‘Oupwe fefetal lon ngun.’​—KAL. 5:16.

KÉL: 136, 10

1, 2. Met emén Chón Kraist mwán a mirititi usun pwisin i, iwe met a féri?

ROBERT a papatais lupwen a teenage, nge ewe enlet ese kon aúchea lón manawan lap seni meinisin. A erá: “Use féri och mettóch mi ngaw, nge ua chék angang ngeni Kot pokiten ua meefi pwe ina wisei. Me ren aramas pwe mi péchékkúl ai riri ngeni Kot pún ua kan fiffiti ekkewe mwich meinisin me ua auxiliary pioneer fán fite lón eú ier. Nge mi wor och mettóch ua osupwangan.”

2 Robert ese mirititi met ewe a osupwangan tori an a fen pwúpwúlú. Fán ekkóch, ra kan eáni ekkóch urumwot me pwúlúwan we ren ar eis fengen ekkóch pwóróus seni Paipel. Pwúlúwan we a silefichi ewe Paipel me a mecheres ngeni an epwe pélúweni ekkewe kapas eis. Nge fán chómmóng Robert ese silei pélúwer, iwe a meefi sáw. A erá: “Usun itá nge use silei och mettóch. Ua ekieki, ‘Ika ngang upwe wisen emmweni pwúlúwei we lón pekin lúkú, iwe mi lamot upwe féri siwil.’” Iwe ina met a féri. A erá: “Ua kan káé, káé pwal káé, iwe ekis me ekis ua poputá le mirititi ririfengenin ekkewe pwóróus lón Paipel. Ua weweéchúló nge lap seni meinisin, ua ámááraatá ai ririéch ngeni Jiowa.”

3. (a) Met sia tongeni káé seni pwóróusen Robert? (b) Ikkefa ekkewe pwóróus mi lamot sipwe káé iei?

 3 Sia tongeni káé ekkóch lesen mi lamot seni pwóróusen Robert. Neman sia silei ekkóch pwóróus lón Paipel me fiffiti ekkewe mwich iteitan me ewe angangen afalafal. Nge ach féri ekkena mettóch ese wewe ngeni pwe sia ririéch ngeni Kot. Are sia fen achocho pwe sipwe ririéch ngeni Kot, nge lupwen sia etittina pwisinkich, sia kúna pwe mi chúen wor met mi lamot ach sipwe ámúrinnééló lón manawach. (Fil. 3:16) Lón ei lesen, sipwe pélúweni ekkeei úlúngát kapas eis mi lamot: (1) Met epwe álisikich le silei ika kich mi ririéch ngeni Kot? (2) Ifa usun epwe tongeni péchékkúleló ach riri ngeni Kot? (3) Ifa usun ach riri mi péchékkúl ngeni Kot epwe álisikich lón manawach iteiten rán?

ETITTINA PWISINKICH

4. Ié kewe a weneitiir ewe kapasen fén lón Efisos 4:23, 24?

4 Lupwen sia poputá le angang ngeni Kot, sia féri ekkewe siwil mi weneiti kinikinin manawach meinisin. Nge ese much ena lupwen sia papatais. Ewe Paipel a erenikich: “Letipemi me ekiekimi epwe fokun söfösefäl.” Lón fósun Krik, ei mwuten kapas “epwe fokun söfösefäl,” a tongeni wewe ngeni eú mettóch mi chék sópwósópwóló. Ina minne, mi lamot sipwe sópweló le akkasefésefáli letipach me ekiekich. (Ef 4:23, 24) Pokiten sise unuséch, mi lamot sipwe sópweló le féfféri ekkewe siwil. Ikaamwo sia fen angang ngeni Jiowa ren fite fite ier, nge mi lamot sipwe túmúnú pwe ach riri ngeni Kot epwe chék péppéchékkúl.​—Fil. 3:12, 13.

5. Ikkefa ekkewe kapas eis ra tongeni álisikich le silei ika kich mi ririéch ngeni Kot?

5 Ese lifilifil ika kich kúkkún are chinnap, nge mi lamot ach sipwe wenechar le etittina pwisinkich. Sia tongeni pwisin eisinikich: ‘Ngang mi esilla ika ua ririéchúló ngeni Jiowa? Ua feffeitá lón ai napanapeni napanapen Kraist? Féfférúi me ekieki atun ekkewe mwich ra pwári met usui? Met ai aasoos ngeni ekkóch a pwári usun wesewesen mocheni lón manawei? Met foutei, úfei, met ua eérenaaló lón ai fansoun káé, me féfférúi atun emén a fénéú ei a pwári usui? Met ua kan féri lupwen a fis ngeniei sóssótun minne mi mwáál? Ngang emén Chón Kraist mi fen ásimawóló?’ (Ef. 4:13) Ekkena kapas eis ra tongeni álisikich le silei úkúkún feffeitáách lón pekin lúkú.

6. Met a pwal tongeni álisikich le silei ika sia ririéch ngeni Kot?

6 Fán ekkóch a lamot án ekkewe ekkóch álillis ren ach sipwe silei ika sia ririéch ngeni Kot. Ewe aposel Paulus a áweweei pwe emén mi eáni ekiekin aramas ese mirititi pwe Kot ese pwapwaiti ewe sókkun manaw a eáni. Nge emén mi ririéch ngeni Kot a weweiti án Kot ekiek usun mettóch. A silei pwe Jiowa ese pwapwaiti emén mi chék ekieki ekiekin futuk lón manawan. (1 Kor. 2:14-16; 3:1-3) Ekkewe mwán mi ásimaw mi eáni ekiekin Kraist ra  tongeni mwittir esilla ika pwiich kewe ra poputá le eáni ekiekin futuk, me ra achocho le álisiir. Sipwe etiwa án ekkewe mwán mi ásimaw álillis ika ra sótun álisikich, me féri ekkewe siwil mi lamot? Ika ina, sipwe pwári pwe sia wesewesen mochen pwe ach riri ngeni Kot epwe péchékkúleló.​—SalAf. 7:5, 9.

PÉCHÉKKÚLELÓ LÓN PEKIN LÚKÚ

7. Ifa usun sia silei pwe emén mi ririéch ngeni Kot ese chék wewe ngeni emén mi wor silean usun Paipel?

7 Ren ach sipwe ririéch ngeni Kot, ese chék naf an epwe wor sileach usun Paipel. A watte sileien King Salomon usun Jiowa, me ekkóch me lein an kewe kapas mi etipachem ra pwal mwo nge kapachelong lón ewe Paipel. Nge mwirin och fansoun, a apwangapwangoló an riri ngeni Jiowa me ese chúen amwéchú an tuppwél ngeni. (1 King 4:29, 30; 11:4-6) Iwe, met a pwal lamot me lúkún sileach usun Paipel? Mi lamot sipwe apéchékkúlaló ach lúkú. (Kol. 2:6, 7) Ifa usun sipwe féri ena?

8, 9. (a) Met epwe álisikich le apéchékkúla ach lúkú? (b) Met a lamot sipwe achocho ngeni atun ach káé me ekilon? (Ppii ewe sasing lepoputáán ei lesen.)

8 Lón fansoun ekkewe aposel, Paulus a pesei ekkewe Chón Kraist ar repwe “fefeilo ngeni asimau.” (Ipru 6:1, Testament Mi Fö) Ifa usun sipwe apwénúetá ena pesepes lón ei fansoun? Sia tongeni káé ewe puk Oupwe Chék Nóm lón ewe Tongen Kot. Ena mettóch epwe álisuk le weweiti ifa usun kopwe tongeni apwénúetá án Paipel kewe kapasen emmwen lón manawom. Ika ka fen káé ena puk, mi pwal wor chómmóng puk ka tongeni káé pwe epwe álisuk le apéchékkúla óm lúkú. (Kol. 1:23) A pwal lamot ach sipwe ekilonei minne sia káé me tingor án Jiowa álillis pwe sipwe silei ifa usun sipwe apwénúetá.

9 Atun ach káé me ekilon, a lamot sipwe achocho le ámááraatá ach enletin mochen apwapwaai Jiowa me álleasochisi. (Kölf. 40:8; 119:97) Mi pwal lamot ach sipwe péútaaló ese lifilifil met mi eppeti feffeitáách lón pekin lúkú.​—Tit. 2:11, 12.

10. Met ekkewe kúkkún me sáráfé ra tongeni féri ren an epwe péchékkúleló ar riri ngeni Kot?

10 Ika en emén kúkkún are sáráfé, ka fen isetiw met ka mochen kopwe achocho le tikeri lón óm angang ngeni Kot? Emén pwiich mwán chón Bethel a kan fós ngeni ekkewe kúkkún  me sáráfé repwele papatais atun ekkewe mwichelap. A eisiniir ika met ra ekiekin achocho ngeni lón ar angang ngeni Kot. A kúna pwe chómmóng me leir ra fen ekiekifichi met ra mochen repwe féri. Ekkóch ra ekiekin angang ngeni Jiowa full-time are mwékút ngeni eú leeni mi osupwangen chón afalafal ie. Nge ekkóch me leir rese silei ifa usun repwe pélúweni ena kapas eis. Iwe ika rese silei, iwe itá weween nge rese pwal alamota ar repwe ekieki met repwe achocho ngeni lón pekin lúkú? Ika en emén kúkkún are sáráfé, kopwe pwisin eisinuk: ‘Ua kan fiffiti mwich me afalafal pokiten chék ina met semei kewe me inei ra mochen ai upwe féri? Are a pwisin wor ai ririéch ngeni Kot?’ Pwúngún, itá kich meinisin sipwe isetiw ekkóch mettóch sipwe achocho ngeni, ese lifilifil ika kich kúkkún are chinnap. Ekkena mettóch sia mochen tikeriir repwe álisikich le apéchékkúlaló ach riri ngeni Kot.​—SalAf. 12:1, 13.

11. (a) Met a lamot sipwe féri pwe epwe péchékkúleló ach riri ngeni Kot? (b) Menni pwóróus lón Paipel sia tongeni áppirú?

11 Lupwen sia kúna ekkewe mettóch sia tongeni ámúrinnééló lón manawach, mi lamot sipwe poputá le féri siwil. Ach féri ena are ach sise féri, epwe tongeni wewe ngeni manaw are máló. (Rom 8:6-8) Sap minne Jiowa a ekieki pwe sipwe unuséch, nge a ngenikich an we manaman mi fel pwe epwe álisikich. Nge mi chúen lamot ach sipwe fókkun pwisin achocho. Pwiich John Barr, emén chón ewe Mwichen Soupwúngúpwúng lupwen a chúen  manaw, a apasa ei usun minne a mak lón Lukas 13:24: “Chómmóng ra ttur pokiten ese naf ar achocho le feffeitá me péchékkúleló.” Mi lamot sipwe áppirú Jakop, ewe a aúlap ngeni emén chónláng, me ese fangetá tori an angei ewe feiéch. (Ken. 32:26-28) Inaamwo ika a tongeni apwapwa ach káé Paipel, nge mi lamot ach sisap ekieki pwe ach álleani Paipel epwe ámmeseik usun ámmeseiken eú tutulap. Mi lamot sipwe angang weires le kútta ekkewe pwóróus mi enlet mi aúchea epwe álisikich.

12, 13. (a) Met epwe álisikich le apwénúetá Filipi 2:5? (b) Ifa usun án Petrus leenien áppirú me kapasen fén a álisikich? (c) Met ka tongeni féri pwe epwe péchékkúleló óm riri ngeni Kot? (Ppii ewe pwóór “Minne Kopwe Féri le Apéchékkúlaló Óm Riri Ngeni Kot.”)

12 Lupwen sia achocho le feffeitá me apéchékkúlaló ach riri ngeni Kot, an we manaman mi fel epwe álisikich le siwili napanapen ach ekiek. Ekis me ekis sipwe káé le eáni án Kraist ekiek. (Fil. 2:5) Ewe manaman mi fel epwe tongeni álisikich le péútaaló mocheniangaw me ámááraatá ekkewe napanap mi apwapwaai Kot. (Kal. 5:16, 22, 23) Ika sia meefi pwe sia kan nefotofot wóón pisek me minen apwapwa, iwe sisap fangetá lón ach fiu ngeni. Mi lamot sipwe tittingorei Jiowa an we manaman pwe epwe álisikich le afóta ekiekich wóón minne mi pwúng. (Luk. 11:13) Chechchemeni aposel Petrus. A wor ekkewe atun ese eáni ekiekin Kraist. (Mat. 16:22, 23; Luk. 22:34, 54-62; Kal. 2:11-14) Nge ese fangetá, me Jiowa a álisi. Ekis me ekis, Petrus a káé ifa usun epwe eáni án Kraist ekiek. Sia pwal tongeni ina usun.

13 Mwirin Petrus a affata fitu napanap epwe álisikich. (Álleani 2 Petrus 1:5-8.) Mi lamot sipwe achocho le ámááraatá ach pwisin nemeniéchúkich, likiitú, tongen pwipwi, me pwal ekkóch napanap mi múrinné. Iteiten rán sia tongeni eisini pwisinkich, ‘Menni napanap upwe tongeni angang wóón ikenái epwe álisiei le ririéchúló ngeni Kot?’

APWÉNÚETÁ ÁN PAIPEL EMMWEN ITEITEN RÁN

14. Ifa usun ach ririéch ngeni Jiowa epwe kkúú manawach?

14 Ach eáni án Kraist ekiek a pwal achchúngú féfférúch lón ach leenien angang are lón sukul, me napanapen ach fós, me ach kefil iteiten rán. Minne sia filatá epwe pwári ika sia achocho le áppirú Kraist. Pokiten a wor ach ririéch ngeni Kot, sise mochen mut ngeni ese lifilifil met an epwe atai ach ririéch ngeni. Lupwen sia kúna sóssót, ach ririéch ngeni Kot epwe álisikich le tipeppós. Me mwen ach sipwe féri kefil, sipwe mwo ekiek me pwisin eisinikich: ‘Menni kapasen emmwen lón Paipel a tongeni álisiei? Ika án Kraist ei kefil, met itá epwe féri? Menni kefil epwe apwapwaai Jiowa?’ Mi lamot sipwe eérenaaló le eáni ena esin ekiek. Iwe iei, sipwele pwóróus wóón ekkóch mettóch ra tongeni fis ngenikich. Lón eú me eú, sipwe nengeni eú kapasen emmwen lón Paipel mi tongeni álisikich le féri kefil mi múrinné.

15, 16. Ifa usun ach eáni ekiekin Kraist epwe álisikich le kefiléch (a) pwúlúwach? (b) chiechiach?

15 Kefilin pwúlúwach. Án Paipel kapasen emmwen usun ena, a mak lón 2 Korint 6:14, 15. (Álleani.) Paulus a affata pwe aramas mi ririéch ngeni Kot a sókkoseni chókkewe mi eáni ekiekin aramas. Ese léllé ar ekiek wóón mettóch. Ifa usun ena kapasen emmwen a tongeni álisikich le filatá ié sipwe pwúlúweni?

16 Kefilin chiechiach. Án Paipel kapasen emmwen usun ena, a mak lón 1 Korint 15:33. (Álleani.) Emén mi ririéch ngeni Kot esap chiechi ngeni chókkewe mi tongeni apwangapwangaaló an lúkú. Ekieki ifa usun ka tongeni apwénúetá ena kapasen emmwen lón sókkopaten  napanap. Áwewe chék, ifa usun epwe álisuk lón óm kefil usun ekkewe sókkopaten alen pwóróusfengen me chiechi ngeni aramas wóón Internet? Ifa usun a tongeni álisuk le filatá ika oupwe textfengen me aramas kese sissileer, are play game wóón Internet ngeni ekkewe aramas kese sissileer?

Minne ua filatá a apéchékkúlaló ai riri ngeni Kot? (Ppii parakraf 17)

17-19. Ifa usun óm ririéch ngeni Kot a álisuk le (a) túmúnú seni sókkun angang me féffér mi lamotongaw? (b) isetiw met kopwe achocho ngeni lón pekin lúkú? (c) ataweei tipefesen?

17 Sókkun angang me féffér mi atai ach riri ngeni Kot. A mak eú kapasen éúréúr mi lamot lón Ipru 6:1. (Álleani.) Ikkefa ekkewe “föför mi lomotongau” mi lamot ach sipwe túmúnú senikich? A wewe ngeni ekkewe sókkun angang are féffér rese tongeni apéchékkúlaló ach riri ngeni Kot. Ena kapasen éúréúr usun féffér mi lamotongaw a tongeni álisikich le pélúweni ekkeei kapas eis: ‘Ei angang are féffér mi álilliséch are mi lamotongaw? Mi éch ai upwe angolong lón ei kókkótun business? Met popun usap fiti ekkewe kúmiin aramas mi achocho le ámúrinnééló nónnómun fénúfan?’

Minne ua filatá a álisiei le isetiw met upwe achocho ngeni lón pekin lúkú? (Ppii parakraf 18)

18 Mettóch sipwe achocho ngeni lón pekin lúkú. Lón ewe Afalafal wóón ewe Chuuk, Jesus a ngenikich ei pesepes mi múrinné usun ekkewe mettóch sipwe achocho ngeni. (Mat. 6:33) Emén mi eáni án Kot ekiek a akkomwa Mwúún Kot lón manawan. Ena kapasen emmwen a álisikich le pélúweni ekkeei sókkun kapas eis: ‘Mi éch ai upwe fiti sukul tekia mwirin ai áwesi high school? Mi éch ai upwe etiwa eú sókkun angang?’

Minne ua filatá a álisiei ám aupwe kinamwefengen me ekkewe ekkóch? (Ppii parakraf 19)

19 Tipefesen. Án Paulus we kapasen fén ngeni ekkewe Chón Kraist lón Rom a tongeni álisikich lupwen a wor tipefesen lefilach me ekkewe ekkóch. (Rom 12:18) Sia áppirú Kraist, ina popun sia achocho le “kinamwefengen me aramas meinisin.” Met sia kan féri atun a fis tipefesen lefilach me ekkewe ekkóch? Mi weires ngenikich ach sipwe etiwa meefien are ekiekin pwal emén? Are sia silleló ren ach achocho le efisatá kinamwe?​—Jas. 3:18.

20. Pwata ka mochen kopwe feffeitá lón óm ririéch ngeni Kot?

20 Ekkena mettóch sia pwóróus wóór, ra pwári ifa usun án Paipel kapasen emmwen a tongeni álisikich le féri ekkewe sókkun kefil mi pwári pwe án Kot manaman mi fel a emmwenikich. Ika sia ririéch ngeni Kot, manawach epwe uren pwapwa me menemenéch. Robert, ewe sia fen pwóróus usun, a erá: “Ai achocho le wesewesen ririéch ngeni Jiowa, a álisiei le apwénúetáéchú wisei emén mwán pwúpwúlú me emén sam. Ngang ua menemenéch me pwapwa.” Ika sia féri úkúkún ach tufich le feffeitá lón ach ririéch ngeni Kot, sipwe pwal pwapwaiti chómmóng feiéch. Epwe lapóló pwapwaan manawach iei, me lón mwachkkan sipwe eáni “ewe enletin manau.”​—1 Tim. 6:19.