1. ¿Kácheʼda u tɨkʼí ni xuxlé?

Tan ni tiempu ke Dios u ɨkʼí ni winikob u chen goberná a uti u chinkan ke mach puede u paʼsenob ni xuxlé

Ni xuxlé a ti pan Kaʼb jin kʼin ke aj Manap u yelí ni najtɨkɨl jopʼojtiʼ. Najtɨkɨ une ajní de untú ángel ke mach ajní tʼo xuxlé, peru «mach u chi tu toja, ukʼa mach tʼok u toja ayan (yaʼan)» (Juan 8:44). Aj Manap u tɨkʼí u yolín utik adorá, peru seʼ (seʼma) ni Dios debe utik adorá. Tʼo umpʼe jopʼojtiʼ, u jɨksbí u kʼajalin ij Eva, ni najtɨkɨl-ixík, ta u tsʼonben une i mach Dios. Aj Adán u chi kaʼ u itʼok i mach u tsʼonijob lu ke Dios u yelí. Al u chenob kaini, u tɨsijob kʼuxe i ni chɨmó. Tsikí tɨ Romanos 5:19 i 2 Corintios 11:3.

Al u yelbén ij Eva ke mach u tsʼonben lu ke u yelí Dios, aj Manap u tɨkʼí u sutun-uba tʼo Dios, kaini u yelí ke aj Jehová mach debe u chen goberná. Kʼa u kʼeʼnan gente u michʼeʼ-uba tʼo ni aj Manap, al mach u yolínob u gobiernu ni Dios «u pete yaʼan tu kʼɨb tsuk pixan (aj Manap)». Tsikí tɨ Juan 14:30 i 1 Juan 5:19.

2. ¿Mach ajní uts lu ke u pɨtí aj Jehová?

U pete lu ke u pɨtí aj Jehová, uts u pɨtí. Ni najtɨkɨl personajob i ni ángelob u chijob podé u tsʼonbenob ni Dios en u pete kosa (Deuteronomio 32:4, 5). Une u ɨbénonla kɨ chenla decidí si ke chenla jin uts o jin mach uts. Si a kɨ yajinla ni Dios a kɨ chenla demostrá al ke chenla lu ke jin uts. Tsikí tɨ Santiago 1:13-15 i 1 Juan 5:3.

3. ¿Kokʼa u chen permití Dios ni kʼuxe?

Aj Jehová u chen permití tsʼitaʼ tiempu ke ɨlbintik ke une mach debe u chen goberná. ¿Kokʼa? Ta u chen demostrá ke niʼ untú gobiernu ke une mach u tɨkle, mach puede u chen beneficiá ni gente (Eclesiastés 7:29; 8:9). Jan numí 6,000  jab, tu tojá a kɨleʼla: ke ni gobiernu de ni winikob mach u chejob podé u paʼsenob u pete kosa ke mach taj toj an, kaʼ ni guerra, ni xuchʼ, ni tsɨmsá i ni yajob. Tsikí tɨ Romanos 9:17.

Si a kɨ kʼe-kɨbala u chénonla goberná ni Dios a kɨ je kɨ chen-kɨbala beneficiá (Isaías 48:17, 18). Tsʼitaʼ yo, ta u paʼsen aj Jehová u pete ni gobiernu de ni winikob. Seʼ (seʼma) u je te kuxlejob pan Kaʼb ni personajob ke yaʼan de parte de u gobiernu ni Dios (Isaías 11:9). Tsikí tɨ Apocalipsis 11:15.

4. ¿Ka puede kɨ chenla demostrá, kʼa ni aj Jehová u chi permití ke numik ni tiempu?

Aj Manap u yelí ke seʼ (seʼma) a kɨ tsʼonbenla ni Dios kʼa une u ɨbénonla u pete kosa. Kʼa ni aj Jehová u chen permití ke numik ni tiempu, u pete puede kɨ chenla demostrá tʼo kɨ kuxlela ke ni aj Manap untú aj jopʼojtiʼ i ke yaʼanonla de parte de u gobiernu ni Dios i mach de ni winikob. Tsikí tɨ 2 Pedro 3:9 i Apocalipsis 12:10.

5. ¿Kácheʼda puede ajnékonla de parte de u gobiernu ni Dios?

Tʼo lu ke a kɨ chenla a kɨ chenla demostrá si kolbala o mach ke ni Dios u chénonla goberná

Najtɨkɨ, debe kɨ kɨneʼla kacheʼda yo Dios utik adorá i kɨ chenla kaini, jinda u kɨnkan tan Biblia (Juan 4:23). Si kɨ chenla kaʼ aj Jesús de mach kɨ jupʼe-kɨbala tan polítika i niʼ tan guerras, kaini a kɨ chenla demostrá ke mach kolinla u gobiernu aj Manap. Tsikí tɨ Juan 17:14.

Aj Manap yo ke ni gente u chen lu ke mach uts i cheʼchi chʼalikob tʼo ni ke mach jin u itʼok. Si mach kɨ chenla kaini, puede ke ni kɨ amigula i kɨ familiarla u tseʼtanonla i u chen ke ni kɨ kuxlela ajnek tʼo kʼuxe (1 Pedro 4:3, 4). Si kaini u chen pasá, puede a yakɨn si a je a tsʼonben u tʼan jin ke u tseʼtanonla o a kɨ jela kɨ sakɨnla ni ke lotla ke u yajin ni Dios i kɨ tsʼonɨnla ni ley ke yaʼan tan Biblia. Kaini, a kɨ jela kɨ pʼalbenla aj Manap ke une aj jopʼojtiʼ, al u yeleʼ ke niʼ untú mach u je u tsʼonben Dios si kɨ numsenla kʼuxe. Tsikí tɨ 1 Corintios 6:9, 10 i 15:33.

Kʼa ni Dios u yajin ni gente, kuyila ke u je u paʼsen ni kʼuxe i ni xuxlé. U pete lu ke u chenob demostrá u fe al ajnek de parte de u gobiernu ni Dios u je tɨ kuxlé u pete tiempu pan Kaʼb. Tsikí tɨ Juan 3:16.