Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Hulyo 2013

Siya ‘Nagbuhong sa Atong mga Kasingkasing’

Siya ‘Nagbuhong sa Atong mga Kasingkasing’

 PAKIGSUOD SA DIYOS

Siya ‘Nagbuhong sa Atong mga Kasingkasing’

Nagtagad ba si Jehova kanato, o siya ba wala magpakabana sa kahimtang sa mga tawo sa yuta? Ang tubag sa Bibliya niana makapalipay. Ang Diyos nagtagad gayod sa mga tawo, ug buot niyang magmalipayon ta. Matag adlaw, ang mga tawo, bisan kadtong ingrato, makabenepisyo sa iyang pagkamaayo. Tagda ang giingon ni apostol Pablo.—Basaha ang Buhat 14:16, 17.

Ang mga tawo sa siyudad sa Listra, nga dili magsisimba sa Diyos, giingnan ni apostol Pablo: ‘Sa miaging mga kaliwatan gitugotan sa Diyos ang tanang kanasoran nga molakaw sa ilang mga dalan, bisan tuod nga, sa pagkatinuod, wala niya itugot nga dili kapanghimatud-an ang iyang kaugalingon sanglit gibuhat man niya ang maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kalipay.’ Unsay kahulogan niini alang sa mga mamiminaw ni Pablo?

Nasabtan dayon sa mga tawo sa Listra nga tinuod ang mga pulong ni Pablo. Sila mga mag-uuma ug nagpuyo sa tabunok ug maayong pagkatubig nga rehiyon. Apan, sumala sa gipahinumdom kanila ni Pablo, ang Diyos mao ang Tinubdan sa ulan ug sa mabungahong mga panahon. Busa, sa matag higayong sila daghag ani ug makakaog lami, sila nakabenepisyo sa pagkamaayo sa Diyos.

Daghan kitag makat-onan bahin kang Jehova sa mga pulong ni Pablo ngadto sa mga taga-Listra.

Si Jehova naghatag kanatog kagawasan sa pagpili. Matikding gitugotan ni Jehova ang tanang Hentil nga nasod nga “molakaw sa ilang mga dalan.” Usa ka reperensiya alang sa mga maghuhubad sa Bibliya nag-ingon nga kini nga ekspresyon mahimong nagkahulogang “pagbuhat kon unsay ilang gusto” o “pagbuhat sa gihunahuna nilang maayo.” Si Jehova dili mopugos kang bisan kinsa sa pagsimba kaniya. Gihatagan ta niyag kagawasan—ang pagpili sa atong kaugalingong dalan sa kinabuhi.—Deuteronomio 30:19.

Buot ni Jehova nga kita makaila kaniya. Wala niya itugot nga ‘dili kapamatud-an ang iyang kaugalingon,’ si Pablo nagpatin-aw. Ang reperensiya nga gihisgotan ganiha nag-ingong kini nga prase mahubad nga “tin-aw niyang gipakita sa mga tawo kon unsang matanga siya sa Diyos.” Ang kalalangan sa Diyos nagpamatuod gayod sa iyang “dili-makita nga mga hiyas,” lakip ang iyang pagkamaayo, kaalam, gahom, ug gugma. (Roma 1:20) Mas gipadayag ni Jehova ang iyang kaugalingon diha sa Bibliya. (2 Timoteo 3:16, 17) Di ba nagpakita kana nga buot gyod niyang makaila kita kaniya?

Buot ni Jehova nga kita magmalipayon. Siya ‘nagbuhong sa atong mga kasingkasing sa pagkaon ug sa kalipay,’ matod ni Pablo. Bisan ang makasasala nga wala moila kang Jehova makakaon sa iyang katagbawan ug makasinatig kalipay sa kinabuhi. Apan buot sa Diyos nga kita makatagamtam sa tinuod ug dumalayong kalipay. Posible lang kana kon atong makat-onan ang kamatuoran bahin kaniya ug ipadapat kini sa atong kinabuhi.—Salmo 144:15; Mateo 5:3.

Kitang tanan makabenepisyo sa pagkamaayo ni Jehova matag adlaw. Nan, nganong dili nimo susihon kon sa unsang paagi makapasalamat ka sa Diyos nga ‘nagbuhong sa imong kasingkasing sa pagkaon ug sa kalipay’?

Sugyot nga pagbasa sa Bibliya sa Hulyo

Buhat 11-28

[Blurb sa panid 11]

Matag adlaw, ang mga tawo, bisan kadtong ingrato, makabenepisyo sa iyang pagkamaayo