Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 LESEN 7

Sipwe Tipetekison me Apwapwaai Jiowa

Sipwe Tipetekison me Apwapwaai Jiowa

“Oupwe kütta ewe Samol mi Lapalap, ämi meinisin mi tipetekison me lon ewe fanü, . . . o atekisonakemi.”​—SEF. 2:3.

KÉL 1 Napanapen Jiowa Kewe

MINNE SIPWELE KÁÉ *

1-2. (a) Met Paipel a erá usun Moses, me met a féri? (b) Met popun sipwe ámááraatá ach tipetekison?

EWE Paipel a erá pwe Moses “a fokun tipetekison seni aramasen fanüfan meinisin.” (Num. 12:3) Itá a wewe ngeni pwe a uwopwangapwang, ese tongeni féri kefil, me ese tongeni tipeppós lupwen aramas ra ú ngeni? Neman ina ekiekin ekkóch aramas usun emén mi tipetekison. Nge ese fókkun pwúng. Moses i emén chón angang ngeni Kot mi tipepwora, me ese niwokkus le féri kefil mi chou. Ren án Jiowa álillis, a tongeni ú mwen mesen ewe sounemenemen Isip mi watte manan, a emmweni ina epwe 3,000,000 aramas lón ewe fénúpéén, me a álisi ewe mwúún Israel le okkufu chón oputer.

2 Ese kan fis ngenikich ekkewe esin sóssót Moses a pworacho ngeni, nge iteiten rán sia kan kúna sóssót seni aramas are minne a fis nge mi áweiresi ach sipwe tipetekison. Iwe nge, a watte popun ach sipwe ámááraatá ena napanap. Jiowa a pwonei pwe “chon tipetekison repwe fanüeni ewe fanü.” (Kölf. 37:11) Ka tongeni erá pwe en emén mi tipetekison? Aramas repwe erá ena usum? Me mwen ach sipwe tongeni pélúweni ekkena kapas eis, mi lamot sipwe silei met weween ach sipwe tipetekison.

MET WEWEEN TIPETEKISON?

3-4. (a) Ifa ewe kapas áwewe mi weneiti ewe napanap tipetekison? (b) Ikkefa ekkewe napanap mi lamot sipwe napanapeniir pwe sipwe tongeni tipetekison, me pwata?

3 Tipetekison * a usun chék eú chúnga mi ling. Ifa usun? Emén  chón chúnga a ochufengeni fitu sókkun color mi énúwénúwekkis pwe epwe chúngaani eú chúnga. Iwe a pwal ina usun ren ach ochufengeni fitu napanap mi múrinné pwe sipwe tongeni tipetekison. Ikkeei ekkóch me lein ekkena napanap mi múrinné: álleasochis, mosonoson, me tipepwora. Pwata a lamot ekkena napanap fán iten ach sipwe apwapwaai Jiowa?

4 Ekkewe chék mi tipetekison, ra álleasochisi Kot. Kot a mochen ach sipwe eáni mosonoson. (Mat. 5:5; Kal. 5:23) Lupwen sia féri met Kot a mochen, sia fókkun asonga Satan. Iwe, inaamwo ika sia tipetekison me mosonoson, nge chómmóng aramas lón án Satan ei fénúfan ra oputakich. (Joh. 15:18, 19) Pokiten ena, a lamot ngenikich tipepwora pwe sipwe tongeni ú ngeni Satan.

5-6. (a) Pwata Satan a oputa aramas mi tipetekison? (b) Ikkefa ekkewe kapas eis sipwe pélúweniir?

5 Emén mi tipetekison a unusen sókko seni emén mi lamalamtekia, ese nemeni an song, me ese álleasochisi Jiowa. Wesewesen ina napanapen Satan. Ina popun sisap ruk pwata a oputa aramas mi tipetekison! Napanaper kewe mi múrinné ra pwári ngawen napanapan kewe. Nge met mi lap seni ena, pwe a pwári pwe i emén mi chofona. Pwata? Pokiten ese lifilifil met a apasa are féri, nge esap tongeni aúkatiw aramas mi tipetekison seni ar angang ngeni Jiowa!​—Hiop 2:3-5.

6 Ineet atun a tongeni weires ach sipwe tipetekison? Pwal eú, pwata a lamot ach sipwe ákkámááraatá tipetekison? Ren ach sipwe pélúweni ekkena kapas eis, sipwe etittina pwóróusen Moses, ekkewe úlúmén re Ipru mi eoló Papilon, me Jesus.

INEET ATUN A WEIRES ACH SIPWE TIPETEKISON?

7-8. Met Moses a féri lupwen ekkewe ekkóch ra ésúfélúngawa?

7 Lupwen sia wiseni och wis. A tongeni weires án ekkewe mi wor wiser repwe tipetekison, nge ákkáeúin lupwen emén lein chókkewe mi nóm fán túmúnúer a ésúfélúngawer are erá pwe ese pwúng met ra apwúngaló. A fen fis ngonuk ena? Ifa usun ika emén chón óm we famili a ina usun ngonuk? Met kopwe féri? Ekieki met Moses a féri lupwen a fis ena sókkun lón manawan.

8 Jiowa a seikaatá Moses an epwe souemmwenin Israel me a mut ngeni an epwe makkeetiw ekkewe allúk fán iten ena mwú. Ese  fókkun wor tipemwaramwar pwe Jiowa a peni Moses. Iwe nge, pwisin fefinan we Miriam me pwiin we Aaron, ra esiita ren ewe fefin a filatá pwe pwúlúwan. Ekkóch mwán mi wiseni ewe sókkun wis Moses a wiseni, neman repwe song me mochen liwini ngeniir, nge esap ina met Moses a féri. Ese mwittir song. A pwal mwo nge tingorei Jiowa an esap chúen apwúngú Miriam. (Num. 12:1-13) Pwata a ina usun féfférún Moses?

Moses a tingorei Jiowa an esap chúen apwúngú Miriam (Ppii parakraf 8)

9-10. (a) Met Jiowa a álisi Moses an epwe weweiti? (b) Met ekkewe mékúren famili me ekkewe mwán mi ásimaw ra tongeni káé seni Moses?

9 Moses a etiwa án Jiowa káit. Ina epwe 40 ier mwen ena, lupwen Moses a chúen chóni án ewe kingen Isip we famili, ese tipetekison. A kon songokkái, iwe a nieló emén mwán a ekieki pwe mi mwáál féfférún. Moses a ekieki pwe Jiowa epwe tipeeú ngeni met a féri. Lón úkúkún 40 ier, Jiowa a álisi Moses le weweiti pwe ese chék lamot tipepwora ren an epwe emmweni ekkewe chón Israel, nge a pwal lamot epwe tipetekison, kapachelong an epwe álleasochis, me mosonoson. A fókkun wewefichiti ena lesen me a wiliti emén souemmwen mi lipwákéch.​—Eks. 2:11, 12; Föf. 7:21-30, 36.

10 Lón ei fansoun, ekkewe mékúren famili me mwán mi ásimaw repwe áppirú Moses. Ousap mwittir song lupwen emén a ésúfélúngawakemi. Pwári tipetekison me oupwe mirititi ámi kewe apwangapwang. (SalAf. 7:9, 20) Álleasochisi án Jiowa emmwen ren ifa usun kataween osukosuk. Iteitan oupwe pélúweni aramas fán mosonoson. (SalF. 15:1) Ekkewe mékúren famili me ekkewe chónemmwen mi féri ena, ra apwapwaai Jiowa, apéchékkúla kinamwe, me isetiw eú leenien áppirú ren tipetekison.

11-13. Ifa ewe leenien áppirú ekkewe úlúmén re Ipru ra isetiw fán itach?

11 Lupwen sia kúna riáfféúmwáál. Seni chék lóóm, sounemenem ra eriáfféwúmwááli néún Jiowa kewe aramas. Ra kan tipimwáál ngenikich pwe sia atai allúk, nge ren enletin, ra oput ach ‘aleasochisi Kot lap seni ach aleasochisi aramas.’ (Föf. 5:29) Neman aramas repwe esiitakich, kalapusekich, are pwal mwo nge awatakich. Nge ren án Jiowa álillis, sisap liwiningaw ngeniir, nge sipwe chék mosonoson.

12 Ekieki ewe leenien áppirú, ekkewe úlúmén re Ipru mi eoló lón Papilon ra isetiw, iter Hanania, Misael, me Asaria. * Ewe kingen Papilon a allúk ngeniir ar repwe chapetiw ngeni eú watteen ululun seni kolt. Fán kapas pwetete, ra áwewe ngeni ewe king popun resap fel  ngeni ewe ululun. Ra sópweló le álleasochisi Kot inaamwo ika ewe king a erá pwe epwe otururelong me keniir lón ewe leenien ekkei. Jiowa a filatá an epwe amanawa ekkena mwán lón chék ena atun, nge iir rese lamalamtekia le ekieki pwe epwe chék fókkun féri ena. Nge ra fen tipemecheres le etiwa met chék Jiowa epwe mut ngeni an epwe fis ngeniir. (Tan. 3:1, 8-28) Ra ánnetatá pwe aramas mi tipetekison ra enletin tipepwora. Ese lifilifil ika emén king a erenikich ach sipwe álleasolapa Jiowa, are aramas ra eniwokkusukich are eriáfféúkich, sisap fókkun úkútiw le fel ngeni Jiowa chék.​—Eks. 20:4, 5.

13 Lupwen a fis sóssótun ach tuppwél ngeni Kot, ifa usun sipwe tongeni áppirú ekkewe úlúmén re Ipru? Sipwe tipetekison me lúkúlúk pwe Jiowa epwe túmúnúkich. (Kölf. 118:6, 7) Sipwe eáni mosonoson me súfél atun sia pélúweni chókkewe mi tipimwáál ngenikich. (1 Pet. 3:15, 16) Me sisap fókkun féri met epwe atai ach riri ngeni Semach we mi tong.

Lupwen ekkewe ekkóch ra ú ngenikich, sia pélúweniir fán súfél (Ppii parakraf 13)

14-15. (a) Met a tongeni fis lupwen sia aúrek? (b) Me ren Aisea 53:7, 10, pwata sia tongeni erá pwe Jesus a isetiw ewe leenien áppirú mi múrinné seni meinisin ren an tipetekison fán aúrek?

14 Lupwen sia aúrek. Kich meinisin sia kan aúrek ren sókkopaten popun. Neman sia aúrek me mwen ach sipwe angei eú test lón sukul are me mwen ach sipwe féri och sókkun angang lón ach leenien angang. Are sia tongeni aúreki och sókkun mettóch lón pekin sáfei neman mi lamot ach sipwe angei. Lupwen sia aúrek, a weires ach sipwe tipetekison. Neman sipwe poputá le mángaw ren ekkóch mettóch rese kan aosukosukakich me mwan. Neman sipwe poputá le fós fán song. Ika a fen fis ngonuk aúrek lón manawom, ekieki án Jesus leenien áppirú.

15 Jesus a nóm fán watteen aúrek lón ekkewe maramen sópwólóón manawan wóón fénúfan. A silei pwe epwe ninniiló me kúna watteen riáfféú. (Joh. 3:14, 15; Kal. 3:13) Fitu maram me mwen an we epwele máló, a erá pwe a riáfféú. (Luk. 12:50) Me fitu chék rán me mwen an epwele máló, a erá: “Letipei a weires.” Sia tongeni esilla tipetekisonun me an onómu fán nemenien Kot atun a pwári meefian lón an ei iótek: “Ifa usun, üpwe apasa, ‘Semei, kosap mwüt ngeniei pwe üpwe tolong lon ei fansoun riaföü?’ Nge ina popun üa feito fanüfan, pwe üpwe tolong lon ei fansoun riaföü. Semei, kopwe alinga itom.” (Joh. 12:27, 28) Lupwen a tori ewe fansoun, Jesus a pwora le mut ngeni chón oputa Kot ar repwe turufi, me ra nieló lón ewe sókkun napanap mi fókkun ámmetek me ássáw. Inaamwo ika Jesus a aúrek me riáfféú, nge a tipetekison le féri letipen Kot. Ese wor tipemwaramwar pwe Jesus a isetiw ewe leenien áppirú mi múrinné seni meinisin ren an tipetekison fán aúrek!​—Álleani Aisea 53:7, 10.

Jesus a isetiw leenien áppirú mi múrinné seni meinisin ren an tipetekison (Ppii parakraf 16-17) *

16-17. (a) Ifa usun chiechien Jesus kewe ra sótuni an tipetekison? (b) Ifa usun sipwe tongeni áppirú Jesus?

16 Lón ewe sáingoon pwinin manawen Jesus wóón fénúfan, chiechian kewe ra sótuni an tipetekison. Sótun anchangei úkúkún ewe aúrek Jesus a nóm fan lón ena pwinin. Itá epwe unusen tuppwél tori máló? Ika ese, epwe péút seni aramas meinisin ar tufichin kúna manaw. (Rom 5:18, 19) Nge lap seni ena, féfférún epwe tongeni eitengawa are eitéchú Seman we. (Hiop 2:4) Iwe, lón ewe sáingoon atun ar mwéngéfengen me chiechian kewe, ekkewe aposel, ra poputá le “aninifengen” lefiler wóón “iö leir aramas repwe ekieki pwe a lap seniir meinisin.” Jesus a fen áwena ar ekiek fán fite usun ena mettóch, pwal mwo nge lón chék ena pwinin! A mmen amwarar án Jesus ese mángaw rer. A fen fós ngeniir fán tipepwetete. A áwewesefáli fán kirekiréch me  wenechar ewe sókkun ekiek me napanap itá repwe napanapeni. Mwirin, a apúnga chiechian kana ren ar tuppwél le fitipachei.​—Luk. 22:24-28; Joh. 13:1-5, 12-15.

17 Ika en ena, met kopwe féri? Sia tongeni áppirú Jesus me mosonoson chék pwal mwo nge fán watteen aúrek. Sipwe álleasochisi án Jiowa allúk ach sipwe “songomangfengen.” (Kol. 3:13) Sipwe álleasochisi ena allúk ika sia chechchemeni pwe kich meinisin sia kan féri me apasa met epwe asonga ekkewe ekkóch. (SalF. 12:18; Jas. 3:2, 5) Me sipwe achocho le apúnga ekkewe ekkóch ren napanaper kewe mi múrinné.​—Ef. 4:29.

PWATA SIPWE AKKACHOCHO LE TIPETEKISON?

18. Ifa usun Jiowa a álisi aramas mi tipetekison le kefiléch, nge met mi lamot sipwe féri?

18 Epwe múrinnéló met sia eáni kefil. Lupwen a ppiitá och kefil mi weires lón manawach, Jiowa epwe álisikich le kefiléch, ika chék pwe sia tipetekison. A pwonei pwe epwe rong ngeni “an ekkewe mi tekisoson iotek.” (Kölf. 10:17, Kapasen God) Nge esap chék ina met epwe féri. Iei án Paipel pwon ngenikich: “A emweni chon tipetekison lon mine a pwüng o aiti ngeniir letipan.” (Kölf. 25:9) Jiowa a awora ena emmwen lón ewe Paipel me pwal lón ekkewe puk * me pwal ekkewe ekkóch mettóch ewe “chon angang mi allükülük o tipachem” a atowu. (Mat. 24:45-47) Sipwe féri wisach ren ach tipetekison le mirititi pwe mi lamot ngenikich álillis, kákkáé ekkewe mettóch Jiowa a kan awora fán itach, me tipemecheres le apwénúetá minne sia káé.

19-21. Ifa án Moses we mwáál me Kates, me ikkefa ekkewe lesen sia tongeni káé seni minne a fis?

19 Epwe eppeti ach sisap kon mwámmwáálliló. Ekiekisefáli Moses. Ren fite fite ier a tipetekison me apwapwaai Jiowa. Iwe nge, arapakkan lesópwólóón ekkewe 40 ier mi áweires lón án ekkewe chón Israel sái lón ewe fénúpéén, Moses ese tipetekison lón eú atun. Fefinan we, ese mwáál ewe a seláni Moses me Isip, a kerán má seni me peias Kates. Iwe, ekkewe chón Israel ra pwal poputásefál le péchéú ngeni Moses pwe a túmúnúngaw ngeniir. Lón ena atun, ra “anini ngeni Moses” wóón nafangawen konik. Inaamwo ika Jiowa a néúnéú Moses le féri chómmóng manaman, me inaamwo ika Moses a pwáraatá ren fansoun langattam an ese ekieki chék pwisin i atun  a emmweni ekkewe aramas, nge ekkewe aramas ra chék ngúnúngúnúngaw. Rese chék ánini ngeni Moses wóón nafangawen konik, nge ra pwal ngúnúngúnú, usun itá nge tipisin ar kaka.​—Num. 20:1-5, 9-11.

20 Moses a song, iwe ese chúen pwári tipetekison. Jiowa a fen ereni an epwe fós ngeni ewe achaw, nge Moses ese féri ena, a fen fós fán song ngeni ekkewe aramas me erá pwe pwisin i epwe awora únúmer konik. Mwirin, a wichi ewe achaw fán ruu, me a kkusukusuwu ewe konik. Lamalamtekia me song a efisi an epwe mwáálliló, nge a mmen ámmetek pwúnúngawan. (Kölf. 106:32, 33) Pokiten ese pwári tipetekison lón ena atun, iwe ese mumutá an epwe tolong lón ewe Fénúen Pwon.​—Num. 20:12.

21 Sia tongeni káé lesen mi lamot seni met a fis ngeni lón ena atun. Áeúin, a lamot sipwe akkachocho le tipetekison. Ika sise tipetekison ren chék ekis fansoun, iwe lamalamtekia a tongeni ppiitá me efisi ach sipwe eáni fós are féffér mi umwes. Oruuan, aúrek a tongeni apwangapwangaakicheló, iwe mi lamot sipwe achocho le tipetekison, pwal mwo nge fán aúrek.

22-23. (a) Pwata sipwe sópweló le etekisonakich? (b) Met Sefanaia 2:3 a áiti ngenikich?

22 Sipwe kúna túmún. Ekiseló chék, Jiowa epwe nieló meinisin aramas mi ngaw wóón fénúfan, me ekkewe chék mi tipetekison repwe nóm. Iwe, unusen fénúfan epwe enletin kinamwe. (Kölf. 37:10, 11) Kopwe fit leir? Ka tongeni, ika kopwe etiwa án Jiowa we etiwetiw mi fiti tong, ewe Sefanaia a makkeei.​—Álleani Sefanaia 2:3.

23 Pwata Sefanaia 2:3 a erá “eli oua tongeni sü”? Esap weween pwe Jiowa ese tongeni túmúnú chókkewe mi achocho le apwapwaai, iir kewe a tongeer. A wewe ngeni pwe ach kúna amanaw a pwal lóngólóng wóóch. Sia tongeni ngase seni “ränin än ewe Samol mi Lapalap lingeringer” me kúna manaw esemuch ika sia achocho iei le etekisonakich me apwapwaai Jiowa.

KÉL 21 Ra Pwapwa, Iir mi Ümöümöch!

^ par. 5 Kich sise pwúkún napanapeni ewe napanap tipetekison. A lamot sipwe ámááraatá. Neman a mecheres ach sipwe pwári tipetekison lón féfférúch ngeni aramas mi kan efisi kinamwe, nge neman epwe weires ach sipwe kan tipetekison lón féfférúch ngeni aramas mi lamalamtekia. Ei lesen epwe pwóróus usun ekkóch mettóch mi áweires eli mi lamot sipwe pworacho ngeniir pwe sipwe tongeni ámááraatá ewe napanap mi múrinné tipetekison.

^ par. 3 ÁWEWEEN KAPAS: Tipetekison. Aramas mi tipetekison, ra mosonoson lón féfférúr me ar fós ngeni ekkewe ekkóch, me ra pwal mosonoson pwal mwo nge atun emén a féri met itá epwe asonger. Aramas mi tipetekison rese lamalamtekia, nge ra meefi pwe ekkewe ekkóch ra múrinné seniir. Nge lupwen sia néúnéú ena kapas fán iten Jiowa, a wewe ngeni pwe a kan pwári tong me úméúméch ngeni ekkewe ekkóch inaamwo ika a tekia seniir.

^ par. 12 Ekkewe chón Papilon ra eita ngeni ekkewe úlúmén re Ipru Satrak, Mesak, me Apetneko.​—Tan. 1:7.

^ par. 18 Áwewe chék, ppii ewe lesen itelapan, “Föri Kefil Epwe Elingaalo Kot” lón Ewe Leenien Mas minen April 1, 2011.

^ par. 59 ÁWEWEEN SASING: Jesus a chék mosonoson lón an apwúngú néún kewe chón káé mwirin ar we ánini wóón ién leir a tekia seni meinisin.