Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Enero 2013

Sa Among mga Magbabasa

Sa Among mga Magbabasa

Kining magasina gisugdag patik niadtong Hulyo 1879. Sukad niadto daghan na ang kausaban, mao man usab kining magasina. (Tan-awa ang hulagway sa ibabaw.) Sugod niining gulaa, imong makita ang dugang kausaban sa format sa Ang Bantayanang Torre. Unsa ang kalainan?

Sa daghang nasod, nagkadaghan ang mokuhag impormasyon pinaagig Internet ug para nila mas sayon kini. Pinaagi sa pag-click sa mouse, ila dayong makita ang mga site nga kakuhaag impormasyon. Daghang libro, magasin, ug mantalaan ang mabasa sa Internet.

Tungod niini, among gibag-o ang disenyo sa among Web site nga www.jw.org. Mas nindot na kini ug mas daling gamiton. Ang mga mosulod sa site makabasag mga publikasyon sa kapig 430 ka pinulongan. Apan sugod niining bulana, ang mga mosulod sa among Web site makabasa ug piniling mga artikulo nga regular nga makita kanhi sa among pinatik nga magasin pero karon mabasa na lang niini nga Web site. *

Kay daghang artikulo ang mabasa na lang sa Internet, ang publikong edisyon sa Ang Bantayanang Torre mahimong 16 na lang ka panid imbes 32, sugod niining gulaa. Sa pagkakaron, ang Bantayanang Torre gipatik na sa 204 ka pinulongan. Tungod niining bag-ong format, posible nga kining magasina mahubad sa mas daghang pinulongan.

Kami nanghinaot nga kini nga mga kausaban makatabang sa pagpaabot sa makaluwas-ug-kinabuhing mensahe sa Bibliya ngadto sa mas daghang tawo. Determinado kami nga padayong itagana ang makapalamdag ug makapainteres nga impormasyon, inimprenta man o sa Internet, aron makabenepisyo ang daghang magbabasa nga may pagtahod sa Bibliya ug gustong mahibalo kon unsa gayod ang gitudlo niini.

Mga Magpapatik

^ par. 5 Lakip sa mga artikulong makita na lang sa Internet mao ang mosunod: “Alang sa mga Batan-on,” nga gidisenyo aron matun-an sa mga batan-on ang Bibliya, ug “Akong Leksiyon sa Bibliya,” usa ka seryeng gidisenyo aron magamit sa mga ginikanan sa pagtudlo sa ilang anak nga tres anyos paubos.