Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE PEBRERO 2014

 ANG BIBLIYA MAKABAG-O SA KINABUHI

“Ang Saad sa Usa ka Paraisong Yuta Nakabag-o sa Akong Kinabuhi”

“Ang Saad sa Usa ka Paraisong Yuta Nakabag-o sa Akong Kinabuhi”
  • NATAWO: 1974

  • NASOD: LATVIA

  • KANIADTO: ARISGADONG MAGLULUMBAG MOTORSIKLO

KAAGI:

Natawo ko sa Riga, ang kaulohan sa Latvia. Si Mama maoy nagpadako nako ug sa akong magulang nga babaye. Bisag Katoliko si Mama, mosimba ra mi kon may relihiyosong kasaulogan. Nagtuo ko nga dunay labawng makagagahom, apan ingong batan-on, nalinga ko sa ubang butang.

Samtang nagdako ko, namatikdan ni Mama nga duna koy abilidad sa pagbungkag sa usa ka butang ug sa pagbalik niini. Kay daghan mag butang sa balay nga mahimo nakong bungkagon, dili ko niya ibilin nga mag-inusara. Mao nga iya kong gipalitag dulaan nga maasembol, nga maoy akong asembolon ug bungkagon. Kini nakatabang nako sa lain pa nakong hilig—pagmotorsiklo. Gipaapil ko ni Mama sa usa ka lumba sa motor nga gitawag ug Zelta Mopēds (The Golden Moped). Nagsugod ko sa bisikletang demotor (moped), ug sa ulahi, sa motorsiklo na.

Dali ra kaayo kong nahanite ug sa wala madugay nahimo kong malamposon niining peligrosong sport. Katulo ko nahimong kampeyon sa superbike sa Latvia, ug kaduha sa Baltic State Superbike Championship.

GIBAG-O SA BIBLIYA ANG AKONG KINABUHI:

Dihang malamposon na kaayo ang akong karera, nahimamat sa akong trato nga si Evija (sa ulahi naasawa nako) ang mga Saksi ni Jehova. Siya nakakaplag ug pipila sa ilang basahon nga may kupon alang sa paghangyog pagtuon sa Bibliya. Iya ning gipil-apan ug gipadala. Wala madugay, duha ka Saksi ang mibisita niya, ug misugod siya pagtuon sa Bibliya uban nila. Okey lang to nako, apan niadtong panahona, wala pa koy interes sa relihiyon.

Sa ulahi, gidapit ko sa mga Saksi nga moapil sa pagtuon sa Bibliya uban kang Evija. Miapil pod ko, ug giganahan ko sa akong nadunggan. Ang usa ka butang nga nakatandog sa akong kasingkasing mao ang gisaad sa Bibliya nga paraisong  yuta. Pananglitan, gipakita kanako ang teksto sa Salmo 37:10, 11, nga nag-ingon: “Sa dili na madugay, ug ang daotan mawala na; ug pagasusihon mo gayod ang iyang dapit, ug siya mawala diha. Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” Natandog gyod ko niini nga saad.

Miuswag ang akong interes sa espirituwal nga mga butang. Akong naamgohan kon unsa diay ka daghan ang relihiyosong kabakakan. Sa kasukwahi, nakadayeg ko sa mga pagtulon-an sa Bibliya kay kini tin-aw ug lohikal.

Samtang nagpadayon ko sa pagtuon sa Bibliya, nakat-onan nako kon unsa ka bililhon ang kinabuhi alang kang Jehova. (Salmo 36:9) Kini nakaapektar gayod sa akong karera—dili na nako gustong ipameligro ang akong kinabuhi. Gusto nako kining gamiton sa paghimaya kang Jehova. Busa ang dungog, himaya, ug kahinam sa pagpakiglumba dili na hinungdanon kanako.

Akong nasabtan nga may tulubagon ko sa Maghahatag sa kinabuhi

Pagka-1996, mitambong kog internasyonal nga kombensiyon sa mga Saksi ni Jehova sa Tallinn, Estonia, nga duol ra sa estadyum diin ako sagad moapil sa mga lumba sa motorsiklo. Sa kombensiyon, akong nakita ang mga tawo gikan sa lainlaing nasod nga nagkahiusa ug nagmalinawon. Pananglitan, dihang may Saksi nga nawad-ag pitaka, nagtuo ko nga dili na gayod to mabalik niya. Apan wala madugay, nakit-an kini sa laing Saksi ug giuli kini nga wala makuhai. Daw dili ko makatuo niadto! Nasabtan nako karon nga ang mga Saksi nagkinabuhi gayod uyon sa hataas nga mga prinsipyo sa Bibliya. Kami ni Evija padayon nga miuswag sa among pagtuon, ug sa 1997 kami nabawtismohan ingong Saksi ni Jehova.

MGA KAAYOHAN NGA AKONG NABATONAN:

Ang pipila nako ka higala nangamatay tungod sa ilang mapatuyangong kinabuhi ingong maglulumbag motorsiklo. Sa akong pagtuon sa Bibliya, akong nasabtan nga may tulubagon ko sa Maghahatag sa kinabuhi, si Jehova. Lagmit mao nay nakaluwas sa akong kinabuhi.

Sulod sa upat ka tuig, kami ni Evija nakapribilehiyo sa pag-alagad ingong bug-os-panahong mga ministro sa sangang buhatan sa mga Saksi ni Jehova sa Riga. Karon malipayon ming nagmatuto sa among anak nga babaye, si Alise, ug nagtabang kaniya nga molalom ang iyang gugma kang Jehova. Nakapribilehiyo sab ko sa pagboluntaryog usa ka adlaw kada semana aron sa pagmentinar sa mga sakyanan ug ubang gamit sa translation office. Malipayon gyod ko nga maggamit ang kahanas nga akong naugmad sa bata pa ko! Oo, mamungkag gihapon kog mga butang ug magbalik niini.

Gipabilhan gyod nako ang pribilehiyo sa pagsangyaw bahin sa bugtong matuod nga Diyos uban sa akong pamilya, tungod kini sa akong nakat-onan sa Bibliya. Sa pagkatinuod, ang saad sa usa ka paraisong yuta nakabag-o sa akong kinabuhi!