Laktaw ngadto sa video

Unsay Panghunahuna sa mga Saksi ni Jehova Bahin sa Diborsiyo?

Unsay Panghunahuna sa mga Saksi ni Jehova Bahin sa Diborsiyo?

Among gisunod ang prinsipyo sa Bibliya bahin sa kaminyoon ug diborsiyo. Katuyoan sa Diyos nga ang kaminyoon mahimong permanenteng panag-uban sa usa ka lalaki ug usa ka babaye. Usa lang ka basehan sa diborsiyo ang gitugot sa Bibliya. Kana mao ang seksuwal nga imoralidad.​—Mateo 19:5, 6, 9.

Motabang ba ang mga Saksi niadtong problemadog kaminyoon?

Oo, sa pipila ka paagi:

  • Mga publikasyon. Regular ning maghisgot ug mga artikulo nga makatabang sa pagpalig-on sa kaminyoon, bisan niadtong kaminyoon nga daw kabungkagon na. Pananglitan, tan-awa ang mga artikulo nga “Magmaunongon sa Imong Kaminyoon,” “Kon Unsay Himoon Aron Ikaw Makapasaylo,” ug “Pagpasig-uli sa Pagsalig Diha sa Kaminyoon.”

  • Mga tigom. Among ginahisgotan ang praktikal nga mga tambag sa Bibliya bahin sa kaminyoon panahon sa mga tigom sa kongregasyon, asembliya, ug kombensiyon.

  • Mga ansiyano. Ginatabangan sa mga ansiyano sa kongregasyon ang mga magtiayon. Ilang pahinumdoman sila sa mga teksto sama sa Efeso 5:22-25.

Kinahanglan ba ang aprobal sa mga ansiyano kon may Saksi nga makigdiborsiyo?

Dili. Bisan pag ang mga ansiyano motabang sa mga magtiayon nga dunay problema sa kaminyoon, wala silay katungod nga but-an ang magtiayon sa ilang himoon. (Galacia 6:5) Pero kadtong makigdiborsiyo nga walay Kasulatanhong basehanan dili mahatagan ug mga pribilehiyo sa kongregasyon. Ug base sa Kasulatan, wala siyay kagawasan nga magminyo pag-usab.​—1 Timoteo 3:1, 5, 12.

Unsay panghunahuna sa mga Saksi bahin sa panagbulag?

Ang Bibliya nagdasig sa mga magtiayon nga dili magbulag bisan pag makasinatig mga problema. (1 Corinto 7:10-16) Kasagaran sa mga problema masulbad ra kon sinserong mag-ampo, magpadapat sa mga prinsipyo sa Bibliya, ug magpakitag gugma.​—1 Corinto 13:4-8; Galacia 5:22.

Pero sa grabeng mga kahimtang, sama sa gihisgotan sa ubos, ang ubang Kristohanon midesisyon nga makigbulag sa ilang bana o asawa:

  • Tinuyo nga dili pagsustento sa pamilya.​—1 Timoteo 5:8.

  • Grabeng pisikal nga pagdagmal.​—Salmo 11:5.

  • Grabeng pagpameligro sa espirituwalidad. Pananglitan, kon ang bana o asawa gipugos sa iyang partner nga supakon ang mga sugo sa Diyos, tingali modesisyon siya nga makigbulag ingong bugtong paagi aron “sugton ang Diyos ingong magmamando inay ang mga tawo.”​—Buhat 5:29.