Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE AGOSTO 2014

 ANG BIBLIYA MAKABAG-O SA KINABUHI

Nakig-away Ko Batok sa Inhustisya ug Kapintasan

Nakig-away Ko Batok sa Inhustisya ug Kapintasan
  • NATAWO: 1960

  • NASOD: LEBANON

  • KANIADTO: EKSPERTO SA KUNG FU

KAAGI:

Nagdako ko sa Rmaysh, duol sa utlanan sa Israel ug Lebanon panahon sa giyera sibil. Mahinumdoman pa gihapon nako ang pagbuto sa gilubong nga mga bomba ug ang inosenteng mga biktima nga naputlag mga tiil ug kamot. Lisod ang kinabuhi, ug kaylap ang krimen ug kapintasan.

Ang among pamilya membro sa Maronite Church, nga usa sa mga Eastern Catholic Church. Puliki kaayo si Papa sa pagpanginabuhi kay 12 mi sa pamilya. Pero giseguro ni Mama nga manimba mi bisag wala si Papa. Sa ulahi, akong gibati nga ang simbahan, sama sa komunidad, wala makapanalipod sa mga huyang.

Sa tin-edyer pa ko, nainteres ko sa kung fu. Nagbansay kog maayo ug nahawod niana, apil sa paggamit ug lainlaing armas sa martial arts. Naghunahuna ko, ‘Kay di man nako mapugngan ang gubat, ako na lay mopugong sa bayolenteng mga tawo.’ Kon dunay mag-away, mosalga dayon ko. Mubo ra kog pasensiya ug dali kong masuko. Gikahadlokan ko sa mga tawo sa habagatang Lebanon kay makig-away man gyod ko aron masumpo ang inhustisya ug kapintasan.

Sa 1980, miapil kog kung fu club sa Beirut. Kada adlaw dunay pagpamomba, pinusilay, ug mangahulog nga missile, pero padayon gihapon kong nagbansay. Puro kaon ug tulog ang akong gihimo, ug nagkinabuhi ko sama kang Bruce Lee, usa ka Chinese-American nga aktor ug kampeyon sa kung fu. Gisundog nako ang iyang buhok, linakwan, ug paagi sa pagsinggit. Dili gyod ko mopahiyom.

GIBAG-O SA BIBLIYA ANG AKONG KINABUHI:

Gusto gyod ko nga mahimong propesyonal sa kung fu sa China. Usa ka gabii samtang nagbansay ko para sa akong biyahe sa China, may nanuktok sa pultahan. Diha ang akong amigo kauban ang duha ka Saksi ni Jehova. Nakauniporme kog  itom ug gisingot pag-ayo. Giingnan nako sila, “Wa koy nahibal-an sa Bibliya.” Wala koy ideya nga mausab diay ang akong kinabuhi sukad niadto.

Gamit ang Bibliya, gipakita sa mga Saksi kon nganong dili gyod mawagtang sa tawo ang inhustisya ug kapintasan. Ilang gipatin-aw nga si Satanas nga Yawa ang tinuod nga hinungdan niana. (Pinadayag 12:12) Nakadayeg ko sa mga Saksi kay sila kalmado ug segurado kaayo sa ilang gisulti. Natandog ko sa ilang gitudlo nga dunay ngalan ang Diyos. (Salmo 83:18) Gibasahan sab ko nila sa 1 Timoteo 4:8, nga nag-ingon: “Ang lawasnong pagbansay may diyutayng kapuslanan; apan ang diyosnong pagkamahinalaron mapuslanon sa tanang butang, kay naghupot kini ug saad sa kinabuhi karon ug sa umaabot.” Kadtong mga pulonga dakog epekto sa akong kinabuhi.

Ikasubo, wala na nako igkita pag-usab ang mga Saksi kay wala na sila pabalika sa akong pamilya. Pero nakadesisyon na kong moundang sa kung fu ug mosugod pagtuon sa Bibliya. Supak niana ang akong mga igsoon, pero determinado kong pangitaon ang mga Saksi ug magpa-Bible study.

Wala na nako mahibalag ang mga Saksi. Niadtong tungora sab, naguol kaayo ko sa kalit nga kamatayon sa akong amahan ug sa ubang trahedya sa pamilya. Nanarbaho ko sa usa ka kompaniya sa konstruksiyon, ug usa ka adlaw niana ang akong kauban sa trabaho nga si Adel nangutana kon nganong masulub-on kaayo ko. Gisultihan ko niya sa paglaom diha sa Bibliya bahin sa pagkabanhaw. Sa siyam ka bulan, kining buotang Saksi mapailobong nag-Bible study nako.

Sa among pagtuon, akong nakita nga kinahanglan nakong bag-ohon ang akong personalidad. Dili kadto sayon. Pirme kong aburido ug daling masuko. Akong nakat-onan sa Bibliya kon unsaon pagpugong sa akong kasuko ug dili mobalos. Pananglitan, kini ang gitambag ni Jesus sa Mateo 5:44: “Magpadayon sa paghigugma sa inyong mga kaaway ug sa pag-ampo alang sa mga nagalutos kaninyo.” Ang Roma 12:19 nagpasidaan usab: “Ayaw kamo pagpanimalos, . . . kay nahisulat: ‘Akoa ang panimalos; ako magabalos, nag-ingon si Jehova.’” Kini ug ang ubang teksto nakatabang nako nga anam-anam nga mahimong kalmado.

MGA KAAYOHAN NGA AKONG NABATONAN:

Bisag sa sinugdan supak ang akong pamilya sa akong pagtuon uban sa mga Saksi ni Jehova, sila karon morespeto na sa mga Saksi. Gani na-Saksi ang usa nako ka igsoon, ug sa buhi pa si Mama labanan niya ang among pagtuo ngadto sa uban.

Gipanalanginan sab kog buotan ug maunongong asawa, si Anita. Partner mi sa bug-os panahong pagsangyaw. Sukad niadtong 2000, nagpuyo mi sa Eskilstuna, Sweden, aron tudloan bahin sa Bibliya kadtong Arabic ug sinultihan.

Maluoy gihapon ko sa mga tawong nag-antos tungod sa kapintasan. Pero ang pagkahibalo sa tinuod nga hinungdan niana—ug nga hapit na kanang taposon sa Diyos—nakahatag nakog tinuod nga kalipay ug kalinaw.—Salmo 37:29.

Malipayon kaayo mi sa akong asawa sa among buluhaton. Ganahan kaayo ming motudlo sa uban bahin kang Jehova

Pagkat-og Dugang

Nganong Gitugotan sa Diyos ang Pagkadaotan ug Pag-antos?

Sa unsang paagi nagsugod ang pagkadaotan, ug nganong gitugotan kini sa Diyos nga magpadayon? Matapos pa kaha ang pag-antos?