Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NOBYEMBRE 2015

Nahibalo Ka Ba?

Nahibalo Ka Ba?

Nganong namalbas man si Jose una miatubang kang Paraon?

Karaang dibuho sa usa ka barbero sa Ehipto

Sumala sa asoy sa Genesis, gimando ni Paraon nga dalhon dayon kaniya ang Hebreohanong piniriso nga si Jose aron hubaron ang iyang makapahasol nga damgo. Niining higayona, daghang tuig na nga napriso si Jose. Bisan pag dinalian ang sugo ni Paraon, namalbas gyod si Jose. (Genesis 39:20-23; 41:1, 14) Kay gihisgotan man kining detalyeha bisag daw dili importante, nagpasabot kini nga sinati ang magsusulat sa kostumbre sa mga Ehiptohanon.

Sa daghang nasod kaniadto, normal lang ang pagpataas ug bungot, lakip na sa mga Hebreohanon. Sa kasukwahi, “ang mga Ehiptohanon kaniadto mao lamang ang nasod sa Sidlakan nga dili magpatubog bungot,” nag-ingon ang Cyclopedia of Biblical, Theological, and Ecclesiastical Literature ni McClintock ug Strong.

Bungot lang bay balbasan? Matod sa magasing Biblical Archaeology Review, dunay mga seremonyas sa Ehipto diin ang lalaki nga moatubang kang Paraon kinahanglang mangandam sa samang paagi dihang mosulod siya sa templo. Sa ingon, kinahanglang balbasan o kagisan ni Jose ang tanang buhok sa iyang ulo ug lawas.

Sumala sa asoy sa Mga Buhat, usa ka Grego ang amahan ni Timoteo. Nagpasabot ba nga gikan siya sa Gresya?

Wala. Sa iyang mga sinulat, usahay gitandi ni apostol Pablo ang mga Hudiyo sa mga Grego, o mga Hellen, diin ang mga Grego daw nagtumong sa tanang dili Hudiyo. (Roma 1:16; 10:12) Way duhaduha nga ang usa sa mga rason niini mao ang pagkaylap sa Gregong pinulongan ug kultura sa mga dapit nga gisangyawan ni Pablo.

Kinsay giisip kaniadto nga Grego? Sa ika-4 nga siglo B.C.E., mapasigarbohong gihisgotan ni Isocrates, usa ka mamumulong nga taga-Atenas, nga mikaylap sa kalibotan ang kultura sa Grego. Siya miingon nga tungod niana, “kadtong nakapahimulos sa among edukasyon gitawag nga Grego, dili lang kay kadtong taga-Gresya.” Busa bisag dili tino, posible nga ang dili Hudiyong amahan ni Timoteo ug ang uban pang gitawag ni Pablo ug Grego nahimong Grego tungod sa kultura, dili tungod kay gipanganak sila sa Gresya.Buhat 16:1.

Pagkat-og Dugang

‘Palihog, Pamati Niining Akong Damgo’

Ang komplikadong pamilya ni Jose naghatag ug hinungdanong leksiyon sa mga pamilya nga may stepfamily.

“Akong Hinigugma ug Matinumanong Anak Diha sa Ginoo”

Si Timoteo maulawon sa batan-on pa, pero nganong nahimo man siyang maayo kaayong Kristohanong tigdumala?