Mwet ngeni masouan

Mwet ngeni tettelin menlapen masouan

Chón Pwáraatá Jiowa

Fili menni fós Fósun Chuuk

 LESEN 14

Ka Unusen Apwénúetá Wisom Ngeni Kot?

Ka Unusen Apwénúetá Wisom Ngeni Kot?

“Kopwe föri angangen eman chon asoulängala aramas, kopwe unusen apwönüetä wisom usun eman nöün Kot chon angang.”​—2 TIM. 4:5.

KÉL 142 Afalafal Ngeni Aramas Ese Lifilifil

MINNE SIPWELE KÁÉ *

Mwirin án Jesus manawsefál, ra chufengen me néún kewe chón káé me a ereniir “Oupwe feila, . . . asoulängala chon ekewe mwü” (Ppii parakraf 1)

1. Met meinisin néún Kot kewe chón angang ra mochen féri, me pwata? (Ppii ewe sasing wóón péén.)

KRAIST JESUS a allúkú ngeni néún kewe chón káé ar repwe “feila o asoulängala chon ekewe mwü meinisin.” (Mat. 28:19) Meinisin néún Kot chón angang mi tuppwél ra mochen káé ifa usun repwe tongeni “unusen apwönüetä” ena angang Kot a fen ewisa ngeniir. (2 Tim. 4:5) Ren enletin, ena angang a fókkun lamot, apwapwa me atapwal lap seni meinisin ach angang lón manawach. Iwe nge, inaamwo ika sia mochen áeá watteen fansoun lón ena angang nge neman epwe áweires ngenikich.

2. Ikkefa ekkewe mettóch sia tongeni kúna epwe tongeni áweiresi ach apwénúetá wisach lón ach angang ngeni Kot?

2 Mi pwal wor ekkóch angang mi lamot lón manawach ach sipwe áeá ach fansoun me péchékkúl le fériir. Neman mi lamot ach sipwe angang fitu awa lón eú rán ren ach sipwe atufichi pwisinkich me ach famili. Neman sia weires ren pwal ekkóch wis lón ach we famili, ren samau, letipechou are metekitekin inisich pokiten sia chinnapeló. Ifa usun sipwe tongeni unusen apwénúetá ach angang ngeni Kot fán ekkena esin weires lón manawach?

3. Met sia tongeni káé seni alon Jesus kewe lón Mateus 13:23?

3 Ika ese kon watte ewe fansoun sia tongeni áeá lón ach angang ngeni Jiowa pokiten nónnómuch, iwe sisap lichippúng. Jesus a silei pwe esap taitap uwaan met emén me emén epwe féri fán iten angangen ewe Mwú. (Álleani Mateus 13:23.) Jiowa a fókkun aúcheani meinisin met sia féri lón ach angang ngeni úkúkún ach tufich. (Ipru 6:10-12) Nge neman sia meefi pwe sia tongeni alapaaló ach angang ngeni  pokiten nónnómuch. Lón ei lesen sipwe etittina ifa usun sipwe tongeni akkomwa ena angang lón manawach, ámecheresaaló nónnómun manawach, me achocho le lipwákéchúló lón ach angangen afalafal me asukula aramas. Nge, akkomw, met weween ach sipwe unusen apwénúetá wisach lón ach angang ngeni Kot?

4. Met weween ach sipwe unusen apwénúetá wisach lón ach angang ngeni Kot?

4 Ach unusen apwénúetá wisach, a wewe ngeni pwe a lamot ach sipwe fiti ewe angangen afalafal me asukula aramas úkúkún ach tufich. Nge me lúkún ach sipwe áeá ach fansoun, mi pwal lamot ngeni Jiowa ewe popun sia féri ena angang. Pokiten sia tongei Jiowa me chón óruch kewe, iwe sia féri ach angangen Chón Kraist seni unusen letipach. * (Mark. 12:30, 31; Kol. 3:23) Ach angang ngeni Kot ren unusen letipach a wewe ngeni pwe sia fangóló pwisinkich ren ach fang ach péchékkúl úkúkún ach tufich lón an angang. Lupwen sia aúcheani wisach le afalafal, sia achocho le esilei ewe kapas allim ngeni aramas úkúkún ach tufich.

5-6. Eáni eú kapas áwewe ren ifa usun emén mi chék aúkúk an fansoun epwe chúen tongeni akkomwa an angang ngeni Kot lón manawan.

5 Anchangei emén alúwél a kan sani le kitar. A kan sani le kitar iteitan. Ló, ló, ló, a kúnékún an angang lón eú kafie an epwe kan kitar iteiten weekend. Nge ese naf peioffun le atawe ngeni. Ina popun, a cashier lón eú sitowa Sárinfál ngeni Enimu. Inaamwo ika a áeá watteen an fansoun le angang lón ena sitowa, nge a chúen mochen kikitar. A kan mochen sipeéchúló le kitar, me neman eú rán epwe féri ena full-time. Ikaamwo a ina usun nónnómun nge a alamota iteiten fansoun mi suuk ngeni le kitar, pwal mwo nge ren chék ekis fansoun.

6 Pwal ina chék usun, neman a aúkúk ewe fansoun ka tongeni áeá fán iten ewe angangen afalafal. Nge, ina met ka fókkun mochen féri. Ka achocho le lipwákéchúló le achchúngú letipen aramas ren ewe kapas allim. Nge pokiten a chómmóng óm angang, eli ka ekieki ifa usun kopwe tongeni akkomwa ewe angangen afalafal lón manawom.

 USUN ÓM AKKOMWA ÓM ANGANG NGENI KOT LÓN MANAWOM

7-8. Ifa usun sia tongeni áppirú án Jesus ekiek usun an angang ngeni Kot?

7 Jesus a isetiw eú leenien áppirú mi fókkun múrinné ren an aúcheani an angang ngeni Kot. A nefótófót wóón an akkapwóróusa ngeni aramas usun án Kot we Mwú. (Joh. 4:34, 35) A fetál fitepúkú mwail le afalafala chómmóng úkúkún an tufich. A alamota iteiten fansoun mi suuk ngeni le fós ngeni aramas lón ekkewe leeni mi wor chómmóng aramas ie me lón pwisin imwer kewe. Jesus a áeá unusen manawan le féri ewe angangen afalafal.

8 Sia tongeni áppirú Kraist ren ach kúkkútta alen ach sipwe fóffós ngeni aramas usun ewe kapas allim iteitan me ese lifilifil ia sia nóm ie. Sia tipemecheres le pennúkú kinamweech ren ach sipwe afalafal. (Mark. 6:31-34; 1 Pet. 2:21) Ekkóch chón lón ewe mwichefel ra tongeni special pioneer, regular are auxiliary pioneer. Ekkóch ra káé pwal eú fósun fénú are mwékút ngeni eú leeni mi wor osupwangen chón afalafal ie. Iwe nge lape ngeni, ewe angangen afalafal a pwénútá ren chókkewe esap iir pioneer nge ra achocho úkúkún ar tufich. Ese lifilifil nónnómuch nge Jiowa ese kútta senikich met ese ki ngenikich. A mochen pwe kich meinisin sipwe pwapwaiti ach angang ngeni atun sia esilefeili “ewe Pworausen Manau seni ewe Kot mi ling o pin.”​—1 Tim. 1:11; Tut. 30:11.

9. (a) Ifa usun Paulus a akkomwa ewe angangen afalafal inaamwo a angangen moni? (b) Met Föför 28:16, 30, 31 a áiti ngenikich usun án Paulus ekiek usun an angangen afalafal?

9 Ewe aposel Paulus a isetiw eú leenien áppirú mi múrinné ren an akkomwa ewe angangen afalafal lón manawan. Lupwen a nóm Korint lón an oruuen sái lón an misineri, a osupwangen moni, ina popun a angang ren an ffér tento. Iwe nge, me ren Paulus esap ina ewe angang mi kon lamot lón manawan. A chék eáni ena angang pwe epwe atufichi lón an afalafala ewe kapas allim ngeni ekkewe chón Korint, ‘nge resap möni ngeni och.’ (2 Kor. 11:7) Inaamwo ika a lamot án Paulus epwe angang pwe epwe atufichi manawan, nge a sópweló le akkomwa ewe angangen afalafal me a féri iteiten Sapat. Iwe lupwen a échúló nónnómun manawan, a tongeni alapaaló an fansoun afalafal. A “awora unusen an fansoun le afalafala ewe kapas, a pwärätä ngeni ekewe chon Juta pwe Jesus i ewe Kraist.” (Föf. 18:3-5; 2 Kor. 11:9) Mwirin och fansoun, lupwen Paulus a kalapus lón eú imw lón Rom úkúkún ruu ier, a afalafal ngeni chón etto chuuri, me a pwal mak taropwe. (Álleani Föför 28:16, 30, 31.) Paulus a tipeppós an esap mut ngeni och mettóch epwe eriki seni an angang. A makkeei: “Pokiten mi wor rem ei sokkun angang . . . , am ausap tilikop.” (2 Kor. 4:1, Testament Mi Fö) Sipwe usun Paulus ren ach sipwe akkomwa ach angang fán iten ewe mwú lón manawach, inaamwo ika sia áeá ach fansoun lón ach angangen moni.

A wor chómmóng alen ach sipwe tongeni unusen apwénúetá wisach lón ach angang ngeni Kot (Ppii parakraf 10-11)

10-11. Ifa usun sipwe chúen tongeni unusen apwénúetá wisach inaamwo ika mi aúkúk ach fansoun pokiten apwangapwangen inisich?

10 Ika sise kon tongeni afalafal imw me imw pokiten apwangapwangen inisich are ach ierin chinnap, iwe sia chúen tongeni pwapwaiti pwal ekkóch alen afalafal. Ekkewe popun Chón Kraist ra kúkkútta alen ar repwe fós ngeni aramas ese lifilifil ia ra nóm ie. Ra alamota iteiten fansoun mi suuk ngeniir ar repwe fós usun ewe enlet lón ar afalafal imw me imw, ikewe mi wor chómmóng aramas ie, afalafal sereseréch, me ia chék aramas ra nóm ie. (Föf. 17:17; 20:20) Ika a weires ngenikich le fetál, neman sia tongeni chék mómmóót ikewe mi wor chómmóng aramas mi feffetál ie me afalafal ngeniir. Are sia tongeni afalafal sereseréch, mak taropwe are wóón phone. Chómmóng chón  afalafal mi watte apwangapwangen inisiir ra chúen tongeni kúna watteen pwapwa me menemenéch ren ar fiti ekkewe sókkopaten alen afalafal.

11 Sia chúen tongeni unusen apwénúetá wisach lón ach angang ngeni Kot pwal mwo nge fán weiresin apwangapwangen inisich. Ekieki sefál usun án Paulus leenien áppirú. A erá: “Ngang mi tufich ren mettoch meinisin lon ewe emon mi apochokkulaei.” (Fil. 4:13, TF) A lamot ngeni Paulus ena apéchékkúl lupwen a samau lón eú me lein an sái lón an misineri. A áwewe ngeni chón Kalatia: “Pokiten üa samau üa afalafala ewe Pworausen Manau ngenikemi lon ewe aeuin fansoun.” (Kal. 4:13) Pwal ina chék usun, neman apwangapwangen inisum a tongeni suuki alen óm kopwe afalafala ewe kapas allim ngeni ekkóch aramas áwewe chék ren ekkewe tokter, kangof, me chón angangen pioing. Chómmóng me leir ra ló angang lupwen ekkewe chón afalafal ra ló chuuriir lón imwer.

USUN ÓM AMECHERESAALÓ NÓNNÓMUN MANAWOM

12. Met weween án mesom epwe “fat”?

12 Jesus a apasa: “Mas saramen ewe inis, usun chök eu lamp. Are mesom a fat, unusen inisum a saram.” (Mat. 6:22) Met weween alon na? Weween pwe a mochen ach sipwe achocho le ámecheresaaló nónnómun manawach are nefótófót wóón eú chék mettóch sipwe achocho ngeni nge sisap riki seni. Jesus pwisin a isetiw eú leenien áppirú ren an nefótófót wóón an angangen afalafal, me a áiti ngeni néún kewe chón káé ar repwe pwal nefótófót wóón ar angang ngeni Jiowa me an we Mwú. Sia áppirú Jesus ren ach akkomwa ach angangen Chón Kraist lón manawach, me ach  “kuttafichi lom an [Kot] mu o an pung.”​—Mat. 6:33, TF.

13. Met a tongeni álisikich le nefótófót wóón ach angangen Chón Kraist?

13 Eú alen ach sipwe nefótófót wóón ach angang ngeni Kot, ina ach ámecheresaaló nónnómun manawach pwe epwe lapóló ach fansoun le ákkálisi aramas le silei me tongei Jiowa. * Áwewe chék, sia tongeni ekkesiwili úkúkún ewe fansoun sia áeá lón ach angangen moni pwe epwe lapóló ach fansoun le afalafal lón weekday? Sia tongeni ekisikisaaló ach kewe minen kunou me apwapwa mi kan angei watteen ach fansoun?

14. Ikkefa ekkewe siwil eú pean pwúpwúlú ra féri pwe epwe lapóló ar fansoun afalafal?

14 Iei met emén mwán mi ásimaw itan Elias me pwúlúwan we ra féri. A apasa: “Ause tongeni mwittir poputá le pioneer, nge mi wor ekkóch mettóch aua tongeni féri ekis me ekis pwe aupwe alapaaló ám fansoun afalafal. Áwewe chék, aua ekisaaló ám moni towu, akúkkúnaló ám kewe minen apwapwa mi kon chómmóng me rem, me aua tingorei néúm kewe boss aupwe siwili ám schedule pwe epwe lapóló ám fansoun afalafal. Iwe mwirilóón, aua tongeni fiti afalafal lepwin, káé ngeni chómmóng aramas ewe Paipel, pwal mwo nge fiti afalafal weekday fán ruu iteiten maram. A ifa me apwapwaan ena!”

USUN ÓM ELIPWAKÉCHUK LÓN ÓM AFALAFALA ARAMAS ME ASUKULER

Ach akkapwénúetá met sia káé seni ach kewe mwich lón weekday epwe álisikich le feffeitá lón ach angangen afalafal (Ppii parakraf 15-16) *

15-16. Ifa usun sipwe tongeni lipwákéchúló lón ach angangen afalafal me ren 1 Timoty 4:13, 15? (Pwal ppii ewe pwóór itelapan “ Minne Upwe Achocho le Tikeri le Aunusaaló Ai Angang Ngeni Kot.”)

15 Pwal eú alen óm kopwe unusen apwénúetá wisom, ina ren óm achocho le lipwákéchúló  lón ewe angangen afalafal. A lamot ngeni ekkóch aramas ar repwe kan train lón eú pekin angang pwe epwe lapóló sileier me sipeéchúúr lón ena angang. A pwal ina usun ren ekkewe chón afalafal fán iten Mwúún Kot. Mi lamot sipwe kákkáé ifa usun sipwe lipwákéchúló lón ewe angangen afalafal.​—SalF. 1:5; álleani 1 Timoty 4:13, 15.

16 Iwe nge, ifa usun sipwe sópweló ach feffeitá lón ach angangen afalafal? Ren ach aúselingéch ngeni ekkewe kapasen fén sia kan angei lón ewe Manawach me Ach Angangen Afalafal Mwich iteiten wiik. Ena mwich a awora káit mi fókkun lamot epwe álisikich le lipwákéchúló lón ewe angangen afalafal. Áwewe chék, lupwen ewe mi wisen emmweni ewe sukul a fénéú ekkewe chón sukul, sia tongeni esilla ekkewe pesepes repwe tongeni pwisin álisikich lón ach angang. Iwe lón nan sia tongeni apwénúetá ekkena pesepes atun sia áiti ngeni emén ewe kapas allim. Sia tongeni tingor álillisin ewe chónemmweni kúmiin chón afalafal, are eisini ika sia tongeni angangfengen. Sia pwal tongeni mwin me emén chón afalafal mi ásimaw, emén pioneer are ewe chónemmwen mi wisen sáifetál. Lupwen sia silefichi áeáán eú me eú ekkewe minen álillis lón ewe Pwórun Asukul, iwe epwe lapóló ach pwapwaiti ach afalafala aramas me asukuler.

17. Met kopwe kúna lupwen ka unusen apwénúetá wisom lón óm angang ngeni Kot?

17 A ifa me feiéchúch pwe Jiowa a mut ngenikich ach sipwe “akkangangfengen me” i! (1 Kor. 3:9NW) Lupwen ka “filätä mine a fokun mürina” me nefótófót wóón óm angangen Chón Kraist, iwe kopwe “angang ngeni ewe Samol mi Lapalap fän pwapwa.” (Fil. 1:10; Kölf. 100:2) Pokiten en néún Kot chón angang, ka tongeni lúkúlúk pwe epwe apéchékkúlok le apwénúetá óm angang fán ese lifilifil weires ka tongeni kúna. (2 Kor. 4:1, 7; 6:4) Ka tongeni “pwapwa” lupwen ka féri ewe angang ren unusen letipom, ese lifilifil watteen are kisikisin ewe fansoun ka áeá le afalafal. (Kal. 6:4) Lupwen ka unusen apwénúetá óm angang ngeni Kot, ka pwári óm tongei I me tongei aramas. “Pun are kopwe föri iei usun, kopwe püsin amanauok me chokewe mi aüselingok.”​—1 Tim. 4:16.

KÉL 141 Kúttafichi Aramas mi Efich Kinamwe

^ par. 5 Jesus a fen allúkú ngenikich ach sipwe afalafala kapas allimen ewe Mwúún Kot me álisi aramas le wiliti néún chón káé. Ei lesen epwe pwóróus wóón ifa usun sipwe unusen apwénúetá wisach, inaamwo ika a wor chómmóng osukosuken manawach. Sipwe pwal káé ifa usun sipwe tongeni lipwákéchúló lón ach angangen afalafal me alapaaló ach pwapwa.

^ par. 4 ÁWEWEEN KAPAS: Ach angangen Chón Kraist a weneiti sókkopaten angang, áwewe chék ren ewe angangen afalafal me asukula aramas, kaútáán me túmúnún ekkewe leeni sia áeá lón ach fel ngeni Kot, me kaworen álillis atun feiengaw watte ren taifun, chchech me metakkan.​—2 Kor. 5:18, 19; 8:4.

^ par. 13 Ppii ekkewe fisu mettóch sia tongeni féri lón ewe pwóór itelapan “Ifa Usun Kopwe Ámecheresaaló Nónnómun Manawom?” lón Ewe Leenien Mas minen July 2016, p. 12.

^ par. 62 ÁWEWEEN SASING: Emén Chón Kraist fefin a pwomweni lón eú mwich lón weekday an chuursefáli emén. Mwirin, ewe mi wiseni emmweni ewe sukul a fénéú, me neminna a makkeetiw an na kapasen fén lón néún we Asukul puk. Mwirin, neminna a apwénúetá minne a káé lón ewe mwich lupwen a afalafal lón weekend.