1. ¿Kóne u yɨkʼí tɨ tsʼibkan ni Biblia?

Ni pitsil tʼan de ke a kɨ jela tɨ kuxlé u pete tiempu pan Kaʼb yaʼan tan Biblia (Salmo 37:29). Jimba libru yaʼan tʼo 66 chʼok librujob, ke u tsʼibijob ni 40 winikob, Dios u yaki kʼa unejob ajnijob fiel. Aj Moisés u tsʼibí najtɨkɨl jompʼe ni chʼok librujob, jan numí 3,500 jab te a tsʼibkijob i umpʼe chʼok libru ke yaʼan tu xupibá u tsʼibí ni apóstol aj Juan, jan numí 1,900 jab te a tsʼibkí. Dios u ɨbí ni aj tsʼibjunob de ni Biblia u espíritu santu ta u tsʼibɨnob lu ke Dios u yolí tsʼibkintik tan Biblia (2 Samuel 23:2). Jimba winikob da u tsʼibijob u kʼajalin Dios, i mach de unejob. Jinukʼa aj Jehová, u yɨkʼí tɨ tsʼibkan ni Biblia. Tsikí tɨ 2 Timoteo 3:16 i 2 Pedro 1:20, 21.

2. ¿Kokʼa puede kɨ chenla konfiá ke ni Biblia u yeleʼ tu tojá?

Kʼa ni Biblia u te de ni Dios. I toj chi ke kaini, kaʼ u yeleʼ lu ke u je tɨ te i kaini u nume, kosa ke mach u che podé u chen ni winikob (Josué 23:14). Une u chen podé u chen kaini, kʼa une yaʼan tʼo u pete poder i ni untú más. Tsikí tɨ Tito 1:2, 3.

Umpʼe libru ke u te de ni Dios, a kɨ pítɨnla ke mach ajnek kaʼ librujob ke yaʼan. En u kʼeʼnan millonob, a laj pujkí ni Biblia, en más de 450 tʼanob. Anke a tsʼibkí desde ojní, yaʼan kosa ke u yeleʼ kaʼchi ni ciencia. Ni 40 aj tsʼibjunob mach u yelíjob umpʼe kosa i de yai ke mach kaini. * Cheʼchi en kada jumpʼe de u página a kɨ chinenla u yajinlé ni Dios i bada chi yaʼan u poder ta u chen ke ni gente u walɨktan u chenob  kosajob ke mach uts tan u kuxlé. Jindajob u chen ke, u kʼeʼnan personajob u tsʼonɨnob ke ni Biblia u tʼan Dios. Tsikí tɨ 1 Tesalonicenses 2:13.

3. ¿Ka kosajob a kɨ kɨneʼla tan Biblia?

Ni Biblia u tsʼajkun ni pitsil kosajob ke u je u chen Dios ta u pete gentejob. U tsʼajkun ke jin kʼin te u tɨkʼí kuxlé ni winik pan Kaʼb u sɨtí umpʼe kosa ke u kʼeʼnan u valor, de kuxlik tan pitsil Kaʼb i u yeleʼ kacheʼda u je tɨ sujné ni pitsil Kaʼb da. Tsikí tɨ Apocalipsis 21:4, 5.

Tan u tʼan ni Dios yaʼan ni ley i tʼanob ke u yelbenonla kacheʼda kuxlíkonla ta ajnek chʼaja kɨ jinla. Cheʼchi u yelbenonla kacheʼda aj Jehová u chinen ni personajob, jinda u yelbenonla kacheʼda une. Ni Biblia u tɨklénonla kɨ chenla konocé. Cheʼchi u yeʼbenonla kacheʼda puede kɨ chen-kɨbala de u yamigu. Tsikí tɨ Romanos 15:4; Santiago 2:23 i 4:8.

4. ¿Kácheʼda puede kɨ chenla entendé ni Biblia?

Ta u chiktan lu ke u yeleʼ ni u tʼan Dios, aj Jesús u yelí ni versíkulujob i u chektesí. Jimba folletu da u yeʼeʼ kaʼ u chi aj Jesús ta u tɨklénonla kɨ chenla entendé uts u pete ni lu ke u yeʼeʼ ni Biblia. Tsikí tɨ Lucas 24:27, 45.

Kɨ kɨneʼla de ni pitsil tʼanob de ni Dios jin más uts ke untú puede u chen, peru yebé personajob mach yo u kɨneʼob de ni pitsil tʼanob, cheʼchi yebé u kɨrɨx-anob. Peru mach a wekʼeʼ ke jimba personajob u bɨkʼtesanet. Ni Biblia u yeleʼ, ke u pete ke yaʼanob u chen konocé ni Dios u je tɨ kuxlé u pete tiempu. Tsikí tɨ Juan 17:3.

 

^ párr. 3 Tsikí ni libru La Biblia... ¿la Palabra de Dios, o palabra del hombre?