Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NOBYEMBRE 2015

 PANGUNANG TOPIKO

Unsay Panglantaw sa Diyos Bahin sa Gubat?

Unsay Panglantaw sa Diyos Bahin sa Gubat?

Unsay imong tubag nianang pangutanaha? Daghan ang nagtuo nga ang gubat giuyonan sa Diyos. Mangatarongan sila nga kaniadto gisugo sa Diyos ang uban niyang magsisimba sa pagpakiggubat ug mabasa kana sa Bibliya. Apan nakita sa uban nga si Jesus, ang Anak sa Diyos, nagtudlo sa iyang mga sumusunod nga higugmaon ang ilang mga kaaway. (Mateo 5:43, 44) Busa para nila, nausab ang panglantaw sa Diyos bahin sa gubat ug karon wala na niya kini uyoni.

Unsay imong hunahuna? Giuyonan ba sa Diyos ang gubat? Kon mao, kinsay iyang gidapigan karon? Ang pagpangita sa tubag niining mga pangutanaha makaapektar sa imong panglantaw sa gubat. Pananglitan, kon mahibalo ka nga giuyonan sa Diyos ang gubat ug ang imong gidapigan mao sab ang iyang gisuportahan, lagmit mobati kang husto ang imong gibarogan ug masaligon ka nga modaog ang imong gidapigan. Sa laing bahin, unsay imong bation kon masayran nimo nga ang gisuportahan sa Diyos mao ang kaaway nga grupo? Lagmit timbangtimbangon nimo ang imong baroganan.

Duna pay angayng hunahunaon nga mas importante. Ang pagkahibalo kon giunsa pag-isip sa Diyos ang gubat makaapektar sa imong panglantaw kaniya. Kon usa ka sa minilyon nga naapektohan pag-ayo sa gubat, gikinahanglan gyod nimong masayran ang tubag niini: Ang Diyos ba tigpasiugdag gubat, sumala sa gituohan sa uban, ug nagtugot o nagpahinabo pa gani sa pag-antos nga nalangkit niini, o siya ba walay pagpakabana sa mga dinaogdaog?

Tingali masorpresa ka nga lahi ra kaayo ang tubag sa Bibliya kon itandi niana nga mga opinyon. Dugang pa, sukad kaniadto hangtod karon, wala mausab ang panglantaw sa Diyos bahin sa gubat. Tagdon nato ang giingon sa Bibliya kon unsay hunahuna sa Diyos bahin sa gubat sa karaang panahon ug sa unang siglo, dihang si Jesus dinhi pa sa yuta. Kana makatabang nato nga masayran kon giunsa pag-isip sa Diyos ang mga gubat karon ug kon may gubat pa ba sa umaabot.