Anchangei pwe itá ka nónnóm lón Kalilea atun án Jesus we nóm wóón fénúfan. Ka sáiló Jerusalem pwe kopwe fiti ewe Fetellapen Likachoch. A chómmóng chienom kewe chón fel ngeni Kot mi feito seni towau lón ewe telinimw. Ka mochen kopwe eáni eú asor ngeni Jiowa. Iwe, ka átekini emén siike atun óm poputá le feiló ngeni ewe imwenfel, nge ekkewe al mi chékúkkún me ur ren aramas. Lupwen ka war, a etieppach lón ewe imwenfel ren chókkewe mi pwal mochen eáni eú asor. Iwe a tori óm kopwele ngeni ekkewe souasor ewe siike. Nge lón chék ena atun, ka chemeni pwe pwiium we a chou ngonuk. Kese silei ia pwiium na a nóm ie lón ewe telinimw are lein ewe pwiin aramas. Jesus a áweweei met kopwe féri. (Álleani Mateus 5:24.) Ifa usun en me pwiium we oua tongeni kútta kinamwe usun met Jesus a eáni éúréúr? Lón ekkeei ruu list fan, kopwe esissilla menni a pwúng.

ITÁ KOPWE . . .

  • fós ngeni pwiium we ika chék ka ekieki pwe a wor lóngólóngun an chou ngonuk

  • sótun áwena ekiekin pwiium we ika ka meefi pwe a kon songokkái are ka meefi pwe pwal tipisin ewe osukosuk

  • aúseling ngeni pwiium we fán mosonottam atun an a uwawu meefian. Ika mwo kosap unusen weweiti met, nge kopwe enletin omusomus ren an a metek letipan are ren met féfférum a efisatá, inaamwo ika esap turun tipom

PWIIUM WE ITÁ EPWE . . .

  • kútta chón peni i ren an apwóróusa ngeni chón ewe mwichefel met ka tipis ngeni wóón

  • lal ngonuk, eppiietá meinisin tichikin met ka féri ngeni, me witi chék óm kopwe erá pwe tipisum

  • mirititi pwe ka pwári watteen tipetekison me tipepwora ren óm feiló ren me fós ngeni usun ewe osukosuk, me epwe enletin omusaaló tipisum seni lón letipan

Pwúngún pwe sise chúen eáni asor man lón ach fel ngeni Kot lón ei fansoun. Iwe nge, met Jesus a itá áiti ngenikich usun ewe riri lefilen ach kinamwefengen me pwiich me án Kot etiwa ach fel ngeni i?