Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

Pwapwa—Ewe Napanap Sia Angei Seni Kot

Pwapwa—Ewe Napanap Sia Angei Seni Kot

ARAMAS ra mochen ar repwe pwapwa. Nge sia nóm lón ekkeei ránin lesópwólóón, me a tori aramas meinisin ekkewe osukosuk mi weires ar repwe pwákiniir. (2 Tim. 3:1) A péút seni ekkóch aramas ar pwapwa pokiten a fis ngeniir pwúngúngaw, úriir samau, péút seniir ar angang, are málóón attongeer. Ekkóch rese chúen pwapwa pokiten a pwal fis och mettóch mi efisi ar aúrek are letipechou. Pwal mwo nge néún Jiowa kewe chón angang ra tongeni lichippúng, me ekis me ekis epwe péút seniir ar pwapwa. Ika a pwal ina usum, iwe ifa usun kopwe pwapwasefál?

Ren ach sipwe pélúweni ena kapas eis, mi lamot sipwe akkomw weweiti weween enletin pwapwa, me ifa usun ekkóch ra fen amwéchú ar pwapwa fán weires. Iwe mwirin, sipwe ppii ifa usun sipwe tongeni akkamwéchú me alapaaló ach pwapwa.

MET WEWEEN PWAPWA?

Án emén meefi pwapwa ese wewe ngeni an meefi mwánek. Ekieki mwo ei: Emén aramas mi sakaweló neman a kan chék tattakir. Nge lupwen ese chúen sakaw, iwe ese chúen takir me a chúen nóm ren an kewe chómmóngun osukosuk. An meefi mwánek ese nómottam, me esap ina ewe enletin pwapwa.​—SalF. 14:13.

Nge ewe napanap pwapwa, ina ewe memmeef mi péchékkúl lón letipach lupwen sia angei och mettóch mi múrinné are atun sia ekieki usun eú mettóch mi múrinné epwe fis. Án emén pwapwa, a wewe ngeni pwe a chék nóm ren ewe pwapwa inaamwo ika a nóm lón fansoun kinamwe are fansoun weires. (1 Tes. 1:6) Ren enletin, sia tongeni meefi letipechou, nge sia chúen tongeni meefi pwapwa. Áwewe chék, ekkewe aposel ra kúna kawet pokiten ar afalafal usun Jesus. Iwe nge, “ra towu seni ewe mwichen soupwüng, ra fokun pwapwa, pun ra tongeni tolong lon riaföü me itengau fän iten Jesus.” (Föf. 5:41) Rese meefi chengel pokiten ra kúna kawet nge pokiten ra tongeni amwéchú ar tuppwél ngeni Kot.

Ewe napanap pwapwa ese pwúkún nóm rech leuputiwach, are epwe chék automatik an epwe nóm rech. Pwata? Pokiten pwapwa mi enlet ina kinikinin uwaan án Kot we manaman mi fel. Án Kot we manaman mi fel a álisikich le ámááraatá “ewe manau mi fö” ewe pwapwa a kapachelong lón. (Ef. 4:24; Kal. 5:22) Iwe lupwen a nóm rech pwapwa, epwe mecheresiló ach tongeni likiitú fán ach kewe weires.

LEENIEN ÁPPIRÚ SIA MOCHEN ÁPPIRÚ

Jiowa a mochen an epwe fis minne mi múrinné wóón fénúfan nge esap ekkewe mettóch mi ngaw sia kúna lón ei fansoun. Inaamwo ika aramas ra féfféringaw, nge ese péút seni Jiowa an pwapwa. Ewe Paipel a apasa: “Pöchökül me pwapwa ra nonom lon imwan mi pin.” (1 Kron. 16:27) Pwal och, féfféréchún néún Jiowa kewe chón angang a apwapwaai letipan.​—SalF. 27:11.

Sia áppirú Jiowa are achocho le eáni an ekiek lupwen sia chék pwapwapwa inaamwo ika ese fis eú mettóch sia ápilúkúlúkú an epwe fis. Sisap  fen chék akkaúrek, nge sipwe fen afóta ekiekich wóón ekkewe mettóch mi múrinné mi nóm rech me mosonottam le wikkiti ekkewe mettóch mi fókkun éch repwe fis lón mwachkkan. *

A wor chómmóng pwóróus lón Paipel usun chókkewe mi akkamwéchú ar pwapwa inaamwo ika a chómmóng ar kewe osukosuk. Apraham a akkamwéchú an pwapwa pwal mwo nge atun manawan a nóm lón feiengaw me atun ekkóch aramas ra aosukosuka. (Ken. 12:10-20; 14:8-16; 16:4, 5; 20:1-18; 21:8, 9) Ifa usun a féri ena? Ren an ekkekieki usun an ápilúkúlúkún manaw lón ewe ótót sefé fán nemenien ewe Messaia. (Ken. 22:15-18; Ipru 11:10) Jesus a erá: “Apraham sememi we a fokun pwapwa pwe epwe le küna fansoun ai feito.” (Joh. 8:56) Sia áppirú Apraham lupwen sia ekkekieki usun ewe pwapwa sipwele kúna lón mwachkkan.​—Rom 8:21.

A pwal péchékkúl án Paulus me Silas lúkú me ra pwal akkamwéchú ar pwapwa fán chómmóng weires. Áwewe chék, mwirin án aramas awatangawer me ar kóturulong lón kalapus, ra “iotek o köl kölün mwareiti Kot.” (Föf. 16:23-25) Ra tongeni likiitú fán riáfféú pokiten ra ekkekieki usun án Kot kewe pwon fán iten mwachkkan. Ar silei pwe ra kúna riáfféú pokiten ar tapweló mwirin Kraist, a pwal atoto ngeniir pwapwa. Sia áppirú Paulus me Silas lupwen sia chechchemeni uwaéchún ach angang ngeni Kot fán tuppwél.​—Fil. 1:12-14.

Pwal ina usun ikenái, a chómmóng pwóróusen pwiich kewe mi akkamwéchú ar pwapwa fán weires. Áwewe chék, lón ewe November 2013, a fis ewe Watteen Taifun itan Haiyan lón Philippines, a atai imwen lap seni 1,000 familien Chón Pwáraatá ikena ie. Iei alon George, ewe a unusen taló imwan we lón ewe telinimw Tacloban: “Pwiich kewe ra chúen pwapwa inaamwo ika a fis ewe feiengaw watte. A weires ngeniei ai upwe áweweei ewe pwapwa ua meefi.” Ika sia ekieki usun met Jiowa a féri fán ásengesich me kikkilisou ngeni, iwe sipwe akkamwéchú ach pwapwa pwal mwo nge lón fansoun a torikich watteen weires. Ikkefa pwal ekkóch mettóch Jiowa a awora nge ra ngenikich popun ach sipwe pwapwa?

POPUN ACH PWAPWA

Ewe populapen ach pwapwa, pwe sia ririéch ngeni Jiowa. Sia silei ewe Kingen unuselapen láng me fénúfan. I Semach, ach Kot, me Chiechiach!​—Kölf. 71:17, 18.

Sia pwal kilisou pwe Jiowa a ngenikich manaw me ach tufichin pwapwaiti manaw. (SalAf. 3:12, 13) Pokiten Kot a lukiikichetó ngeni i, iwe sia tongeni weweiti letipan fán itach me sia silei met sipwe féri lón ach áeá manawach. (Kol. 1:9, 10) Iwe nge, lap ngeni aramas rese weweiti popun án aramas manaw. Paulus a menlapei sókkofesenin ena lupwen a makkeei: “‘Met aramas resap mwo küna ika rongorong, met aramas resap mwo ekieki lon letiper pwe epwe fis, iei ewe mettoch Kot a amolätä fän iten chokewe mi echeni.’ Nge Kot a pwäri ngenikich ei monomon ren Ngünün we.” (1 Kor. 2:9, 10) Ach weweiti minne Jiowa a tipeni a atoto ngenikich pwapwa.

Jiowa a pwal féri chómmóng mettóch fán ásengesich. A suuki alen musolóón ach kewe tipis. (1 Joh. 2:12) A ngenikich ewe ápilúkúlúkún manaw lón ewe ótót sefé epwele fis ekiseló chék. (Rom 12:12) Lón pwal mwo ei fansoun, Jiowa a awora ngenikich chómmóng chiechiach kewe me sia angangfengen lón ach fel ngeni. (Kölf. 133:1) A pwal túmúnúkich seni Satan me néún kewe chónláng mi ngaw. (Kölf. 91:11) Ika sia ekkekieki usun ekkena mettóch mi amwarar Jiowa a fen awora ngenikich, iwe epwe lapóló ach pwapwa.—Fil. 4:4.

USUN ACH SIPWE ALAPAALÓ ACH PWAPWA

Ika emén Chón Kraist a fen pwapwa, mi pwal chúen tongeni alapaaló an pwapwa? Jesus a apasa: “Ngang üa fen ürenikemi usun ekei mettoch, pwe ai pwapwa epwe nom lomi o ämi pwapwa epwe unusöch.” (Joh. 15:11) Ena wokisin a pwáraatá pwe sia tongeni alapaaló ach pwapwa. Sia  tongeni alélléfengeni ewe napanap pwapwa ngeni ekkei. Ika sia mochen án ewe ekkei epwe sarara, mi lamot sipwe sósóólóng émwúch fan. Chechchemeni ei: Án Kot we manaman mi fel a álisikich ach sipwe ámááraatá pwapwa. Ina minne, ika sia mochen alapaaló ach pwapwa, mi lamot sipwe tittingor lón iótek án Jiowa epwe ngenikich an we manaman mi fel. Mi lamot sipwe ekkekilonei pwóróusen Paipel, ewe mi mak fán emmwenien án Kot we manaman mi fel.​—Kölf. 1:1, 2; Luk. 11:13.

Ach alapaaló le féri ekkewe sókkun angang mi apwapwaai Jiowa, pwal ina met epwe alapaaló ach pwapwa. (Kölf. 35:27; 112:1) Pwata? Ewe Paipel a apasa pwe sia fférútá pwe sipwe “niueiti Kot o alesochisi an kewe allük, pun iei a fichiti aramas meinisin.” (SalAf. 12:13) Kot a férikich pwe sipwe féri letipan. Ina minne, lupwen sia angang ngeni Jiowa, sipwe wesewesen pwapwaiti manawach. *

FEIÉCHÚN PWAPWA

Lupwen sia alapaaló ach pwapwa, sipwe kúna pwal ekkóch chómmóng feiéch. Áwewe chék, Jiowa epwe fókkun pwapwa rech lupwen sia sópweló le angang ngeni fán pwapwa pwal mwo nge atun sia nóm lón osukosuk. (Tut. 16:15; 1 Tes. 5:16-18) Pwal och, pokiten sia enletin pwapwa, iwe sise pwal ekieki pwe ach achómmóngaaló pisekich epwe nampa eú lón manawach. Nge epwe fen lallapóló ach mochen pennúkúóló ese lifilifil met fán iten Mwúún Kot we. (Mat. 13:44) Lupwen sia kúna feiéchún ach alapaaló ach angang ngeni Kot, iwe epwe lapóló pwapwaach, sipwe meefi kinamwe usun pwisinkich, me sipwe pwal apwapwaai ekkewe ekkóch.​—Föf. 20:35; Fil. 1:3-5.

Pwal och, lapólóón ach pwapwa, a pwal tongeni efisi péchékkúlelóón inisich. Ewe Paipel a erá: “Eman mi pwapwa lon lelukan iei eu säfei mi mürina.” (SalF. 17:22) Emén soukáé lón pekin health lón ewe University of Nebraska lón Merika, a apasa och mettóch mi tipeeú ngeni minne ewe Paipel a apasa. Ena soukáé a erá: “Ika ka pwapwa me menemenéch lón manawom iei, iwe ese mwáál inisum epwe péchékkúl lón mwachkkan.”

Ina minne, inaamwo ika sia nónnóm lón ei fansoun mi áweires, nge sia tongeni kúna pwapwa mi enlet lupwen sia angei án Kot we manaman mi fel ren ach ikkiótek, kákkáé me ekkekilonei án Kot we Kapas. Sipwe pwal alapaaló ach pwapwa ika sia ekieki usun ekkewe chómmóng mettóch mi múrinné Jiowa a awora ngenikich iei, ika sia áppirú án ekkewe ekkóch lúkú, me ika sia achocho le féri letipen Kot. Iwe, sia tongeni kúna met mi mak lón Kölfel 64:10, ewe mi erá: “Ekewe chon pwüng repwe pwapwa ren mine ewe Samol mi Lapalap a föri, repwe pwal op ren.”

^ par. 10 Sipwe pwóróus usun ewe napanap mosonottam lón pwal eú lesen mi menlapei “uwaan án Kot we manaman mi fel.”

^ par. 20 Ren pwal ekkóch alen ach sipwe alapaaló ach pwapwa, ppii ewe pwóór itelapan “Pwal Ekkóch Alen Kalapólóón Pwapwa.”