Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NUM. 1 2017

 PANGUNANG TOPIKO | DAGHAN KAG MAKAT-ONAN SA PAGBASAG BIBLIYA

Nganong Basahon ang Bibliya?

Nganong Basahon ang Bibliya?

“Abi nakog lisod sabton ang Bibliya.”—Jovy

“Abi nakog makalaay kining basahon.”—Queennie

“Inigkakita nako kon unsa ka baga ang Bibliya, mawad-an kog gana pagbasa.”—Ezekiel

Nagplano ka ba sa pagbasag Bibliya pero wala ka modayon kay sama ka nianang gihisgotan sa ibabaw? Para sa kadaghanan, ang pagbasag Bibliya sagubangonon kaayo. Apan unsa kon imong mahibaloan nga ang Bibliya makatabang aron ang imong kinabuhi mahimong mas malipayon? Ug komosta kon duna diay mga paagi sa pagbasa niana nga makapalingaw? Andam ka bang mosusi kon unsay ikahatag sa Bibliya kanimo?

Tagda ang giingon niadtong nakaamgo nga mapuslanon diay kaayo ang pagbasag Bibliya.

Si Ezekiel, nga mga 20 anyos, miingon: “Kaniadto, mora kog nagdrayb ug sakyanan nga walay nahunahunaang destinasyon. Pero tungod sa pagbasag Bibliya, ang akong kinabuhi karon duna nay katuyoan. Ang mga tambag niini praktikal nga akong magamit adlaw-adlaw.”

Si Frieda, nga mga 20 anyos pod, miingon: “Kaniadto, dali kong masuko. Pero tungod sa akong pagbasag Bibliya, nakakat-on ko sa pagkontrolar sa akong kaugalingon. Busa dali na ko nga ikasabot, ug mas daghan na kog higala.”

Si Eunice, nga mga 50 anyos, miingon bahin sa Bibliya, “Kini nakatabang nako sa pagkahimong mas maayong tawo, sa pagbag-o sa akong ngil-ad nga batasan.”

Sama sa nakita niining maong mga magbabasa ug sa minilyon pang uban, ang pagbasag Bibliya makatabang aron makabaton kag mas malipayong kinabuhi. (Isaias 48:17, 18) Lakip sa ubang mga butang, kini makatabang nimo sa (1) paghimog maayong mga desisyon, (2) pagpangitag maayong mga higala, (3) pagsagubang sa tensiyon, ug (4) labaw sa tanan, pagkat-on sa kamatuoran bahin sa Diyos. Ang mga tambag sa Bibliya gikan sa Diyos, busa dili gyod ka madaot kon sundon nimo kana. Ang Diyos dili mohatag ug daotang tambag.

Ang importante nga makasugod ka pagbasa. Unsang praktikal nga mga sugyot ang makatabang aron madasig ka pagbasa ug malingaw?