. 2:16.

13 Me ren án Jiowa Allúk ngeni chón Israel, emén inelap epwe eáni asor ngeni  Jiowa mwirin 40 rán an néúnatiw emén át. Ina minne Maria fiti Josef me Jesus ra sái seni Petleem ngeni ewe imwenfel lón Jerusalem, towauan ina epwe wonu mwail. (Luk. 2:22-24) Atun ar sái, ese mwáál Maria mi ekieki ika ewe souasor epwe féri och mettóch mi kkóló aúchean le asamolu Jesus. Jesus a kúna assamol nge lón napanap Maria esap tongeni tepereni. Jiowa a filatá Simeon emén mwán mi “pwüng o aleasochisi än Kot kewe Allük meinisin” me ewe soufós fefin mi má seni pwúlúwan itan Anna, 84 ierin, ar repwe esilei pwe Jesus i epwe ewe Messaia mi pwonetiw, are Kraist.​—Luk. 2:25-38.

14. Ifa usun Jiowa a efeiéchú Maria?

14 Itá Jiowa a sópweló le ákkáfánni Maria pokiten a fókkun ámáári me túmúnúéchú Jesus? Ewer. Kot a alúkúlúkú pwe ekkóch ekkewe mettóch Maria a apasa me féri repwe mak lón ewe Paipel. Usun itá Maria ese fiti Jesus le sái lón an afalafal úkúkún úlúngát esopw ier. Neman pokiten a má seni pwúlúwan, iwe a lamot an epwe nómwotiw lón Nasaret. Iei minne, ese kúna ekkewe chómmóng mettóch mi amwarar ekkewe ekkóch ra kúna. Nge i mi nóm ren Jesus atun a máló. (Joh. 19:26) Mwirin, Maria mi nóm lón Jerusalem ren néún Jesus kewe chón káé me mwen ar angei ewe manaman mi fel lón Pentikost. (Föf. 1:13, 14) Ese mwáál a kepit fitifengen me ekkewe ekkóch chón káé. Ika ina, weween pwe neminna a angei ewe tufichin nónnóm ren Jesus lón láng tori feilfeiló chék. Ina wesewesen eú feiéch ngeni mi amwarar pokiten an angang fán tuppwél!

JIOWA A ÁFÁNNI NÉÚN WE

15. Ifa usun Jiowa a pwári an echeni Jesus atun a nóm wóón fénúfan?

15 Jesus ese mochen kúna assamol seni néúwisin lamalam are mwú. Nge fán úlúngát, Jiowa a fósetiw seni láng ren an esilei ngeni Néún we pwe I a tongei. Ese mwáál a fókkun apéchékkúla Jesus! Mwirin chék án Jesus papatais lón ewe Chénúpupu Jortan, Jiowa a erá: “Iei i nei mi achengicheng, üa unusen pwapwa ren.” (Mat. 3:17) Usun itá Johannes Soupapatais, i chék a pwal  rongorong ekkena kapas. Iwe mwirin, ina epwe eú ier mwen málóón Jesus, úlúmén me lein néún kewe aposel ra rong alon Jiowa ei usun Jesus: “Iei i nei mi achengicheng üa fokun pwapwa ren, oupwe aüselinga!” (Mat. 17:5) Sáingolóón, fitu rán me mwen málóón Jesus, Jiowa a fóssefál ngeni Néún na seni láng.​—Joh. 12:28.

Met ka káé seni napanapen án Jiowa áfánni Néún we? (Ppii parakraf 15-17)

16, 17. Ifa usun Jiowa a efeiéchú Jesus lón eú napanap ese tepereni?

16 Jesus mi silei pwe aramas repwe kér ngeni emén chón turunufas me i epwe máló lón napanap mi ássáw. Iwe nge, a iótek pwe letipen Kot epwe pwénúetá nge esap letipan. (Mat. 26:39, 42) Pokiten a mochen silleló me ren Seman we nge esap me ren fénúfan, iwe ‘ese ekieki itengauen an mäla’ me a likiitú fán riáfféún an eitiwetá wóón ewe iráán ninni. (Ipru 12:2) Iwe, ifa usun Jesus a silleló me ren Jiowa?

17 Lupwen Jesus a nóm wóón fénúfan, a iótek pwe epwe angei ewe ling a eáni me mwan, atun a nóm ren Seman we lón láng. (Joh. 17:5) Paipel ese apasa pwe Jesus a mochen angei minne mi lap seni ena. I ese ekiekin kúna eú liiwin mi sókkóló aúchean ren an féri letipen Jiowa wóón fénúfan. Nge met Jiowa a féri? A efeiéchú Jesus lón eú napanap ese tepereni. Lupwen Jiowa a amanawasefáli Jesus, i a “atekiatai won eu leni mi fokun tekia” me lón láng. A pwal ngeni Jesus eú sókkun manaw esemuch esap tongeni taló, ewe mettóch ese mwo wor emén mi angei me mwan! * (Fil. 2:9; 1 Tim. 6:16) A ifa me amwararen án Jiowa efeiéchú Jesus ren an angang fán tuppwél!

18. Met epwe álisikich le kútta ach sipwe kúna chen me ren Jiowa nge esap me ren ei fénúfan?

18 Met epwe álisikich le kútta ach sipwe kúna chen me ren Jiowa nge esap me ren ei fénúfan? A lamot ach sipwe nefótófót wóón ekkewe pwóróus pwe fansoun meinisin Jiowa a kan silleni néún kewe chón angang mi tuppwél me fán chómmóng i a kan efeiéchúúr lón napanap rese tepereni. Sia tongeni anchangei ifa usun Jiowa epwe efeiéchúkich lón mwachkkan. Nge ren mwo iei, atun sia lillikiitú fán osukosuk me weires lón ei fénúfan mi fókkun ngaw, a lamot sipwe chechchemeni pwe ei ótót epwele móróló. Ina minne meinisin met a silleló me ren repwe pwal móróló. (1 Joh. 2:17) Nge Jiowa, Semach we mi tong, esap fókkun ménúkaaló ach angang me ewe tong sia pwári fán ásengesin itan, pún i ‘ese eäni föför esepwüng.’ (Ipru 6:10) Epwe fókkun pwáraaló pwe a echenikich lón ewe napanap sise fókkun ekieki ngeni!

^ par. 17 Ewe Tesin Ipru ese fósun ei liffang, ewe manaw esemuch esap tongeni taló. Ina minne neman Jesus ese ekieki usun.