Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE HULYO 2015

 ANG BIBLIYA MAKABAG-O SA KINABUHI

Nagkaanam ka Daotan ang Akong Kinabuhi

Nagkaanam ka Daotan ang Akong Kinabuhi
  • NATAWO: 1952

  • NASOD: UNITED STATES

  • KANIADTO: BAYOLENTE

KAAGI:

Nagdako ko sa Los Angeles, California, U.S.A., sa lainlaing dapit didto nga nabantog sa mga gang ug droga. Unom ang anak sa akong mga ginikanan, ug ako ang ikaduha.

Gipadako mi sa among inahan ingong membro sa usa ka evangelical nga relihiyon. Pero ingong batan-on, doble kog kinabuhi. Kon Dominggo, mokanta ko sa choir sa simbahan. Sa ubang adlaw, ako makigparti, magdroga, ug maghimog imoral nga mga buhat.

Dali ra kong mosilaob sa kasuko. Himoon nakong hinagiban ang bisan unsa aron modaog. Wa ko matabangi sa akong nakat-onan sa simbahan. Kanunay kong moingon, “Sa Ginoo ang panimalos, ug ako ang iyang galamiton!” Niadtong hayskul ko sa hinapos sa mga 1960, naimpluwensiyahan ko sa Black Panthers, politikal nga grupo nga nailhang makig-away alang sa sibil nga mga katungod. Miapil kog unyon sa mga estudyante alang niini nga mga katungod. Sa pipila ka higayon magwelga mi maong masirad-an kadali ang eskuylahan.

Tungod sa akong pagkabayolente, daw di ko matagbaw sa pagprotesta lang. Busa miapil kog mga krimen nga gihimo tungod sa pagdumot. Pananglitan, kas-a nanan-aw mi sa akong mga higala ug salida bahin sa mga taga-Africa nga giulipon sa United States. Kay nasuko kaayo sa maong mga inhustisya, giatake namo ang mga batan-ong puti didto mismo sa sinehan. Dayon nangadto mig pinuy-anan sa mga puti aron mangita pag dugang kulatahon.

Hapit na kong mag-20 anyos niadto dihang nailado mi sa akong mga igsoong lalaki ingong mga mangtas. Nagkaproblema mi sa mga awtoridad. Usa sa akong mga manghod membro ug gikahadlokang gang nga akong gipakig-ubanan. Nagkaanam ka daotan ang akong kinabuhi.

GIBAG-O SA BIBLIYA ANG AKONG KINABUHI:

Mga Saksi ni Jehova ang mga ginikanan sa usa nako ka higala. Mikuyog ko dihang giimbitar ko nila sa ilang panagkatigom sa kongregasyon. Sa sugod pa lang, nakita nako kon unsa ka lahi ang mga Saksi. Ang tanan dunay Bibliya ug gigamit kini panahon sa ilang panagkatigom. Bisan ang mga batan-on naghatag ug pakigpulong! Nahingangha ko sa pagkahibalo nga ang Diyos diay dunay ngalan, si Jehova, ug sa pagpaminaw nila nga migamit niini. (Salmo 83:18) Lainlaig rasa ang naa sa kongregasyon, pero madayag nga walay pagkabahinbahin kanila.

 Sa sinugdan wala koy interes nga magtuon ug Bibliya uban sa mga Saksi, pero ganahan kong motambong sa ilang mga tigom. Usa ka gabii niana samtang miuban kog tigom sa mga Saksi, ang akong mga amigo nangadtog concert. Didto, ilang gikulata ang usa ka batan-on hangtod nga namatay kini kay wala niya gihatag ang iyang dyaket nga leather. Pagkasunod adlaw, gipanghambog nila ang ilang gihimo. Nangatawa ra gani sila dihang giimbestigar sa korte. Kadaghanan nila gisentensiyahan ug tibuok kinabuhing pagkabilanggo. Siyempre nalipay kaayo ko nga wa ko miuban nila anang gabhiona. Midesidir kong bag-ohon ang akong kinabuhi ug magtuon nag Bibliya.

Kay naimpluwensiyahan sa diskriminasyon sa rasa sukad sa bata pa, nakurat ko sa mga Saksi. Pananglitan, dihang mibiyahe sa laing nasod ang usa ka Saksi nga puti, iyang gibilin ang iyang mga anak sa usa ka pamilyang itom. Gipapuyo pod sa usa ka pamilyang puti ang usa ka batan-ong itom sa ilang balay kay kini way kasak-an. Nakombinsir ko nga haom gyod sa mga Saksi ni Jehova ang giingon ni Jesus sa Juan 13:35: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” Nasayod kong nakita na nako ang tinuod nga panag-igsoonay.

Sa pagtuon sa Bibliya, nakita nako nga kinahanglang magbag-o ko sa akong panghunahuna. Dili lang kay molihok kong makigdaiton kondili kinahanglang isipon pod kini ingong mao ang labing maayong paagi sa pagkinabuhi. (Roma 12:2) Inanay kong miuswag. Pagka-Enero 1974, nabawtismohan ko ingong Saksi ni Jehova.

Dili lang kay molihok kong makigdaiton kondili kinahanglang isipon pod kini ingong mao ang labing maayong paagi sa pagkinabuhi

Pero bisag bawtismado na ko, kinahanglang padayon nakong buntogon ang pagkamasuk-anon. Pananglitan, dihang nagsangyaw mi sa balaybalay, diha koy gigukod nga kawatan kay gikuha ang radyo sa akong sakyanan. Sa nagkaduol ko niya, gibuhian niya ang radyo ug mikaratil ug dagan. Pag-estorya nako sa uban kon giunsa nako pagkuhag balik ang radyo, ang ansiyano sa among grupo nangutana, “Stephen, unsa untay imong himoon kon nadakpan nimo siya?” Kana nakapahinuktok ug nakatukmod nakong maningkamot gyod nga magmakigdaiton.

Nahimo kong bug-os panahong ministro niadtong Oktubre 1974, nga naggugol ug 100 ka oras kada bulan sa pagtudlog Bibliya. Dayon, nakapribilehiyo ko sa pagboluntaryo sa world headquarters sa mga Saksi ni Jehova sa Brooklyn, New York. Pagka-1978, mibalik ko sa Los Angeles aron atimanon ang akong masakitong inahan. Duha ka tuig sa ulahi, naminyo ko kang Aarhonda. Dako kaayo siyang tabang nako sa pag-atiman kang Mama hangtod namatay kini. Kadugayan, nangeskuyla mi ni Aarhonda sa Watchtower Bible School of Gilead ug naasayn sa Panama ingong mga misyonaryo hangtod karon.

Sukad ko nabawtismohan, kadaghan ko makasugamak ug panghitabo nga makapaulbo sa kasuko. Nakat-on ko nga likayan na lang ang mga tawong makapahagit nako, o kaha pakalmahon ang kahimtang sa ubang paagi. Daghang tawo, lakip sa akong asawa, ang nakadayeg sa akong pag-atubang niini. Bisan ako, nasorpresa! Dili tungod nako nga nabag-o ko. Hinunoa, nasayod kong pamatuod kana sa makapabag-ong gahom sa Bibliya.—Hebreohanon 4:12.

MGA KAAYOHAN NGA AKONG NABATONAN:

Tungod sa Bibliya, may katuyoan ang akong kinabuhi ug tinuod na kong makigdaiton. Dili na ko mangulatag mga tawo, kondili motabang ko nilang maulian sa espirituwal. Gitun-an pa gani nakog Bibliya ang kaaway nako sa hayskul! Human sa iyang bawtismo, nagkauban mig puyo kadali. Hangtod ning gutloa, suod kaayo ming higala. Karon, kami sa akong asawa nakatabang ug kapig 80 ka tawo nga mahimong Saksi ni Jehova pinaagi sa pagtudlo kanila sa Bibliya.

Mapasalamaton kaayo ko kang Jehova kay gihatagan ko niyag kinabuhi nga punog kahulogan ug kalipay uban sa tinuod nga panag-igsoonay.

Pagkat-og Dugang

Unsa ang Kahulogan sa Kinabuhi?

Nakapangutana ka na ba, ‘Unsa ang katuyoan sa kinabuhi?’ Sayra kon sa unsang paagi gitubag sa Bibliya ang maong pangutana.