Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE HUNYO 2015

 SUGILANON SA KINABUHI

Kabilin nga Napasa sa Pito ka Henerasyon

Kabilin nga Napasa sa Pito ka Henerasyon

Daghay nag-ingon nga liwat kaayo ko kang Papa, sa akong pamarog, mga mata, ug pagkakomedyante. Pero naa pa siyay laing napasa nako—kabilin nga gipakabahandi sa pito ka henerasyon sa among pamilya. Paasoya ko.

Pagkat-on bahin sa kabilin sa among pamilya, uban kang Papa

Niadtong Enero 20, 1815, ang akong katigulangan nga si Thomas (1) * Williams natawo sa Horncastle, England. Duha ka tuig sa ulahi ang iyang mama namatay, maong ang iya na lang papa, si John Williams, ang nagpadako niya ug sa iyang tulo ka igsoon. Gitudloan ni John si Thomas sa pagpamanday, pero si Thomas lahig gusto.

Niadtong panahona, nainteres ug balik sa relihiyon ang tibuok England. Ang magwawali nga si John Wesley mibulag sa Church of England aron tukoron ang Society of Methodists, pundok nga nagpasiugdag personal nga pagtuon sa Bibliya ug pagwali. Paspas kaayong mikaylap ang mga pagtulon-an ni Wesley, ug hugot kanang gidawat sa pamilyang Williams. Si Thomas nahimong magwawali sa mga pagtulon-an ni Wesley ug nagmisyonaryo dayon sa South Pacific. Sa Hulyo 1840, siya ug ang iyang asawa, si Mary, (2) miabot sa Lakeba Island * sa Fiji, gamayng isla nga gipuy-ag mga kanibal.

PAGKINABUHI UBAN SA MGA KANIBAL

Sa bag-o pa sila sa Fiji, si Thomas ug si Mary nagkalisod pag-ayo. Motrabaho silag taas nga panahon nga ang pamaagi kinaraan ug ang klima init. Dili matukib ang ilang kalisang tungod sa gubat sa mga tribo, pagtuok ug mga babayeng balo, pagpatayg mga bata, ug kanibalismo. Ang mga tawo didto dili pa gyod maminaw sa ilang mensahe. Si Mary ug ang ilang kinamagulangang anak, si John, nasakit ug hapit mamatay. Sa 1843, si Thomas misulat: “Nalumsan ko sa kaguol. . . . Nahugno gyod ko.” Pero nakalahutay ra sila ni Mary tungod sa ilang pagtuo kang Jehova nga Diyos.

Niadtong higayona, gigamit ni Thomas ang iyang pagkapanday ug nagtukod siyag balay nga ang estilo pang-Europe. Kadto ang kinaunhan sa Fiji, nga may habog nga salog ug ubang disenyo nga nakapainteres sa mga tagadidto. Sa wala pa ni mahuman, si Mary nanganak sa ilang ikaduhang anak, si Thomas Whitton (3) Williams, ang akong direktang katigulangan.

Sa 1843, si Thomas, Sr. mitabang sa paghubad sa Ebanghelyo ni Juan sa pinulongang Fijian, nga lisod para niya. * Pero, maayo sab kaayo siyang maniid. Gisulat niya ang iyang mga obserbasyon sa iyang librong Fiji and the Fijians (1858), usa ka iladong asoy sa kinabuhi sa mga taga-Fiji sa ika-19ng siglo.

Tungod sa 13 ka tuig nga pagpakigbisog sa Fiji, nasakit si Thomas maong siya ug ang iyang pamilya  namalhin sa Australia. Human sa taas ug malamposong karera ingong pastor, si Thomas namatay sa Ballarat, Victoria, niadtong 1891.

“BULAWAN” SA KASADPAN

Sa 1883, si Thomas Whitton Williams ug ang iyang asawa, si Phoebe, (4) uban sa ilang mga anak, namalhin sa Perth, Western Australia. Ang ikaduha nilang anak, si Arthur Bakewell (5) Williams, ang sunod nga direkta nakong katigulangan, nuybe anyos niadtong panahona.

Pagka-22 anyos ni Arthur, nanimpalad siya sa Kalgoorlie, minahan sa bulawan nga mga 600 kilometros sa sidlakan sa Perth. Didto nakabasa siyag mga literatura nga gipatik sa International Bible Students, nga karon nailhang mga Saksi ni Jehova. Regular sab siyang nagpahatod ug Zion’s Watch Tower. Kay nainteres sa iyang nabasahan, si Arthur nanulti sa uban bahin sa iyang bag-ong nahibaloan ug nagpahigayon ug mga tigom para tun-an ang Bibliya. Kadto ang sinugdanan sa modernong buluhaton sa mga Saksi ni Jehova sa Western Australia.

Gisulti sab ni Arthur sa iyang pamilya ang iyang nakat-onan. Giuyonan sa iyang amahan nga si Thomas Whitton ang pagpakig-uban niya sa mga Bible Student pero wala magdugay, kini namatay. Nahimo sab nga mga Bible Student ang iyang mama, si Phoebe, ug ang iyang igsoong mga babaye, si Violet ug Mary. Si Violet nahimong bug-os panahong magwawali, o payunir. Matod pa ni Arthur, ang iyang igsoon mao “ang kinamaayohan, labing kugihan, ug labing sinsero nga payunir sa Western Australia.” Tingali naghinobra ra si Arthur, pero ang kakugihan ni Violet dako kaayog epekto sa misunod nga henerasyon sa pamilyang Williams.

Sa ulahi, si Arthur naminyo ug mibalhin sa Donnybrook, lungsod nga daghag prutas sa habagatan-sidlakang Western Australia. Didto gianggaan siyag “Tiguwang Buang sa 1914!” kay masiboton siyang nagpahayag sa mga tagna sa Bibliya nga nagtumong sa maong tuig. * Nahunong ang pagbiaybiay pagbuto sa Gubat Kalibotan I. Pirmeng sangyawan ni Arthur ang mga mamalitay sa iyang tindahan, diin ang bentana gibutangan sab niyag mga literatura sa Bibliya. Makita sab sa bentana ang karatulang nagtanyag ug kuwartang 100 pounds niadtong makapamatuod sa Trinidad—doktrina nga dili binase sa Bibliya ug wala tuohi ni Arthur. Wala gyoy bisag usa nga napremyohan.

Ang balay sa pamilyang Williams gihimong tigomanan para sa ginurupong pagtuon sa Bibliya ug sa mga tigom sa kongregasyon sa Donnybrook. Sa ulahi, si Arthur nagtukod ug Kingdom Hall, o tigomanan, diha sa lungsod—usa sa unang mga tigomanan sa Western Australia. Sa pag-70 niya, mag-amerkana siya, mosakay sa iyang kabayo nga ginganlag Doll, ug mosangyaw sa tibuok Donnybrook.

Bisag si Arthur hilomon ug seryoso, siya kugihang  mosangyaw. Naimpluwensiyahan gayod niya ang iyang mga anak. Ang iyang anak nga si Florence (6) misyonarya sa India. Ang iyang mga anak nga lalaki, si Arthur Lindsay (7) ug si Thomas, sama sa ilang amahan, dugay nang mga ansiyano sa kongregasyon.

TAM-IS NGA LADY WILLIAMS

Si Arthur Lindsay Williams, akong apohan sa tuhod, ilado ug gimahal tungod sa iyang kabuotan. Gigahinan gyod niyag panahon ang mga tawo ug girespeto sila. Maayo kaayo siyang mogamit ug atsa, gani sa 12 ka tuig, 18 ka beses siyang midaog sa kompetisyon sa pagbughag troso sa ilang lugar.

Pero, wala malipay si Arthur dihang giatsa sa iyang dos anyos nga anak nga si Ronald (8) (akong apohan), ang gamayng punoan sa mansanas nga tapad sa ilang balay. Gibugkosan kini sa inahan ni Ronald, ug sa ulahi kini namungag mansanas nga may talagsaong katam-is. Kini nga mansanas ginganlag Lady Williams, ug gikan niini ang mansanas nga Cripps Pink, usa sa labing popular nga klase sa tibuok kalibotan.

Sa ulahi misulod sa konstruksiyon si Ronald, o Gramp, nga maoy akong tawag niya. Siya ug si Lola daghang tuig nga nagboluntaryo sa mga proyekto sa pagpanukod sa mga Saksi sa Australia ug Solomon Islands. Karon bisag halos 80 anyos na, si Gramp ansiyano gihapon sa kongregasyon ug motabang sab sa pagtukod ug pag-ayo ug mga Kingdom Hall sa Western Australia.

PAGPABILI SA AKONG PANULONDON

Ingong pag-apresyar sa kabilin sa among pamilya, gipaningkamotan gyod sa akong mga ginikanan, si Geoffrey (9) ug Janice (10) Williams, nga pabilhan namo sa akong igsoong babayeng si Katharine ang Kristohanong mga prinsipyo. Sa edad nga 13, giugmad nako ang suod nga relasyon uban kang Jehova. Sa usa ka Kristohanong asembliya nga gitambongan nako, giawhag ni John E. Barr, membro sa Nagamandong Lawas sa mga Saksi ni Jehova, ang mga batan-on: “Ayawg usiki ang inyong labing bililhong butang—ang kahigayonan sa pag-ila ug paghigugma kang Jehova.” Nianang gabhiona nagpahinungod ko kang Jehova. Duha ka tuig sa ulahi, nagpayunir ko.

Karon, ako (12) ug ang akong asawa, si Chloe, (11) bug-os panahong nagsangyaw sa Tom Price, hilit nga lungsod nga may minahan, sa amihanan-kasadpan sa Western Australia. Nagtrabaho mig partaym para sa among panginahanglan. Ang akong mga ginikanan ug igsoong babaye, si Katharine, ug ang iyang bana, si Andrew, nagpayunir sa Port Hedland, mga 420 kilometros paamihanan. Kami ni Papa mga ansiyano pod sa kongregasyon.

Pito ka henerasyon kanhi, ang akong katigulangan nga si Thomas Williams determinadong nag-alagad kang Jehova nga Diyos. Kana nga kabilin sa pagtuo ug pag-alagad napasa hangtod kanako. Dako gayod nga panalangin ang maong dagayang espirituwal nga panulondon.

^ par. 5 Ang numero nagtumong sa matag indibiduwal diha sa mga letrato.

^ par. 6 Kaniadto gitawag ug Lakemba Island, nga naa sa Lau Group sa sidlakan sa Fiji.

^ par. 10 Gihubad sa misyonaryong si John Hunt ang kadaghanang bahin sa Fijian New Testament, nga napatik niadtong 1847. Makapainteres ang maong hubad kay mabasa diha sa Marcos 12:36, Lucas 20:42, ug Buhat 2:34 ang ngalan sa Diyos, nga “Jiova.”

^ par. 16 Tan-awa ang apendise nga may ulohang “1914—Usa ka Hinungdanong Tuig sa Tagna sa Bibliya” sa librong Unsay Tinuod nga Gitudlo sa Bibliya? nga gipatik sa mga Saksi ni Jehova ug anaa sa www.jw.org/ceb.

Pagkat-og Dugang

Sa Unsang Paagi Makabenepisyo Kita sa mga Prinsipyo sa Bibliya?

Si Jesus naghisgot nga kita nagkinahanglag giya ug kon unsa ang duha ka prinsipyo sa Bibliya nga labing hinungdanon.

Unsay Gipakita sa Kronolohiya sa Bibliya Bahin sa Tuig 1914?

Ang tagna bahin sa “pito ka panahon” sa Daniel kapitulo 4 nagtumong sa kritikal nga panahon sa pagmando sa tawo.

Sundoga ang Ilang Pagtuo

Unsang benepisyo ang atong makuha karon kon tun-an nato ang bahin sa matinumanon nga mga lalaki ug babaye diha sa Bibliya?