Di pa dugay nga nahuman sa mga Saksi ni Jehova ang unom ka tuig nga proyekto sa pagpadako sa mga pasilidad sa Watchtower Farms didto sa Wallkill, New York. Samtang nagkapaspas ang pagpanukod sa kataposang duha ka tuig sa konstruksiyon, gikinahanglan ang dugang nga kapuy-an sa mga boluntaryo. Busa, 25 ka balay nga duol sa maong pasilidad ang giabangan.

Ang mga Nangabang

Unsa kahay gibati sa mga tag-iyag balay bahin sa pagpaabang ngadto sa mga Saksi ni Jehova?

• “Nalipay kaayo mi sa nangabang sa among balay,” misulat ang usa ka tag-iya. “Diha ra mi nagpuyo sa akong bana duol sa gipaabangang balay, ug kanunay namong mabatyagan nga sila nagtinabangay ug mahigalaon.”

• Ang laing tag-iya, nga diha ra sab nagpuyo duol sa balay nga gipaabangan, misulat bahin sa mga nangabang: “Maayo tanan ang among kasinatian bahin nila. Dunay gamayng swimming pool sa luyo sa among balay nga kanunayng kaligoan sa batan-ong mga lalaki dihang imbitahon namo sila. Kon mangaligo sila, buotan kaayo sila ug matinahoron. Nalipay kaayo ming nakauban sila ug mingawon gyod mi nila.” Siya midugang: “Kini ang among kinamaayohang kasinatian.”

• Matod sa usa pa ka tag-iya: “Maayo gyod nga ang mga namuyo dinhi dili lang kay basta nangabang kondili mga buotang silingan sab.”

Ang mga Propidad

Unsa kahay hunahuna sa mga tag-iya bahin sa kondisyon sa ilang gipaabangang mga balay paghawa sa mga nangabang?

• “Wa gyod maulahi ang bayad sa abang, ug limpiyo, maayog kondisyon ang balay sa ilang pagbiya.”

• “Salamat ninyo ug sa tibuok organisasyon sa Watchtower sa pag-atiman sa among balay,” matod sa usa sa mga tag-iyag balay nga gikutlo ganina, ug midugang pa siya nga wa siya magdahom nga kon manglimpiyo ang mga Saksi, “limpiyo gyod kaayo.”

• Matod sa usa ka babaye: “Misalig mi sa inyong organisasyon, busa wa mi mangayog security deposit. Ang among mga gipaabangan gibalik sa amoa nga maayo kaayog kondisyon.”

• “Kon duna koy ipatrabaho, unsaon nako pag-hire sa inyong mga tawo?” Kini ang pangutana sa usa ka tag-iyag balay human trabahoa sa mga Saksi ang gamayng ayohonon sa iyang balay. “Kon mosaad gani mong motrabaho nianang adlawa, di gyod mo maulahi. Lahi kaayo mo sa akong mga trabahante nga di motuman sa ilang saad.”

Kataposang mga Komento

• Bisag wala pa mo-expire ang usa ka giabangang balay, ang tag-iya misulat nga kon i-renew sa mga Saksi ang ilang kontrata, kunhoran niyag dako ang abang.

• Ang laing tag-iya miingon: “Kon may lain pang kahigayonan, magpaabang gihapon mi sa Watchtower.”