Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Enero 2015

Angay ba Kitang Moampo Kang Jesus?

Angay ba Kitang Moampo Kang Jesus?

GISURBI sa usa ka researcher ang kapig 800 ka batan-on nga may lainlaing relihiyon kon motuo ba silang motubag si Jesus sa mga pag-ampo. Kapig 60 porsiyento ang mitubag nga oo. Pero gipapas sa usa ka batan-on ang ngalan ni Jesus sa surbi, ug giilisan kinig “Diyos.”

Para nimo, kang kinsa ta angayng moampo, kang Jesus o sa Diyos? * Aron matubag kana, ato unang sayron kon unsay gitudlo ni Jesus sa iyang mga tinun-an bahin sa pag-ampo.

KINSAY GITUDLO NI JESUS NGA ATONG AMPOAN?

Gitudlo ug gipakita ni Jesus kanato kon kang kinsa ta angayng moampo.

Sa pag-ampo niya sa iyang Amahan, si Jesus naghatag ug ehemplo aron sundon sa tanan

IYANG GITUDLO: Dihang si Jesus gipangutana sa usa sa iyang mga tinun-an, “Ginoo, tudloi kami kon unsaon sa pag-ampo,” siya mitubag: “Sa dihang mag-ampo kamo, ingnon ninyo, ‘Amahan.’” (Lucas 11:1, 2) Dugang pa, sa iyang gibantog nga Wali sa Bukid, giawhag ni Jesus ang iyang mga mamiminaw: ‘Pag-ampo sa inyong Amahan.’ Siya usab nagpasalig kanila: “[Ang] inyong Amahan nahibalo sa mga butang nga inyong gikinahanglan sa wala pa gani kamo mangayo kaniya.” (Mateo 6:6, 8) Sa kataposang gabii ni Jesus sa yuta, gisultihan niya ang iyang mga tinun-an: “Kon kamo mangayo sa Amahan sa bisan unsa kini iyang ihatag kaninyo sa akong ngalan.” (Juan 16:23) Busa gitudloan ta ni Jesus nga moampo sa iyang Amahan, nga Amahan sab nato, si Jehova nga Diyos.—Juan 20:17.

IYANG EHEMPLO: Sama sa iyang gitudlo sa uban kon unsaon pag-ampo, si Jesus mismo nag-ampo: “Ako nagadayeg kanimo sa dayag, Amahan, Ginoo sa langit ug yuta.” (Lucas 10:21) Sa laing higayon, “Giyahat ni Jesus ang iyang mga mata sa langit ug miingon: ‘Amahan, nagpasalamat ako kanimo nga gidungog mo ako.’” (Juan 11:41) Ug dihang himatyon na si Jesus, siya miampo: “Amahan, sa imong mga kamot itugyan ko ang akong espiritu.” (Lucas 23:46) Sa pag-ampo niya sa iyang Amahan—ang “Ginoo sa langit ug sa yuta”—si Jesus naghatag ug ehemplo aron sundon sa tanan. (Mateo 11:25; 26:41, 42; 1 Juan 2:6) Nasabtan ba sa mga tinun-an ni Jesus ang iyang mga instruksiyon?

KINSAY GIAMPOAN SA UNANG MGA KRISTOHANON?

Pipila ka semana human mibalik si Jesus sa langit, ang iyang mga tinun-an giatake ug gihulga sa mga magsusupak. (Buhat 4:18) Siyempre, nag-ampo sila alang sa tabang—pero kang kinsa? “Sila nagkahiusa sa pagpatugbaw sa ilang mga tingog ngadto sa Diyos,” nga mihangyo nga padayon silang tabangan “pinaagi sa ngalan sa [iyang] balaang alagad nga si Jesus.” (Buhat 4:24, 30) Busa gisunod sa mga tinun-an ang instruksiyon ni Jesus. Sila nag-ampo sa Diyos, dili kang Jesus.

Paglabay sa mga tuig, gihubit ni apostol Pablo kon sa unsang paagi siya ug ang iyang mga kauban nag-ampo. Siya misulat sa iyang mga isigka-Kristohanon: “Nagpasalamat kami kanunay sa Diyos nga Amahan sa atong Ginoong Jesu-Kristo sa dihang nagaampo kami alang kaninyo.” (Colosas 1:3) Si Pablo misulat sab sa iyang mga isigkamagtutuo bahin sa ‘pagpasalamat kanunay alang sa tanang butang ngadto sa atong Diyos ug Amahan sa ngalan sa atong Ginoong Jesu-Kristo.’ (Efeso 5:20) Gipakita dinhi nga si Pablo nagdasig sa uban nga mag-ampo sa iyang “Diyos ug  Amahan” bahin sa tanang butang—pero siyempre, pinaagi sa ngalan ni Jesus.—Colosas 3:17.

Sama sa mga Kristohanon kaniadto, ikapakita nato ang atong gugma kang Jesus pinaagi sa pagsunod sa iyang gitudlo bahin sa pag-ampo. (Juan 14:15) Kon mag-ampo ta sa atong Amahan sa langit—ug kaniya lamang—mas bation nato ang giingon sa Salmo 116:1, 2: “Nahagugma ako kang Jehova, kay siya nagapatalinghug sa akong tingog . . . Magatawag ako kaniya samtang ako buhi pa.” *Ang Biblia, Bugna Version.

^ par. 3 Sa Bibliya, ang Diyos ug si Jesus dili katumbas. Para sa dugang impormasyon, tan-awa ang kapitulo 4 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.

^ par. 11 Aron dawaton sa Diyos ang atong mga pag-ampo, kinahanglang maningkamot ta nga buhaton ang iyang gipangayo kanato. Para sa dugang impormasyon, tan-awa ang kapitulo 17 sa librong Unsay Tinuod nga Gitudlo sa Bibliya?