Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Hulyo 2013

Pagpalampos sa Ikaduhang Kaminyoon

Pagpalampos sa Ikaduhang Kaminyoon

 SEKRETO SA KALIPAY SA PAMILYA

Pagpalampos sa Ikaduhang Kaminyoon

HERMAN: * “Namatay ang akong unang asawa sa kanser human sa among 34 ka tuig nga kaminyoon. Pagkaminyo nakog usab, ang akong asawang si Linda mibati nga kanunay ko siyang gikomparar sa una kong asawa. Unya, kanunay pang hisgotan sa akong daang mga higala ang maayong mga hiyas sa akong asawa nga namatay, ug kadto mas nakapapikal kang Linda.”

LINDA: “Pagkaminyo namong Herman, gibati nakong wa pabilhi kay gitandi ko kanunay sa iyang unang asawa. Siya dinayeg kaayo, lumo manulti, ug pinog lihok. Usahay makahunahuna kong di gyod ko masuod niya sama sa iyang unang asawa.”

Gidiborsiyohan ni Linda ang iyang unang bana. Nalipay sila ni Herman nga nakaplagan nila ang usag usa. Pero, ilang giila nga lagmit makasagubang silag mga problemang wala sa unang kaminyoon. *

Kon naminyo kag usab, komosta ang imong ikaduhang kaminyoon? Si Tamara, nga naminyog usab tulo ka tuig human sa iyang diborsiyo, miingon: “Sa una nimong pagminyo, mobati ka nga mohangtod ang inyong kaminyoon. Apan dili na nimo kana bation sa ikaduhang kaminyoon kay nahibalo ka nga natapos ang una nimong kaminyoon.”

Bisan pa niana, daghang magtiayon ang nagmalipayon human maminyog usab. Napalampos nila ang ilang kaminyoon—ug mahimo usab nimo kana!  Sa unsang paagi? Tagda ang tulo ka komong hagit ug kon sa unsang paagi ang mga prinsipyo sa Bibliya makatabang nimo sa pag-atubang niini. *

HAGIT 1: MALISDAN KA SA PAGKALIMOT SA IMONG UNANG KAMINYOON.

“Di nako malaksi sa akong panumdoman ang una kong kaminyoon, ilabina kon moadto mi sa mga lugar nga gibakasyonan namo sa akong unang bana,” matod ni Ellen, nga nagpuyo sa South Africa. “Usahay kini mosangko nga akong ikomparar ang bana nako karon ug ang sa una.” Sa laing bahin, kon ang imong kapikas minyo sa nangagi, mahimong maglagot ka kon ang imong kapikas magsigeg hisgot bahin sa iyang miaging kaminyoon.

SUGYOT: Ayawg dahoma nga basta malimtan lang nimo o sa imong kapikas ang unang kaminyoon, ilabina kon milungtad kadtog daghang katuigan. Gani, ang uban moingong malitok nila ang ngalan sa unang kapikas dihang motawag sa ikaduha nilang kapikas. Unsay imong himoon sa maong situwasyon? “Paningkamoti nga magsinabtanay kamo sa usag usa,” nagtambag ang Bibliya.—1 Pedro 3:8, New Century Version.

Ayaw idili ang paghisgot sa unang kaminyoon tungod sa pagkaabughoan. Kon gustong hisgotan sa imong kapikas ang iyang kaminyoon kaniadto, pamati uban ang simpatiya ug kahangawa. Lain pa, ayawg hinapos dayon nga gitandi ka sa unang kapikas. “Wa ko did-i sa akong asawang si Kaitlyn sa paghisgot sa akong asawa nga namatay,” matod ni Ian, kinsa naminyog usab napulo ka tuig kanhi. “Hinuon giisip niya kana ingong paagi nga masayran kon unsay nakapaugmad sa akong personalidad karon.” Mas makapasuod pa gani kana kaninyong magtiayon.

Pabilhi ang talagsaon ug maayong mga hiyas sa imong kapikas karon. Tinuod, ang imong kapikas dili samag hiyas ug abilidad sa imong unang kapikas. Apan lagmit duna siyay laing maayong mga hiyas ug abilidad. Busa, lig-ona ang inyong kaminyoon karon, “dili sa pagtandi sa laing tawo,” apan pinaagi sa pagpalandong ug pag-apresyar kon unsay imong nagustohan sa imong kapikas. (Galacia 6:4) Si Edmond, nga kaduha na maminyo, miingon, “Ingon nga ang duha ka panaghigalaay dili managsama, mao man sab ang duha ka kaminyoon.”

Sa unsang paagi mahisgotan nimo ang maayong kasinatian sa una nimong kaminyoon nga dili masakitan ang bag-o nimong kapikas? “Gipatin-aw nako sa akong asawa nga ang una kong kaminyoon samag librong gisulat namo sa una kong asawa,” matod ni Jared. “Usahay buksan ug basahon ko kini ug pamalandongon ang malipayon namong kasinatian. Apan wala ako magkinabuhi sumala nianang libroha. Hinuon, ako ug ang akong asawa nagsulat ug kaugalingon namong libro, ug nagkinabuhi ko niini karon nga malipayon.”

SULAYI KINI: Pangutan-a ang imong kapikas kon dili ba siya mapikal kon mahisgotan ang unang kaminyoon. Sayra kon kanus-a nga dili maayong hisgotan ang unang kaminyoon.

HAGIT 2: MALISDAN KANG MAKIG-UBAN SA DAANG MGA HIGALA NGA WALA MAKAILA SA IMONG BAG-ONG KAPIKAS.

“Human sa among kasal, gibati sa akong asawa nga siya gipanid-an sa pipila nako ka higala,” matod ni Javier, nga naminyog otro unom ka tuig human sa iyang diborsiyo. Lahi nga situwasyon ang giatubang sa usa ka bana nga ginganlag Leo. Siya miasoy, “May nagsulti sa akong asawa nga nagustohan kaayo nila ang iyang kanhing bana ug gimingaw sila niya—sa akong atubangan mismo!”

SUGYOT: Sulayi kuno nga ibutang ang imong kaugalingon sa ilang lugar. “Tingalig lisdan ug bakikawan pa usahay ang daang mga higala nga makig-uban sa bag-ong kapikas nga wala nila mailhi,” matod ni Ian, nga gihisgotan ganiha. Busa ‘magmakataronganon, magpasundayag ug bug-os nga kalumo sa tanang tawo.’ (Tito 3:2) Ayawg damha nga madawat dayon sa imong mga higala ug pamilya ang bag-o nimong kapikas. Kay nausab man ang imong kaminyoon, ingon man sab ang relasyon uban sa mga higala. Si Javier, nga gikutlo ganiha, nag-ingon nga sa ngadtongadto, silang magtiayon nasuod na sab sa daang mga higala. “Apan kaming duha naningkamot sab nga makabatog bag-ong mga higala,” siya midugang, “ug nakatabang kana kanamo.”

 Tagda ang pagbati sa imong kapikas dihang makig-uban sa daang mga higala. Pananglitan, kon mahisgotan ang imong unang kaminyoon, magmataktikanhon ug magmaalamon aron ang imong bag-ong kapikas dili mobating walay labot. “Kon ang usa mosultig mga pulong nga walay paghunahuna,” matod sa usa ka proverbio sa Bibliya, “nan kana nga mga pulong makasamad samag espada. Apan ang tawong maalamon mag-amping sa iyang isulti. Ang iyang mga pulong makaalim sa maong samad.”—Proverbio 12:18, Holy Bible—Easy-to-Read Version.

SULAYI KINI: Hunahunaa kon unsang mga okasyon nga bakikawan ka o ang imong kapikas. Hisgoti ninyo daan kon unsaon pagtubag ang mga pangutana ug komento sa imong mga higala bahin sa unang kaminyoon.

HAGIT 3: MALISDAN KA SA PAGSALIG SA IMONG BAG-ONG KAPIKAS KAY GILUIBAN KA SA IMONG UNANG KAPIKAS.

“Nahadlok ko kaniadto nga luiban na sab ko,” matod ni Andrew, nga gibiyaan sa iyang unang asawa. Sa ulahi siya naminyo kang Riley, iyang asawa karon. “Kanunayng mosantop sa akong hunahuna kon mahimo ba kong buotang bana kang Riley, sama sa iyang unang bana. Nabalaka gani ko nga basin makadesidir siya nga dili ko takos ug iya kong ilisan.”

SUGYOT: Isulti sa imong kapikas ang imong gikabalak-an. “Mapakyas ang mga plano kon walay kompidensiyal nga panagsultihanay,” nag-ingon ang Bibliya. (Proverbio 15:22) Ang kompidensiyal nga panagsultihanay ngadtongadto nakatabang kang Andrew ug Riley nga mosalig sa usag usa. “Giingnan ko si Riley nga para nako ang diborsiyo dili solusyon sa mga problema,” matod ni Andrew, “ug kana poy hunahuna ni Riley. Sa kataposan, bug-os nakong misalig kaniya.”

Kon ang imong bag-ong kapikas giluiban sa kanhi niyang kapikas, paningkamoti gayod nga maangkon ang iyang pagsalig. Pananglitan, si Michel ug Sabine, kansang unang mga kaminyoon natapos sa diborsiyo, nagkasabot nga isulti nila sa usag usa kon mahibalag ang kanhi nilang kapikas. “Kini nga kasabotan nakatabang namo nga mobatig kasegurohan,” matod ni Sabine.—Efeso 4:25.

SULAYI KINI: Limitihi ang pribadong komunikasyon sa kaatbang nga sekso, sa personal, telepono, o online.

Daghang ikaduhang kaminyoon ang malamposon, ug mahimong molampos sab ang imoha. Ngani, kon itandi sa una nimong pagkaminyo, lagmit mas nakaila na ka sa imong kaugalingon. “Nakasinati kog dakong kahupayan sa among panagtiayon ni Riley,” matod ni Andrew, nga gikutlo ganiha. “Human sa 13 ka tuig nga kaminyoon, suod kaayo ang among relasyon—nga dili gyod namo buot wad-on.”

[Mga footnote]

^ par. 3 Ang mga ngalan giilisan.

^ par. 5 Hinuon, magkalahi ang pagbati ug situwasyon dihang matapos ang kaminyoon sa diborsiyo o kamatayon. Kini nga artikulo motabang sa pagpalampos sa ikaduhang kaminyoon.

^ par. 7 Alang sa kasayoran bahin sa mga hagit sa pagmatutog mga humabdos, tan-awa ang serye sa mga artikulo, “Mga Sekreto sa Malamposong Pamilya nga May Humabdos,” sa Abril 2012 nga gula sa Pagmata! nga gipatik sa mga Saksi ni Jehova.

PANGUTAN-A ANG IMONG KAUGALINGON . . .

▪ Unsa ang pipila ka talagsaong hiyas sa akong kapikas nga akong gipabilhan?

▪ Kon mahisgotan ang akong unang kaminyoon, unsay akong himoon aron ang akong kapikas dili masakitan ug dili mobating sinalikway?

[Hulagway sa panid 8]

[Hulagway sa panid 10]

Paghimog halandomong kalihokan ingong magtiayon