Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE SEPTIYEMBRE 2014

 SUGILANON SA KINABUHI

Nagmalipayon sa Pag-alagad sa Diyos

Nagmalipayon sa Pag-alagad sa Diyos

Sukad sa pagkabata, nakasinati na kog diskriminasyon sa rasa. Maulawon sab ko ug mahadlok mapakyas. Kay naglaom nga makatabang nako ang Bibliya, miadto ko sa among Simbahan sa Katoliko aron masabtan kini. Pero wa ko nila matabangi maong nagpokus na lang ko sa sports.

Wala madugay, nahilig ko sa gymnastics ug pagpadakog lawas. Sa ulahi, nagbukas kog gym sa San Leandro, California, U.S.A., ug nakabansay kog mga bodybuilder lakip ang usa nga nakadaog sa Mr. America. Pero bisag maskulado na kog lawas, gibati nako nga may kulang sa akong kinabuhi.

NAKAPLAGAN NAKO ANG AKONG GIPANGITA

Kay nahibalo man ang akong amigo sa gym nga interesado kog Bibliya, duna kuno siyay ipailaila nako. Pagkabuntag, usa ka Saksi ni Jehova ang miadto sa balay. Gitubag niya ang akong mga pangutana gamit ang Bibliya ug naabtan mig upat ka oras. Mihangyo ko nga mobalik siya pagkagabii, ug naghisgot mig Bibliya hangtod tungang gabii. Nalipay ko sa akong nakat-onan, ug nangutana ko kon puwede ba kong mouban niya pagkaugma aron motan-aw kon unsaon pagsangyaw. Mibilib ko sa iyang paggamit sa Bibliya sa pagtubag sa mga pangutana sa mga tawo. Nakaingon ko nga mao niy gusto nakong himoon!

Miundang ko sa akong negosyo ug miuban nag sangyaw sa maong payunir, nga maoy tawag sa mga Saksi nga bug-os panahong magsasangyaw. Nabawtismohan ko sa Mayo 1948 nga kombensiyon sa Cow Palace Arena sa San Francisco, California. Nianang tuiga nagpayunir ko.

Akong gihangyo ang mga Saksi nga duawon ang akong inahan. Madinawaton siya ug nahimong Saksi ni Jehova. Bisag gisupak sa iyang pamilya, nagmatinumanon siya sa Diyos hangtod sa iyang kamatayon. Kami lang ni Mama ang Saksi sa pamilya.

NAILAILA NAKO ANG AKONG MAASAWA

Sa 1950, mibalhin ko sa Grand Junction, Colorado, diin akong nakaila si Billie. Natawo siya sa 1928 ug nagdako panahon sa Great Depression dihang nahugno pag-ayo ang ekonomiya sa kalibotan. Kada gabii siya basahag Bibliya sa iyang inahan nga si Minnie nga ang suga nag-awop-awop lang nga lampara. Bisag kuwatro anyos pa lang si Billie, kamao na siyang mobasa ug kabisado na ang daghang estorya sa Bibliya. Sa hinapos sa 1940’s, nakat-onan sa iyang inahan sa pag-Bible study uban sa mga Saksi nga ang impiyerno dili sakitanang dapit, kondili komon nga lubnganan sa tawo. (Ecclesiastes 9:5, 10) Si Minnie ug ang iyang bana parehong na-Saksi.

Pagka-1949, miuli si Billie human makagraduwar sa kolehiyo sa Boston ug giseryoso ang pagtuon  sa Bibliya. Imbes magtitser, gidedikar niya ang iyang kinabuhi sa Diyos. Nabawtismohan siya sa 1950 sa internasyonal nga kombensiyon sa mga Saksi ni Jehova sa Yankee Stadium sa New York. Wala madugay kami nagkaila, nagminyo, ug nagpayunir.

Mipuyo mi sa Eugene, Oregon, ug daghan mig nahimong suod nga higala didto. Sa 1953, mibalhin mi sa Grants Pass, Oregon, aron motabang sa gamayng kongregasyon didto. Wa madugay nianang tuiga giimbitar mi sa ika-23 nga klase sa Gilead, tunghaan sa mga Saksi para mamisyonaryo. Duol ni sa South Lansing, New York, mga 400 kilometros amihanan-kasadpan sa New York City.

PAGMISYONARYO SA BRAZIL

Sa Disyembre 1954, lima ka bulan human mi mograduwar sa Gilead, mibiyahe mi ni Billie paingon sa Brazil sakay sa gamayng eroplano. Usa ka oras pa lang gikan sa paglupad, nadaot ang usa ka makina, pero luwas ra ming nakalanding sa Bermuda. Human sa lain pang emergency landing sa Cuba ug 36 ka oras nga kapoyng biyahe, nakaabot ra gyod mi sa branch office sa mga Saksi ni Jehova sa Rio de Janeiro, Brazil.

Unang Kingdom Hall sa Bauru, sa giabangang dapit nga may karatula nga akong ginama, 1955

Human sa kadiyot nga pag-estar didto, nangadto mi ni Billie sa Bauru, São Paulo, uban sa duha ka misyonaryo aron mangitag kapuy-an. Kapig 50,000 ang populasyon sa siyudad, ug kami pay Saksi didto.

Pagpamalaybalay namo, nasuko dayon ang Katolikong pari. Gisundan mi niya ug gipasidan-an ang mga tawo nga dili mi paminawon. Pero sulod lang sa pipila ka semana, usa ka dakong pamilya ang nagpa-Bible study, midawat sa kamatuoran, ug sa ulahi nagpabawtismo. Ngadtongadto, nagpa-study sab ang uban.

Ang nabawtismohang pamilya may paryente nga presidente sa usa ka iladong asosasyon. Nananghid ko niya nga abangan ang ilang pasilidad para sa asembliya. Gustong ipakanselar sa pari ang kontrata, pero giingnan sa presidente ang iyang mga membro: “Kon inyo ning kanselahon, moresayn ko!” Nadayon gyod ang asembliya.

Pagkasunod tuig, sa 1956, gidapit mi nga motambong ug distritong kombensiyon sa Santos, São Paulo. Duolag 40 sa among kongregasyon ang nagtren paingon didto. Pagbalik namo sa Bauru, nakadawat kog sulat nga iasayn ko nga moduaw ug mga kongregasyon sa mga Saksi ni Jehova. Dinhi nagsugod ang among halos 25 ka tuig nga pagpangduaw sa daghang lugar sa Brazil.

Sulod lang sa usa ka tuig, duna nay madasigong grupo sa mga magwawali sa Gingharian dinhi sa Bauru

AMONG PAGMINISTERYO

Lisod kaniadto ang pagbiyahe. Halos nalibot namo ang tibuok nasod pinaagig bus, tren, bagon, ug bisikleta, ug magbaktas pod mi. Usa sa unang mga siyudad nga among gibisita ang Jaú, São Paulo, diin nasuko ang pari didto.

“Di mo puwedeng mosangyaw sa ‘akong mga karnero!’” misingka ang pari.

“Ang Diyos may tag-iya nila,” mitubag mi. “Dili ikaw.”

Gihikay namo nga ipasalida ang video bahin sa atong tibuok kalibotang pagsangyaw nga nag-ulohang The New World Society in Action, pero gisugo sa pari ang iyang mga membro nga atakehon mi. Gipahibalo dayon namo ang kapolisan. Pag-abot sa pari ug sa iyang mga membro, gibabagan silag daghang polis nga nagtion nilag pusil. Daghan ang nakatan-aw sa salida ug lingaw kaayo sila.

 Bisag asa mi moduaw, naa gyoy pagdumot ug pagsupak sa ubang relihiyon. Pananglitan sa Brusque, duol sa Blumenau, Santa Catarina, nailaila namo ang duha ka payunir nga gilutos pag-ayo. Apan nagbunga ra ang ilang pag-agwanta ug paglahutay. Karon, kapig 50 ka tuig na ang milabay, duna nay kapig 60 ka mauswagong kongregasyon didto ug nindot nga Assembly Hall duol sa siyudad sa Itajaí!

Usa ka sadya kaayong bahin sa among buluhaton mao ang pagpangandam para sa dagkong kombensiyon uban sa mga igsoon. Sa 1970’s, nakapribilehiyo ko nga magdumala sa kombensiyon sa Morumbi Stadium. Mihangyo mi sa mga 100 ka kongregasyon sa duol nga magpadalag tag 10 ka tawo aron manghinlo sa estadyum sa gabii una ang kombensiyon.

Pagpamiya sa mga magdudulag soccer nianang gabhiona, ang uban nagyagayaga, “Tan-awa ra god nang gagmayng mga babaye nga nagdalag mga silhig ug mop.” Pero pagkatungang gabii hinlo na ang tibuok estadyum! Nakaingon ang manedyer sa estadyum, “Usa ka semana man ni hinloan sa akong mga tawo, pero kamong mga Saksi nahuman ra ninyog pila ka oras!”

MIBALIK MI SA UNITED STATES

Sa 1980 namatay si Papa. Wa madugay, mibalik mi sa United States aron atimanon ang akong inahan sa Fremont, California. Sa magabii, manghinlo mig mga bilding aron padayong makapayunir ug makatabang sa mga Portuguese sa maong dapit. Sa ulahi namalhin mi sa San Joaquin Valley aron sangyawan ang mga nagsultig Portuguese gikan sa Sacramento hangtod sa Bakersfield. Karon duna nay napulo ka Portuguese nga kongregasyon sa California.

Pagkamatay ni Mama sa 1995, namalhin mi sa Florida aron atimanon ang papa ni Billie hangtod siya namatay. Unang namatay ang iyang mama sa 1975. Pagka-2000 namalhin na pod mi sa bukirong rehiyon sa habagatan-kasadpang Colorado. Among gisangyawan ang mga Native American nga Navajo ug Ute ang tribo. Ikasubo, namatay si Billie sa Pebrero 2014.

Mapasalamaton kaayo ko nga kapig 65 ka tuig sa miagi, nailaila nako ang usa ka Saksi ni Jehova ug gitubag niya ang daghan nakong pangutana gamit ang Bibliya! Maayo na lang nga akong gisusi kon ang iyang gitudlo gikan ba gyod sa Bibliya. Kini miresultag malipayong kinabuhi sa pag-alagad sa Diyos.

Pagkat-og Dugang

Sila Kinabubut-ong Nagtanyag sa Ilang Kaugalingon—Sa Brazil

Basaha ang makapadasig nga mga kasinatian sa pipila nga mibalhig laing lugar aron mas bug-os makaalagad sa Diyos.