Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

Warwick Photo Gallery 3 (Enero Hangtod sa Abril 2015)

Warwick Photo Gallery 3 (Enero Hangtod sa Abril 2015)

Atong makita niini nga photo gallery ang kaugmaran sa trabaho didto sa bag-ong headquarters sa mga Saksi ni Jehova gikan sa Enero hangtod sa Abril 2015.

Drowing sa nahuman nang Warwick complex. Clockwise gikan sa ibabaw nga wala:

  1. Vehicle Maintenance Building

  2. Visitor Parking

  3. Maintenance Building/Resident Parking

  4. Residence B

  5. Residence D

  6. Residence C

  7. Residence A

  8. Offices/Services Building

Enero 2, 2015—Vehicle Maintenance Building

Si Harold Corkern, katabang sa Publishing Committee sa Governing Body, nagpakigpulong sa ulohang “Living Up to Your Potential,” nga binase sa Kasulatan. Ang mga mamumulong regular nga mobisita sa Warwick sa pagdasig sa mga boluntaryo.

Enero 14, 2015—Offices/Services Building

Ang puting plastik nga trapal makahatag ug proteksiyon sa mga nagtrabaho ug dako kining tabang nga makapadayon sa pagtrabaho panahon sa tingtugnaw. Dinhi niini nga seksiyon sa bilding ang kan-anan, infirmary, kosina, ug labhanan.

Enero 16, 2015—Residence D

Mga elektrisyan nagtaod sa mga kable sa koryente. Kapig 12,000 ka metros nga kable ang nataod diha sa mga puy-anang bilding. Gisugdan dayon pagplastar ang mga kable sa koryente dihang napalit ang lote sa Warwick ug magpadayon ang pagpanaod niini hangtod mahuman ang proyekto.

Enero 16, 2015—Residence A

Boluntaryo nagpapilit ug duct tape sa balkonahe para maandam kini sa waterproofing. Ang mga balkonahe sa kinatas-ang andana butangag polymethyl methacrylate (PMMA)—haklap nga dili suphog tubig ug dali rang itaod ingong likido.

Enero 23, 2015—Residence A

Mga elektrisyan nga amahan ug anak nagtaod ug mga wire sa koryente para sa mga puy-anang bilding.

Pebrero 6, 2015—Vehicle Maintenance Building

Gutom nga mga boluntaryo naniudto sa temporaryong kan-anan. Kada adlaw, kapig 2,000 ka paniudto ang itagana.

Pebrero 12, 2015—Maintenance Building/Resident Parking

Mga boluntaryo nagtaod ug mga kabilya para sa basement sa maintenance shop.

Pebrero 12, 2015—Residence C

Mga sulat sa mga bata, nga nagpahayag sa ilang apresasyon sa mga nagtrabaho sa konstruksiyon. Daghang boluntaryo ang magpabilin ug pipila lang ka adlaw. Gani, mga 500 ka bag-ong boluntaryo ang mangabot kada semana. Sa Pebrero, mga 2,500 ka boluntaryo ang nangabot kada adlaw sa proyekto sa Warwick.

Pebrero 24, 2015—Warwick site

Mga 60 porsiyento na ang nahuman sa proyekto. Sukad sa Enero hangtod sa Abril 2015, nahuman na ang dagkong estruktura sa mga puy-anang bilding ug sa Offices/Services Building. Nianang panahona, ang mga nagtrabaho nagtaod usab sa sementong mga bungbong sa Maintenance Building, naghimog mga tulay nga nagkonektar sa mga puy-anan, ug nag-ayo sa dam sa Sterling Forest Lake (Blue Lake).

Pebrero 25, 2015—Offices/Services Building

Hulagway nga kuha gikan sa ubos sa stair tower. Mga kontraktor sa gawas ang nagplastar sa mga porma niining lima ka andanang torre, ug boluntaryong mga Saksi ang nagbuhos sa semento.

Pebrero 26, 2015—Maintenance Building/Resident Parking

Bisan sa tugnaw nga adlaw, ang mga boluntaryo nagtaod ug mga kabilya para sa unang andana. Halos 127 sentimetros ka baga nga snow ang mitabon sa Warwick gikan sa Enero hangtod sa Marso. Kanunay kining gipala sa mga boluntaryo, ug may init nga mga kuwarto nga kaadtoan sa mga nagtrabaho.

Marso 12, 2015—Visitor Parking

Gitaod ang metal nga atop diha sa human-daang mga parulos. Sa hinapos sa Abril, halos mahuman o mataod na ang tanan sa pormag trianggulo nga atop sa mga puy-anang bilding. Ang kataposang mga atop mataod na sa Residence B sa tungatunga sa Hunyo.

Marso 18, 2015—Maintenance Building/Resident Parking

Hulagway nga kuha gikan sa tower crane, nga naglantaw sa Residence B.

Marso 18, 2015—Maintenance Building/Resident Parking

Mga plumber nagsusi sa mga drowing sa Resident Parking Garage. Kapig 3,400 nga aprobadong mga drowing sa konstruksiyon ang gikinahanglan sa tibuok proyekto.

Marso 23, 2015—Offices/Services Building

Kuha gikan sa boom sa crane, ang mga trabahante nagtaod sa plastik nga trapal aron maproteksiyonan ang bilding. Daghang programa sa pagbansay ang gihimo aron maseguro nga malayo sa peligro ang mga operitor sa mga crane ug uban pang makinarya. Lakip sa hisgotan sa mga safety classes maoy bahin sa boom lifts, scissor lifts, fall protection, general orientation, respirator use, ug rigging/signaling.

Marso 30, 2015—Warwick site

Hulagway nga nagtan-aw sa mga puy-anang bilding sa direksiyon sa kasadpan. Sa kataposan sa Abril, dagkong trabaho sa mechanical ug electrical systems ang ginahimo sa Residence A, B, ug D, sama sa gipakita niini nga hulagway. Sa Residence C (dili makita niini nga hulagway), gisugdan na ang pagtaod sa mga bungbong (drywall), tiles, ug pagpintura.

Abril 15, 2015—Residence B

Duha ka trabahante sakay sa boom lift nag-aplay ug vapor-permeable air barrier sa panggawas nga bahin sa bungbong. Mga duha ka bulan ang pag-aplay niini sa matag puy-anang bilding.

Abril 27, 2015—Offices/Services Building

Mga mason nagpalitada sa bungbong nga gihaklapag granite. Dinhi niini nga seksiyon sa bilding ang receiving dock ug uban pang support services.

Abril 30, 2015—Warwick site

Pinaagig sinuholang diver o tigsalom sa Blue Lake, gipulihag bag-o ang karaang balbula. Sa pagpindot lang sa buton, mous-os ang lebel sa tubig sa lanaw aron dili mobaha kon magbagyo.

Pagkat-og Dugang

Sila Kinabubut-ong Nagtanyag sa Ilang Kaugalingon—Sa New York

Nganong ang usa ka magtiayon nga hamugaway ug kinabuhi mibiya sa ilang gipangandoyng balay ug mibalhin sa gamayng apartment?