Kapig 10,000 kilometros (6,200 mi) gikan sa Philippines​—ang pinuy-anan sa mga Tagalog​—linibo ka Saksi ni Jehova nga nagsultig Tagalog ang nagkatigom sa Rome, Italy, para sa talagsaong kombensiyon nga gihimo niadtong Hulyo 24-​26, 2015.

Gibanabana nga kapig 850,000 ka Filipino ang nagpuyo karon sa Europe. Tungod niini, mga 60 ka kongregasyon ug mga grupo sa mga Saksi ni Jehova sa Europe ang nagtigom sa Tagalog ug nagsangyaw ngadto sa mga Filipino sa ilang lugar.

Apan sa kombensiyon sa Rome, kining tanang kongregasyon ug mga grupo nagkatigom sa unang higayon para sa tulo ka adlaw nga kombensiyon sa ilang pinulongan. Ang nanambong nga 3,239 nalipay gayod nga si Brader Mark Sanderson, membro sa Nagamandong Lawas sa mga Saksi ni Jehova kinsa nag-alagad kanhi sa Philippines, ang mihatag sa kataposang pakigpulong kada adlaw.

“Natandog Gyod ang Akong Kasingkasing”

Unsay kalainan sa pagtambong ug kombensiyon sa lumad nga pinulongan o sa ikaduhang pinulongan? “Makasabot kog English pero gamay ra,” matod ni Eva nga nag-inusarang inahan, “pero kay Tagalog man ni nga kombensiyon, natandog gyod ang akong kasingkasing sa mga pagtulon-an sa Bibliya.” Aron makatigom ug kuwarta gikan sa iyang gipuy-an sa Spain ngadto sa Italy, nakadesisyon siya ug ang duha niya ka anak nga dili mangaon sa gawas kada semana, nga maoy ilang naandam, pero kas-a na lang sa usa ka bulan. Si Eva miingon: “Wa gyod ko magmahay sa maong sakripisyo kay nasabtan gyod nako tanan niini nga kombensiyon!”

Si Jasmin, nga nagpuyo sa Germany, mihangyong mobakasyon aron motambong sa kombensiyon. “Pero sa hapit na kong mobiya,” matod niya, “giingnan kong dili pabakasyonon kay dunay trabahoon. Nagpabilin lang kong kalma, miampo kang Jehova, ug miduol sa akong boss. Amo rang napangitaag paagi ang among trabaho aron makatambong ko sa kombensiyon! Talagsaon gyong kahigayonan nga makauban ang isigka-Filipino nga mga igsoon sa tibuok Europe.”

Siyempre, daghang Filipino sa Europe ang gimingaw dili lang sa yutang natawhan kondili sa ilang mga higala usab nga namuyo na sa ubang bahin sa Europe. Kini nga kombensiyon nakatabang sa daghan niining mga managhigala nga magkauban pag-usab ingong mga managsoon sa pagtuo. (Mateo 12:48-​50) Si Fabrice miingon, “Nalipay kaayo kong nakakita sa akong mga kaila!” Pagkahuman sa kombensiyon, usa ka sister pirmeng miingon, “Usa ni ka dakong reunion sa pamilya!”