Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE OKTUBRE 2013

 PANGUNANG TOPIKO | UNSAY MENSAHE SA BIBLIYA?

Maayong Balita Alang sa Tanan

Maayong Balita Alang sa Tanan

Tungod sa pagkabanhaw ni Jesus, mas milig-on ang pagtuo sa iyang mga tinun-an ug sila nahimong mas masiboton. Pananglitan, si apostol Pablo mipanaw sa tibuok Asia Minor ug sa Mediteranyo, nga nag-organisar ug mga kongregasyon ug nagdasig sa mga Kristohanon sa pagbarog nga malig-on batok sa moral nga mga pagpit-os ug sa grabeng paglutos. Bisan pa sa maong mga kalisdanan, daghan ang nahimong Kristohanon.

Sa ulahi, si Pablo gibilanggo. Bisan pa niana, siya nagpadalag mga sulat sa pagdasig ug tambag alang sa Kristohanong mga kongregasyon. Siya nagpasidaan bahin sa mas dako pang kapeligrohan—ang apostasya. Kay giniyahan sa balaang espiritu sa Diyos, napanan-aw na ni Pablo nga ang ‘bangis nga mga lobo’ nga ‘magtuis sa kamatuoran’ mosulod sa ilang taliwala ‘aron makakuhag mga sumusunod.’—Buhat 20:29, 30, Ang Biblia—Bag-ong Hubad nga Binisaya.

Sa hinapos sa unang siglo, nagsugod kini nga apostasya. Nianang panahona, ang binanhawng si Jesus naghatag kang apostol Juan sa pinadayag, usa ka simbolikong paglantaw sa umaabot. Sumala sa gisulat ni Juan, ang mga magsusupak ug mini nga mga magtutudlo dili gayod makapugong sa Diyos sa pagtuman sa iyang orihinal nga katuyoan alang sa yuta ug sa katawhan. Ang “matag nasod ug tribo ug pinulongan ug katawhan” makadungog sa maayong balita bahin sa Gingharian sa Diyos. (Pinadayag 14:6) Ang Paraiso mapasig-uli sa yuta, ug si bisan kinsa nga buot motuman sa kabubut-on sa Diyos mahimong bahin niana!

Dili ba usa kana ka “maayong balita”? Kon mao, pagsusi pag dugang bahin sa mensahe sa Diyos alang sa katawhan nga makita diha sa Bibliya ug kon sa unsang paagi kana makahatag nimog kaayohan karon ug sa umaabot.

Mabasa nimo mismo ang Bibliya online sa www.jw.org/ceb. Niana nga Web site, mabasa usab nimo ang mga brosyur nga Ang Bibliya—Unsay Mensahe Niini? ug ang Maayong Balita Gikan sa Diyos! maingon man ang librong Unsay Tinuod nga Gitudlo sa Bibliya? lakip na ang ubang publikasyon nga naghisgot kon nganong makasalig kita sa Bibliya ug kon sa unsang paagi nato mapadapat ang praktikal nga tambag diha sa atong pamilya ug sa atong kaugalingon. O pangutan-a ang mga Saksi ni Jehova alang sa dugang impormasyon.

Gibase sa Buhat, Efeso, Filipos, Colosas, Filemon, 1 Juan, Pinadayag.