LUPWEN Jesus a áiti ngeni néún kewe chón káé ifa usun repwe afalafala ewe kapas allim, a pwal éúréúrer pwe esap fansoun meinisin aramas repwe mochen aúseling ngeniir. (Luk. 10:3, 5, 6) A pwal ina usun lón ach angangen afalafal. Neman ekkóch aramas sia chuuriir rese pwári súfél are ra pwal mwo nge akkachofesá. Me ika ra ina usun ngenikich, eli epwe weires ach sipwe eáni kirekiréch me tong me mochen afalafal ngeniir.

Emén mi kirekiréch me tong a weweiti osupwangen ekkewe ekkóch me ar osukosuk, a tongeer me mochen álisiir. Nge met epwe fis ika ese chúen wor ach kirekiréch me tong ngeni chókkewe sia chuchchuuriir lón ach angangen afalafal? Iwe, sisap chúen tinikken, weween, sisap chúen mwasangasang le afalafal ngeniir me sisap tongeni álisiir. Sia tongeni apépééi ach tinikken ngeni eú ekkei. Ren an epwe ngetenget eú ekkei, a lamot sipwe kan sópwetá amwúchún. Pwal ina chék usun ach tinikken, ren an epwe péchékkúl, a lamot sipwe eáni kirekiréch me tong.​—1 Tes. 5:19.

Ifa usun sia tongeni alapaaló ach kirekiréch me tong pwal mwo nge atun mi weires? Iei sipwele pwóróusfengen usun ekkeei úlúmén sia tongeni áppirúúr: Jiowa, Jesus, me ewe aposel Paulus.

ÁPPIRÚ ÁN JIOWA KIREKIRÉCH ME TONG

Ren fite fite ier, aramas ra afalafala kapas mi chofona fán iten Jiowa. Nge i a chék “kirikiröch ngeni chokewe resap sile kilisou, pwal ngeni ekewe aramasangau.” (Luk. 6:35) Ifa usun a pwári an kirekiréch? A mosonottam ngeni aramas meinisin. Jiowa a mochen pwe “aramas meinisin” repwe kúna manaw. (1 Tim. 2:3, 4) Inaamwo ika Kot a oput féfféringaw, nge aramas ra aúchea me ren, me ese mochen án emén me leir epwe máló.​—2 Pet. 3:9.

Jiowa a silei pwe Satan a mmen angéch le otupu aramas. (2 Kor. 4:3, 4) Chómmóng ra fen káé pwóróus mi chofona fán iten Kot seni me lekúkkúnúr. Ina popun, minne ra eáni ekiek me memmeef mi tongeni áweiresiir le etiwa ewe enlet. Nge Jiowa a fókkun mochen álisiir. Pwata sia silei ena?

Iwe, ekieki meefien Jiowa usun ekkewe aramas lón ewe telinimw Ninifa. Inaamwo ika iir mi akkachofesá, nge Jiowa a ereni Sona: “Ifa usun, ngang üsap achika Ninifa ewe telinimw mi lapalap, ia a wor ie lap seni ipükü rüengeröü aramas resamwo silei lefilen öch me ngau?” (Sona 4:11) Jiowa a tongei ekkena aramas, iir kewe rese silei ewe enlet usun i. Iei minne a tiinaaló Sona pwe epwe éúréúrer.

Kich sia pwal eáni ekiekin Jiowa usun aramas. Iir mi aúchea. Sia tongeni áppirú Jiowa ren ach fókkun mochen álisiir le káé usun i inaamwo ika usun itá resap etiwa ewe enlet.

ÁPPIRÚ ÁN JESUS KIREKIRÉCH ME TONG

Jesus a usun chék Seman we, a pwal tongei aramas pokiten “ra nom lon watten osukosuk me weires usun sip kana esap wor nöür chon mas.” (Mat. 9:36) Jesus a weweiti pwata a ina usun nónnómur. A ina usun pokiten néúwisin ar kewe lamalam ra kirikiringaw ngeniir me ra asukula ngeniir pwóróus mi chofona. Me inaamwo ika Jesus mi silei pwe chómmóng me lein chókkewe mi feito aúseling ngeni resap wiliti chón tapweló mwirin ren sókkopaten popun me weween, nge a chúen áitiir chómmóng mettóch.​—Mark. 4:1-9.

Kosap lichippúng ika emén ese aúseling me lepoputáán

Lupwen a siwil nónnómun manawen aramas, a tongeni siwil ekiekiir ngeni ewe enlet

 Lupwen aramas rese etiwa ach afalafal, a lamot sipwe achocho le weweiti met popun. Eli ra eáni ekiekmwáál usun ewe Paipel are usun lamalamen Chón Kraist pún ekkewe ekkóch mi apasa pwe iir Chón Kraist, ra féri mettóch mi ngaw. Neman ekkóch ra rongorong pwóróus mi chofona usun minne sia eáni lúkú. Pwal ekkóch neman ra niweiti aramaser kewe are chón sópwur ar repwe esiiter ika repwe etiwakich.

Ekkóch aramas sia chuuriir neman ra kúna watteen osukosuk lón manawer mi fókkun áweiresiir. Emén misineri itan Kim a erá pwe chómmóng aramas lón an we territory ra manawewu seni lón maun me a péút seniir meinisin minne mi wor rer. Ese wor ar ápilúkúlúk mi enlet fán iten mwachkkan. Ra lichippúng me rese lúkúlúkú emén. Fán chómmóng ekkewe aramas lón ena territory ra kan sótun pinei án ekkewe Chón Pwáraatá repwe afalafal. Eú rán, Kim a pwal mwo nge kúna feiengaw atun a afalafal.

Ifa usun Kim a akkamwéchú an kirekiréch me tong, pwal mwo nge atun aramas ra kirikiringaw ngeni? A achocho fansoun meinisin le chemeni met Än Salomon Fos 19:11 a apasa: “Mirit a alisi eman aramas pwe epwe mang ngeni song.” Lupwen a ekieki usun minne a fis ngeni ekkewe aramas lón an we territory, iwe a álisi i le pwári kirekiréch me tong ngeniir. Me esap pwal meinisin ra kirikiringaw ngeni. Neminna a pwal chuchchuuri fitemén lón ena territory.

Sia tongeni pwisin eisinikich: ‘Ika use silei ewe enlet, met upwe féri ika Chón Pwáraatá Jiowa ra feito afalafal ngeniei?’ Áwewe chék, ifa usun ika sia rongorong chómmóng kapas chofona usun ekkewe Chón Pwáraatá? Neman pwal kich sisap pwapwaitiir nge ra chúen pwári kirekiréch me tong ngenikich. Jesus a erá pwe a lamot ach sipwe féri ngeni ekkewe ekkóch met sia mochen repwe féri ngenikich. Ina popun a lamot ach sipwe achocho le weweiti meefien ekkewe ekkóch me mosonottam ngeniir, pwal mwo nge atun mi weires ach sipwe ina usun.​—Mat. 7:12.

ÁPPIRÚ ÁN PAULUS KIREKIRÉCH ME TONG

Ewe aposel Paulus a pwári an kirekiréch me tong pwal mwo ngeni aramas mi efeiengawa i pokiten an afalafal. Met popun? Pún a chechchemeni napanapan me lóóm. A erá: “Me lom üa kapasingau usun i, üa ariaföüü o turunufaseei. Nge Kot a eäni tong ngeniei, pun esap mwo wor ai lükülük, iei mine üsap silei mine üa föri.” (1 Tim. 1:13) Paulus mi silei pwe Jiowa me Jesus ra fókkun úméúméch ngeni i. A tongeni weweiti meefien aramas, iir kewe mi mochen aúkatiw an afalafal pún pwal ina meefian me lóóm.

Fán ekkóch Paulus a chuuri aramas mi fókkun  lúkú afalafal chofona. Iwe, met meefian ren ena? Lón Föför 17:16, sia kúna pwe atun a nóm lón Aten, a “fokun weires lupwen a küna pwe ewe telinimw a ur ren uluulun.” Iwe nge, Paulus a fen áeá ewe mettóch i a oputa pwe minen asukula aramas. (Föf. 17:22, 23) A siwili napanapen an afalafal, me a siwili napanapen an fós ngeni aramas mi sókkopat nónnómur pwe epwe ‘tongeni amanaua ekoch me leir ren met epwe tufich ngeni.’​—1 Kor. 9:20-23.

Sia tongeni áppirú Paulus atun sia afalafal ngeni aramas, iir kewe rese pwapwaitikich are iir kewe ra eáni lúkú ese pwúng. Sia tongeni áeá met sia silei usur pwe sipwe álisiir le káé usun ewe “pworaus allim.” (Ais. 52:7) Emén chienach itan Dorothy a erá: “Lón ám territory, chómmóng ra káit pwe Kot emén mi kirikiringaw me mwittir apwúngú aramas. Ua apúnga ekkena aramas ren ar fókkun lúkú Kot, mwirin ua emmweni ekiekiir ngeni met Paipel a apasa usun napanapen Jiowa mi fiti tong me an pwon fán iten mwachkkan.”

“AKUFU MET MI NGAU REN OM FÖFÖRÖCH”

Ewin ach kkan ngeni lesópwólóón ei ótót, ewin ach tongeni ésúkúsúkú pwe napanapen ekkóch aramas epwe “chök fokun ngauala.” (2 Tim. 3:1, 13) Nge sisap likitaló ach pwapwa are ach eáni kirekiréch me tong pokiten féfférúr ngenikich. Jiowa a tongeni ngenikich péchékkúl pwe ‘sipwe akufu met mi ngau ren ach föföröch.’ (Rom 12:21) Emén pioneer itan Jessica a erá pwe a kan chuchchuuri aramas mi lamalamtekia, esiitakich me ach afalafal. A pwal erá: “A mmen eletipengaw ena. Lupwen ua poputá le pwóróus ngeni emén, ua iótek fán mwéngúnúngún me tingor án Jiowa álillis pwe upwe pwal eáni an ekiek fán iten ena emén.” Ena mettóch a álisi Jessica an esap nefótófót wóón pwisin meefian nge epwe fen ekieki ifa usun epwe álisi ewe aramas.

Sipwe sópweló le kúkkútta chókkewe mi mochen silei ewe enlet

Epwe wor atun pwe ekkóch aramas repwe etiwa ach álillis me káé ewe enlet

Sipwe pwal achocho le apéchékkúla chiechiach kewe atun sia fitiir le afalafal. Jessica a apasa pwe atun a fiti ekkewe ekkóch le afalafal nge a fis ngeni emén me leir mettóch ese éch, i a achocho an esap nefótófót wóón minne a fis. Nge a fen pwóróus usun och mettóch mi múrinné, choweán uwaéchún ach angangen afalafal inaamwo ika ekkóch rese pwapwaitikich.

Jiowa mi fókkun silei pwe fán ekkóch a weires ngenikich le afalafal. Nge i a mmen pwapwa atun sia áppirú úméúméchún! (Luk. 6:36) Pwúngún esap fansoun meinisin Jiowa epwe pwáraatá an kirekiréch me tong me an mosonottam ngeni aramas. Sia tongeni lúkúlúk pwe i mi silei ineet chék epwe asopwaló ei ótót. Nge ren mwo iei, ach angangen afalafal mi atapwalapwal. (2 Tim. 4:2) Ina minne, sipwe sópweló le afalafal fán tinikken me eáni enletin kirekiréch me tong ngeni “aramas meinisin.”