Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Pebrero 2013

 ANG BIBLIYA MAKABAG-O SA KINABUHI

“Gusto Nilang Masayran Nako Mismo kon Unsay Giingon sa Bibliya”

“Gusto Nilang Masayran Nako Mismo kon Unsay Giingon sa Bibliya”
  • NATAWO: 1982
  • NASOD: DOMINICAN REPUBLIC
  • KANIADTO: GIPADAKO INGONG MORMON

KAAGI:

Natawo ko sa Santo Domingo, Dominican Republic, ang kamanghoran sa upat ka anak. Edukado ang akong ginikanan ug gusto nilang magdako mi uban sa maayo ug matinud-anong mga tawo. Upat ka tuig una ko matawo, nahimamat sa akong ginikanan ang mga misyonaryong Mormon. Kay nakadayeg sa kadesente ug kabuotan sa maong mga batan-on, wala madugay nakadesidir ang akong ginikanan nga moanib sa Church of Jesus Christ of Latter-day Saints, o ang Mormon Church. Ang among pamilya maoy usa sa unang mga pamilya sa isla nga namembro niini.

Samtang nagdako, ganahan kong moapil sa mga kalihokan sa simbahan ug nagtamod sa pagpabili niini sa pamilyahanong kinabuhi ug moral nga sukdanan. Mapasigarbohon ko sa akong pagka-Mormon ug tumong nako nga magmisyonaryo.

Sa nag-edad kog 18, ang among pamilya namalhin sa United States aron makaeskuyla ko sa usa ka maayong unibersidad. Mga usa ka tuig sa ulahi, ang akong iyaan ug uyoan nga mga Saksi ni Jehova miduaw namo sa Florida. Gidapit mi nila sa pagtambong sa usa ka kombensiyon bahin sa Bibliya. Nakadayeg ko kay ang tanan sa akong palibot nag-ablig Bibliya ug nagnota. Busa nangayo kog bolpen ug papel ug nagnota usab.

Human sa kombensiyon, miingon ang akong iyaan ug uyoan nga kay gusto man kong magmisyonaryo, makatabang sila nako sa pagkat-on bahin sa Bibliya. Naghunahuna ko nga maayo nang ideyaha kay niadtong panahona, mas sinati ko sa Book of Mormon kay sa Bibliya.

GIBAG-O SA BIBLIYA ANG AKONG KINABUHI:

Sa dihang maghisgot mi sa Bibliya pinaagig telepono, ang akong iyaan ug uyoan kanunayng magdasig nako nga itandi ang akong gituohan ngadto sa mga pagtulon-an sa Bibliya. Gusto nilang  masayran nako mismo kon unsay giingon sa Bibliya.

Daghan kog gidawat nga pagtulon-an sa Mormon, apan dili ko segurado kon gipaluyohan ba kana sa Kasulatan. Gipadalhan ko sa akong iyaan sa Nobyembre 8, 1995 nga gula sa magasing Pagmata!, nga gipatik sa mga Saksi ni Jehova. May mga artikulo kini bahin sa Mormon. Natingala ko kay daghan pa diayng pagtulon-an sa Mormon ang wala nako mahibaloi. Busa, akong gisusi ang Web site sa Mormon aron matino kon tinuod ba ang giingon sa Pagmata! Tinuod gyod diay, ug napamatud-an pa kini dihang miadto ko sa mga museyo sa Mormon sa Utah.

Abi gyod nakog magkauyon ang Book of Mormon ug ang Bibliya. Apan sa dihang gibasa nakog maayo ang Bibliya, namatikdan nako ang kalainan tali sa mga pagtulon-an sa Mormon ug sa giingon sa Bibliya. Pananglitan, sa Ezequiel 18:4, ang Bibliya nag-ingon nga ang kalag mamatay. Apan, ang Book of Mormon, sa Alma 42:9, nag-ingon: “Ang kalag dili gayod mamatay.”

Gawas pa sa kalainan sa doktrina, natugaw ko sa nasyonalistikong mga ideya nga gitudlo sa Mormon. Pananglitan, gitudloan ang mga Mormon nga ang tanaman sa Eden nahimutang sa Jackson County, Missouri, U.S.A. Ug ang kadagkoan sa simbahan nag-ingon nga sa dihang “magmando na ang Gingharian sa Diyos, ang bandera sa United States magarbohong magkayabkayab nga walay-lama diha sa flag pole sa kagawasan ug sa managsamang mga katungod.”

Tungod niana, naghunahuna ko kon unsa na lay mahitabo sa ubang nasod, sama sa amoa. Usa ka gabii niana, ako ning gipakig-estorya sa dihang gitawgan ko sa usa ka batan-ong Mormon nga gibansay sa pagkamisyonaryo. Ako siyang gipangutana kon andam ba siyang makig-away batok sa isigka-Mormon kon ang iyang nasod makiggubat sa lain. Nakurat ko sa dihang miingon siyag oo! Nagsusi pa kog dugang sa pagtulon-an sa akong relihiyon ug nangutana sab ko sa mga lider sa Mormon Church. Giingnan ko nga ang tubag sa akong mga pangutana naglangkit ug mga misteryo nga masulbad ra samtang mag-anam ka dan-ag ang kahayag.

Kay nahigawad sa ilang tubag, gisusi nakog maayo ang akong kaugalingon ug ang rason kon nganong gusto kong magmisyonaryo sa Mormon. Akong naamgohan nga gusto kong magmisyonaryo kay buot kong motabang sa uban. Ug gusto pod nakong tahoron ko. Apan kon bahin sa Diyos, wala kaayo koy nahibaloan mahitungod niya. Bisag kadaghan na ko makabasag Bibliya, wala gyod nako ni pabilhi. Wala koy kalibotan kon unsay katuyoan sa Diyos alang sa yuta o sa katawhan.

MGA KAAYOHAN NGA AKONG NABATONAN:

Tungod sa akong pagtuon sa Bibliya uban sa mga Saksi ni Jehova, akong nahibaloan kon unsay ngalan sa Diyos, kon unsay mahitabo inigkamatay, ug kon unsay papel ni Jesus sa pagtuman sa katuyoan sa Diyos. Sa kataposan, daghan na kog nakat-onan niining nindot kaayong basahon, ug nalipay kong ipaambit kana sa uban. Dugay na kong nahibalo nga naglungtad ang Diyos, apan karon makapakigsulti na ko niya ingong akong suod nga Higala diha sa pag-ampo. Nabawtismohan ko ingong Saksi ni Jehova niadtong Hulyo 12, 2004, ug paglabayg unom ka bulan misulod ko sa bug-os-panahong ministeryo.

Lima ka tuig na kong nag-alagad sa tibuok-kalibotang hedkuwarter sa mga Saksi ni Jehova sa Brooklyn, New York. Malipayon kaayo kong makatabang sa pagpatik ug mga Bibliya ug binase sa Bibliyang mga basahon nga makahatag ug kaayohan sa minilyon, ug padayon sab kong nagtabang sa uban nga makakat-on bahin sa Diyos.