Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE ABRIL 2013

 PAKIGSUOD SA DIYOS

“Padayon sa Pagpangayo, ug Kini Igahatag Kaninyo”

“Padayon sa Pagpangayo, ug Kini Igahatag Kaninyo”

“Ginoo, tudloi kami kon unsaon sa pag-ampo.” (Lucas 11:1) Mao nay gihangyo sa usa sa mga tinun-an ni Jesus. Ingong bahin sa iyang tubag, si Jesus nag-asoyg duha ka ilustrasyon nga nagtudlo nato kon unsaon pag-ampo nga dunggon sa Diyos. Kon nagduhaduha ka kon dunggon ba sa Diyos ang imong mga pag-ampo, mainteres ka sa tubag ni Jesus.—Basaha ang Lucas 11:5-13.

Ang unang ilustrasyon nasentro sa nag-ampo. (Lucas 11:5-8) Sa maong asoy, ang usa ka lalaki naabtag bisita sa tungang-gabii ug wala siyay pagkaon nga ikadalit niini. Busa, bisag gabii nang dako, siya nagdali-dalig adto sa balay sa iyang higala aron mamaylog pipila ka tinapay. Sa sinugdan, ang iyang higala nagpanuko sa pagbangon kay natulog na ang pamilya niini. Apan tungod sa iyang padayong paghangyo, mibangon ra ang iyang higala ug gihatagan siya sa iyang gikinahanglan. *

Unsay gitudlo kanato sa maong ilustrasyon bahin sa pag-ampo? Si Jesus nagtudlo kanato nga angay tang magmapinadayonon—magpadayon sa pagpangayo, pagpangita, ug pagpanuktok. (Lucas 11:9, 10) Ngano? Nagpasabot ba si Jesus nga ang Diyos magpanuko sa pagpamati sa atong mga pag-ampo, nga kinahanglan pa nato siyang pugson? Wala. Gipasiugda lang ni Jesus nga dili sama sa nagpanukong higala, ang Diyos andam mohatag sa nahiangayng mga hangyo niadtong nagtuo kaniya. Atong ikapakita ang maong pagtuo pinaagi sa pagkamapinadayonon. Pinaagi sa balikbalik nga pagpangayo, atong gipakita nga gikinahanglan gyod nato ang atong gipangayo ug bug-os kitang nagtuo nga ang Diyos makahatag niana—kon uyon kana sa iyang kabubut-on.—Marcos 11:24; 1 Juan 5:14.

Ang ikaduhang ilustrasyon nasentro sa “Tigpatalinghog sa pag-ampo,” si Jehova. (Salmo 65:2) Si Jesus nangutana: “Kinsang amahana taliwala kaninyo nga, kon ang iyang anak mangayog isda, tingali maghatag kaniyag serpente inay isda? O kon siya usab mangayog itlog, hatagan siyag tanga?” Tataw ang tubag—walay mahigugmaong amahan nga mohatag ug makadaot nga butang sa iyang mga anak. Dayon gipatin-aw ni Jesus ang ilustrasyon: Kon ang dili-hingpit nga tawhanong mga amahan “mohatag ug maayong mga gasa” ngadto sa ilang mga anak, “unsa ka labaw pa gayod nga ang inyong Amahan sa langit mohatag ug balaang espiritu”—ang kinamaayohang gasa—ngadto sa iyang yutan-ong mga anak nga nangayo kaniya! *Lucas 11:11-13; Mateo 7:11.

Ang Diyos andam mohatag sa nahiangayng mga hangyo niadtong nagtuo kaniya

Unsay gitudlo niini nga ilustrasyon bahin kang Jehova, ang “Tigpatalinghog sa pag-ampo”? Giawhag kita ni Jesus nga isipon si Jehova ingong mahigugmaong Amahan nga andam motagana sa mga panginahanglan sa iyang mga anak. Busa ang iyang mga alagad makahangyo kaniya sa bisan unsang panahon. Ug kay nahibalong gusto sa Diyos ang labing maayo alang kanila, andam silang modawat sa tubag sa ilang mga hangyo, bisag dili kana ang ilang gidahom. *

Sugyot nga pagbasa sa Bibliya sa Abril

Lucas 7-21

^ par. 4 Makita sa ilustrasyon ni Jesus ang kostumbre sa mga Hudiyo kaniadto. Alang nila ang pag-abiabi maoy sagradong responsabilidad. Ang usa ka pamilya maglutog tinapay nga igo lang nianang adlawa, busa naandan nilang mamaylo kon mahutdan silag tinapay. Gawas pa, kon kabos ang pamilya, sila mag-ipog katulog diha sa salog sa usa ka lawak.

^ par. 6 Si Jesus sagad naggamit sa pangatarongang “unsa ka labaw pa gayod” aron ipasiugda nga ang Diyos mas maayo kay sa tawo.

^ par. 7 Aron makakat-og dugang kon unsaon pag-ampo nga dunggon sa Diyos, tan-awa ang kapitulo 17 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.