Oo. Ang usa makahimo sa pag-undang sa among organisasyon sa duha ka paagi:

  • Pinaagig pormal nga hangyo. Siya mahimong makig-estorya o mosulat nga dili na siya gustong mahimong Saksi ni Jehova.

  • Pinaagi sa buhat. Tingali siya makahimog butang nga makapahilayo kaniya sa among tibuok kalibotang organisasyon. (1 Pedro 5:9) Pananglitan, tingali moanib siyag laing relihiyon ug magpahibalo nga dili na siya gustong mahimong Saksi ni Jehova.—1 Juan 2:19.

Komosta kon ang usa wala na magsangyaw o magtambongan sa inyong mga tigom? Isipon ba ninyo nga siya miundang na sa pagka-Saksi?

Dili. Ang pag-undang, o pag-disassociate sa kaugalingon, lahi gikan sa pagkaluya sa pagtuo. Kasagaran, kadtong naluya o mihunong na sa pag-alagad wala mobiya sa ilang pagtuo kondili nawad-an lang ug kadasig. Imbes likayan, kami maningkamot gyod sa paghupay ug pagtabang kanila. (1 Tesalonica 5:14; Judas 22) Kon siya nagkinahanglag tabang, ang mga ansiyano, o elder, sa kongregasyon manguna sa paghatag ug espirituwal nga tabang.—Galacia 6:1; 1 Pedro 5:1-3.

Pero ang mga ansiyano walay katungod sa pagpamugos sa usa sa pagpabiling Saksi ni Jehova. Ang matag usa makahimog kaugalingong desisyon bahin sa relihiyon. (Josue 24:15) Kami nagtuo nga kinahanglang kinasingkasing ang atong pagsimba sa Diyos.—Salmo 110:3; Mateo 22:37.