Laktaw ngadto sa video

Laktaw ngadto sa secondary menu

Mga Saksi ni Jehova

Cebuano

Kon Giunsa Pagkuhag mga Letrato nga Mohaom sa Artikulo

Kon Giunsa Pagkuhag mga Letrato nga Mohaom sa Artikulo

Sa unsang paagi ang among mga photographer nagkuhag mga letrato nga makapanindot sa among mga publikasyon, nga mohaom sa artikulo? Sa pag-ilustrar sa trabahong nalangkit niini, atong hisgotan ang kon sa unsang paagi gidisenyo ug giletratohan ang hapin sa Septiyembre 2015 nga Awake! *

  • Disenyo. Human mabasa ang artikulong “Balanseng Panglantaw sa Kuwarta,” ang mga designer sa Art Department, nga tua sa Watchtower Educational Center sa Patterson, New York, naghimog mga drowing sa pag-ilustrar sa artikulo. Dayon gipakita nila kini nga mga drowing ngadto sa Writing Committee sa Nagamandong Lawas, nga maoy magpili sa ideya nga letratohan.

  • Lokasyon. Dili tinud-anayng bangko ang letratohan. Gigamit nila ang usa sa mga lobby sa Watchtower Educational Center nga bangko kunohay. *

  • Modelo. Ang tanang modelo maoy mga Saksi ni Jehova. Sila gipili nga susama sa kasagarang kliyente sa bangko sa siyudad. Maghipos ug rekord sa mga modelo aron dili sila pirmeng magamit sa among mga publikasyon.

  • Props. Ang Art Department mogamit ug kuwarta sa laing nasod aron ang ipakita nga bangko dili gikan sa Amerika. Mogamit usab ang photography team ug props aron ang esena morag tinuod gyong tan-awon. “Wala gyod mi managhap,” matod sa usa ka photographer nga ginganlag Craig.

  • Sinina ug makeup. Para sa pagletrato diha sa bangko, ang mga modelo magdalag kaugalingong mga sinina. Apan kon para sa karaang mga esena nga nagkinahanglag espesyal nga mga sinina, ang Art Department mag-research una ug maghimog haom nga mga sinina. Mek-apan ang mga modelo nga motakdo sa esena sa karaang panahon nga letratohan. “Tungod kay high-resolution photography na ang gigamit karon,” matod ni Craig, “kinahanglang sakto gyod ang among letratohan. Bisag gamay ra ang sipyat, madaot na ang letrato.”

  • Pagletrato. Kon esena sa bangko ang letratohan, paneguroon sa mga photographer nga adlawan ang esena. Sa matag photo session, kinahanglang susihon sa mga photographer nga tukma ang lighting (nga magpakita sa kahayag sa adlaw, bulan, o artipisyal nga kahayag), nga mohaom sa kahayag nga makita daan sa esena, ug haom sab sa diwa sa esena. “Lahi sa video,” matod ni Craig, “usa lang ka letrato ang magpakita sa diwa sa esena, busa importante kaayo ang lighting o kahayag.”

  • Pag-edit. Sa ulahi, pahanapon sa mga tig-edit sa letrato ang kuwarta nga gigamit aron masentro ang pagtagad sa magbabasa ngadto sa mga tawo diha sa letrato imbes sa gigikanan sa kuwarta. Bisag sa aktuwal pula ang kolor sa pultahan ug bentana, mahimo kining ilisan sa mga tig-edit ug berde aron mohaom sa katibuk-ang kolor sa magasin.

Gawas pa pagletrato nga gihimo didto sa Patterson, ang mga sangang buhatan sa tibuok kalibotan—sama sa Australia, Brazil, Canada, Germany, Japan, Korea, Malawi, Mexico, ug South Africa—may mga photographer usab nga mahimong pakuhaon ug mga letrato para sa among mga publikasyon. Matag bulan, ang Art Department sa Patterson makahipos ug mga 2,500 ka letrato ngadto sa ilang database. Daghan sa maong mga letrato gigamit diha sa mga magasing Bantayanang Torre ug Pagmata!, nga sa 2015 dunay katibuk-ang sirkulasyon sa pag-imprenta nga kapig 115 ka milyong kopya kada isyu. Gidasig ka namo sa pag-tour sa among pasilidad sa Patterson, New York, o sa among mga sangang buhatan sa tibuok kalibotan para sa imong dugang kasayoran.

Nagtanyag sa magasin

^ par. 2 Daghang letrato ang gikuha aron kapilian para sa hapin nga gamiton sa ulahi. Apan ang uban sa maong mga letrato idugang sa image library ug sa ulahi gamiton para sa ubang proyekto.

^ par. 4 Kon ang letratohan maoy usa ka dalan diha sa siyudad, ang Art Department sagad magkuhag permiso gikan sa mga awtoridad, nga magtino sa gidaghanon sa mga tawo nga malangkit, mga gamit nga gikinahanglan, ug ang matang sa lighting nga gamiton sa pagletrato.

Pagkat-og Dugang

KINSAY NAGABUHAT SA KABUBUT-ON NI JEHOVA KARON?

Unsa ang Bethel?

Ang Bethel maoy usa ka espesyal nga dapit nga may hinungdanon kaayong katuyoan. Unsay mga kalihokan dinhi?

KINSAY NAGABUHAT SA KABUBUT-ON NI JEHOVA KARON?

Sa Unsang Paagi Gisulat ug Gihubad ang Literatura sa mga Saksi ni Jehova?

Kami nagpatik ug literatura sa kapig 600 ka pinulongan. Nganong naghago mi sa paghimo niini?