Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE ABRIL 2014

Masuklan Nimo ang Tentasyon!

Masuklan Nimo ang Tentasyon!

“Wa koy planong motan-awg pornograpiya. Pero pag-Internet nako, may kalit nga milutaw. Ambot nganong giablihan man to nako.”—CODY. *

“Dihay guwapang babaye sa trabahoan nga naga-flirt nako. Usa ka adlaw niana, gihagad ko niya nga mag-hotel. Nahibalo ko sa iyang intensiyon.”—DYLAN.

“MASUKLAN nako ang tanan gawas sa tentasyon.” Kini ang sagad nga pasiaw sa uban bahin sa tentasyon, nga nagpakitang gusto nila kini. Pero para sa uban, kaaway kini nga gusto nilang pildihon. Unsay imong hunahuna? Dihang may tentasyon, magpadala ka ba o suklan kini?

Siyempre, dili tanang tentasyon moresulta sa dagkong problema. Pananglitan, kon nagdiyeta ka ug natental kang mokaon ug usa ka slice nga cake, dili ra madaot ang imong kinabuhi. Pero kon magpadala ka sa ubang tentasyon, ilabina kanang motultol sa seksuwal nga imoralidad, pait unya ang imong dangatan. Ang Bibliya nagpasidaan: “Ang mananapaw walay maayong panabot. Gidaot lamang niya ang iyang kaugalingon.”—Panultihon (Proverbio) 6:32, 33, Ang Bag-ong Maayong Balita Biblia.

Kon makaatubang kag imoral nga tentasyon, unsay imong himoon? Ang Bibliya nagtubag: “Kini mao ang pagbuot sa Diyos, ang pagbalaan kaninyo, nga ayran ninyo ang pakighilawas; nga ang matag usa kaninyo kinahanglang mahibalo kon unsaon paghupot sa iyang kaugalingong sudlanan diha sa kabalaan ug kadungganan.” (1 Tesalonica 4:3, 4) Sa unsang paagi nimo maugmad ang maong determinasyon? Aniay tulo ka paagi nga makatabang.

Paagi 1: Bantayi ang Imong mga Mata

Ang pagtan-awg law-ay nga hulagway makapasamot lang sa dili hustong kaibog. Aron pamatud-an ang koneksiyon tali sa pagtan-aw ug pagkaibog, si Jesus nagpasidaan: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” Siya midugang: “Karon, kon kanang imong tuo nga mata nagapapandol kanimo, lusoka kini ug isalibay kini gikan kanimo.” (Mateo 5:28, 29) Ang punto? Aron masuklan ang tentasyon, kinahanglang molihok ta dayon ug dili motan-awg hulagway nga makapukaw sa seksuwal nga kaibog.

Kon makakita kag law-ay nga hulagway, lingiw dayon

 Sa pag-ilustrar: Handurawa nga nakatan-aw ka sa makasulaw nga kahayag gikan sa puthaw nga giwelding. Tutokan ba nimo kini? Siyempre dili! Motalikod ka o tabonan ang imong mga mata aron dili kini madaot. Sa susama, kon makatan-aw kag law-ay—sa magasin, salida, o sa aktuwal—lingiw dayon. Panalipdi ang imong hunahuna aron dili kini mahugawan. Si Juan, nga kaniadto adik sa pornograpiya, miingon: “Kon makakita kog guwapa, sagad matental ko nga magsigeg pasiplat. Maong pugson nakong ilingiw ang akong mga mata, ug moingon sa akong kaugalingon: ‘Ampo kang Jehova! Karon na!’ Humag ampo, dili na ko matental ug lingi.”Mateo 6:9, 13; 1 Corinto 10:13.

Tagda usab ang matinumanong si Job, kinsa miingon: “Ako mihimog pakigsaad sa akong mga mata. Nan unsaon ko man pagtan-aw nga maibogon sa usa ka ulay?” (Job 31:1) Dili ba maayong sundogon kana nga determinasyon?

Sulayi kini: Kon makakita kag law-ay nga hulagway, lingiw dayon. Sundoga ang magsusulat sa Bibliya kinsa miampo: “Ilikay ang akong mga mata gikan sa pagtan-aw sa butang nga walay-pulos.”—Salmo 119:37.

Paagi 2: Bantayi ang Imong Hunahuna

Kay dili hingpit, kitang tanan malisdan usahay sa pagsumpo sa sayop nga mga tinguha. Ang Bibliya nag-ingon: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala.” (Santiago 1:14, 15) Unsaon nimo paglikay sa maong situwasyon?

Kon makahunahuna kag dili maayo, pag-ampo dayon

Kon motungha ang sayop nga mga tinguha, hinumdomi nga makapili ka kon unsay imong buhaton. Sukli ang maong mga tinguha. Langkata kini sa imong hunahuna. Ayaw tugoting magpadayon ang imoral nga mga pantasya. Si Troy, nga adik kaniadto sa pornograpiya sa Internet, miingon: “Gisuklan gyod nako ang sayop nga hunahuna pinaagi sa paghunahunag positibong mga butang. Dili kadto sayon. Daghang beses ko natental. Pero sa ulahi nakakat-on ko sa pagkontrol sa akong hunahuna.” Si Elsa, nga nakigbisog sa imoral nga tentasyon niadtong tin-edyer pa, nahinumdom, “Pinaagi sa pagkapuliki ug  pag-ampo kang Jehova, nakontrolar nako ang sayop nga mga hunahuna.”

Sulayi kini: Kon makahunahuna kag imoral nga mga butang, pag-ampo dayon. Sukli ang sayop nga hunahuna pinaagi sa paghunahunag “bisan unsang butang matuod, bisan unsang butang nga maugdang, bisan unsang butang matarong, bisan unsang butang maputli, bisan unsang butang hiligugmaon, bisan unsang butang dungganon, kon aduna may pagkahamili ug kon aduna may butang nga dalayegon.”Filipos 4:8.

Paagi 3: Bantayi ang Imong mga Lakang

Dihang ang tinguha, tentasyon, ug kahigayonan mag-abot, mahimong moresulta dayon kinig problema. (Proverbio 7:6-23) Unsay imong himoon aron malikayan kini?

“Mag-Internet lang ko kon may kauban ko sa balay”

Ang Bibliya nagtambag: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot.” (Proverbio 22:3) Busa bantayi ang imong mga lakang. Hunahunaa daan ang mga situwasyon nga posibleng makapatunghag problema, ug likayi kana. (Proverbio 7:25) Si Filipe, nga nakabuntog sa iyang pagkaadik sa pornograpiya, miingon: “Gibutang nako ang computer sa lugar nga makita sa akong pamilya ug nag-install kog Internet filter software. Mag-Internet lang ko kon may kauban ko sa balay.” Si Troy, nga gihisgotan ganina, miingon usab: “Naglikay ko sa pagtan-awg mga salida nga makapukaw sa sekso ug sa pagpakig-uban sa mga tawong bastos manulti bahin sa sekso. Gusto nakong panalipdan ang akong kaugalingon.”

Sulayi kini: Susiha kon unsa gyoy imong mga kahuyangan, ug likayi ang mga kahimtang nga magladlad nimo sa tentasyon.Mateo 6:13.

AYAWG KALUYA!

Komosta kon bisan pa sa imong pagpaningkamot natental gihapon ka? Ayawg kaluya ug padayon sa pagpaningkamot. Ang Bibliya nag-ingon: “Ang tawong matarong mahimong matumba sa makapito, ug siya mobangon gayod.” (Proverbio 24:16) Oo, ang atong langitnong Amahan nagdasig kanato nga “mobangon.” Dawaton ba nimo ang iyang mahigugmaong tabang? Nan ayawg hunong sa pag-ampo. Lig-ona ang imong pagtuo pinaagi sa pagtuon sa iyang Pulong. Lig-ona ang imong determinasyon pinaagi sa pagtambong sa Kristohanong mga tigom. Salig sa saad sa Diyos: “Ako magapalig-on kanimo. Ako sa pagkatinuod magatabang kanimo.”Isaias 41:10.

Si Cody, nga gihisgotan sa sinugdanan, miingon: “Naningkamot kog maayo nga mabuntog ang akong pagkaadik sa pornograpiya. Kadaghan ko natental, pero sa tabang sa Diyos, milampos ra gyod ko.” Si Dylan, nga gihisgotan usab ganina, miingon: “Dali ra gyod untang mosugot nga makigsekso sa akong kauban sa trabaho, pero mibalibad gyod ko. Nindot kaayo ang pamati nga hinlo ang akong konsensiya. Labaw sa tanan, nahibalo ko nga napalipay nako si Jehova.”

Kon dili ka magpadala sa tentasyon, makasalig ka nga malipay usab ang Diyos kanimo!Proverbio 27:11.

^ par. 2 Ang mga ngalan niining artikuloha giusab.

Pagkat-og Dugang

Sa Unsang Paagi Makabenepisyo Kita sa mga Prinsipyo sa Bibliya?

Si Jesus naghisgot nga kita nagkinahanglag giya ug kon unsa ang duha ka prinsipyo sa Bibliya nga labing hinungdanon.