Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Pebrero 2013

 Pakigsuod sa Diyos

“Siya Maoy Diyos . . . sa mga Buhi”

“Siya Maoy Diyos . . . sa mga Buhi”

Ang kamatayon ba mas gamhanan kay sa Diyos? Siyempre dili! Ang kamatayon—o ang bisan unsang “kaaway”—dili gayod molabaw sa “Diyos nga Labing Gamhanan.” (1 Corinto 15:26; Exodo 6:3) Ang Diyos may gahom sa pagbalik sa kinabuhi sa namatay pinaagi sa pagkabanhaw, ug siya nagsaad nga buhaton niya kana sa iyang bag-ong kalibotan. * Unsa ka kasaligan ang maong saad? Ang Anak sa Diyos, si Jesus, may gipamulong nga makahatag natog paglaom.—Basaha ang Mateo 22:31, 32.

Sa mga Saduseo, kinsa wala motuo sa pagkabanhaw, si Jesus miingon: “Mahitungod sa pagkabanhaw sa mga patay, wala ba kamo makabasa sa gisulti kaninyo sa Diyos, nga nag-ingon, ‘Ako ang Diyos ni Abraham ug ang Diyos ni Isaac ug ang Diyos ni Jacob’? Siya maoy Diyos, dili sa mga patay, kondili sa mga buhi.” Ang gitumong ni Jesus dinhi mao ang pagpakig-estorya sa Diyos kang Moises diha sa nagdilaab nga tanom niadtong mga 1514 B.C.E. (Exodo 3:1-6) Sumala kang Jesus, ang giingon ni Jehova kang Moises—“Ako ang Diyos ni Abraham ug ang Diyos ni Isaac ug ang Diyos ni Jacob”—nagpaila nga seguradong matuman ang gisaad nga pagkabanhaw. Sa unsang paagi?

Tagda una ang kahimtang. Sa dihang nakigsulti si Jehova kang Moises, ang mga patriarkang si Abraham, Isaac, ug Jacob dugay nang nangamatay—si Abraham sulod na sa 329 ka tuig, si Isaac sulod sa 224, ug si Jacob sulod sa 197. Bisan pa niana, giisip gihapon ni Jehova nga siya ang ilang Diyos. Ang paghisgot ni Jehova kanila daw samag buhi pa sila. Ngano?

Si Jesus misaysay: “Siya [si Jehova] maoy Diyos, dili sa mga patay, kondili sa mga buhi.” Hunahunaa sa makadiyot ang gipasabot nianang mga pulonga. Kon walay pagkabanhaw, nan si Abraham, Isaac, ug Jacob padayong magapos sa kamatayon hangtod sa hangtod. Kon maohon, si Jehova maoy Diyos sa mga patay. Kana, sa baylo, magpasabot nga ang kamatayon mas gamhanan kang Jehova—nga daw wala siyay gahom sa pagluwas sa iyang matinumanong mga alagad gikan sa gapos sa kamatayon.

Nan, unsa may atong ikahinapos bahin kang Abraham, Isaac, Jacob, ug sa tanang matinumanong mga alagad ni Jehova nga nangamatay na? Si Jesus masaligong miingon: “Alang kaniya silang tanan buhi.” (Lucas 20:38) Sa pagkatinuod, ang katuyoan ni Jehova sa pagbanhaw sa iyang matinumanong mga alagad segurado gayong matuman nga siya nag-isip kanila ingong mga buhi. (Roma 4:16, 17) Silang tanan gitipigan ni Jehova sa iyang walay-kinutobang panumdoman hangtod sa iyang gitakdang panahon sa pagbanhaw kanila.

Si Jehova mas gamhanan gayod kay sa kamatayon

Nangandoy ka bang makauban pag-usab ang imong minahal nga namatay na? Kon mao, hinumdomi nga si Jehova mas gamhanan gayod kay sa kamatayon. Walay makapugong niya sa pagtuman sa iyang saad nga banhawon ang mga patay. Nganong dili mokat-og dugang bahin sa gisaad nga pagkabanhaw ug sa Diyos nga maoy motuman niana? Kon buhaton nimo kana, seguradong mas masuod ka kang Jehova, ‘ang Diyos sa mga buhi.’

Sugyot nga pagbasa sa Bibliya sa Pebrero

Mateo 22-28Marcos 1-8

^ par. 3 Aron makakat-og dugang bahin sa saad sa Diyos nga pagkabanhaw diha sa matarong nga bag-ong kalibotan, tan-awa ang kapitulo 7 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.