Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE DISYEMBRE 2012

  Pagkat-on Gikan sa Pulong sa Diyos

Nganong Gipadala sa Diyos si Jesus sa Yuta?

Nganong Gipadala sa Diyos si Jesus sa Yuta?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Diin man si Jesus sa wala pa siya ipadala sa Diyos sa yuta?

Si Jesus nagkinabuhi ingong espiritung persona sa langit sa wala pa siya matawo sa Betlehem. Siya ang unang gilalang sa Diyos ug siya lang ang direktang gilalang niini. Busa, haom siyang tawgong bugtong Anak sa Diyos. Sa langit, sagad siya maoy tigpamaba sa Diyos. Mao nay hinungdan nga gitawag siyag Pulong. Siya nagsilbing magtatabang usab sa Diyos ug nakigbahin sa paglalang sa tanang ubang butang. (Juan 1:2, 3, 14) Si Jesus nagpuyo sa langit uban sa Diyos sulod sa taas nga panahon una pa lalanga ang tawo.—Basaha ang Miqueas 5:2; Juan 17:5.

2. Sa unsang paagi gipadala sa Diyos ang iyang Anak sa yuta?

Gibalhin ni Jehova ang kinabuhi ni Jesus ngadto sa tagoangkan ni Maria pinaagi sa balaang espiritu. Busa si Jesus natawo dili pinaagi sa usa ka tawhanong amahan. Ang mga anghel nagpahibalo sa iyang pagkatawo ngadto sa pipila ka magbalantay, kinsa nagpalabay sa kagabhion sa gawas samtang nagbantay sa ilang mga karnero. (Lucas 2:8-12) Busa, si Jesus wala matawo sa kinabugnawang bahin sa tingtugnaw, kondili sa mga sayong bahin sa Oktubre, sa dihang init pa ang klima. Sa ulahi, si Maria ug ang iyang banang si Jose nagdala kang Jesus sa ilang balay sa Nasaret ug didto siya gipadako. Giatiman ni Jose si Jesus ingong iyang sinagop.—Basaha ang Mateo 1:18-23.

Sa mga 30 anyos na si Jesus, siya nabawtismohan, ug gipahibalo sa Diyos nga si Jesus iyang Anak. Dayon gisugdan ni Jesus ang buluhatong gisugo sa Diyos kaniya.—Basaha ang Mateo 3:16, 17.

 3. Nganong gipadala sa Diyos si Jesus sa yuta?

Gipadala sa Diyos si Jesus aron tudloan ang mga tawo sa kamatuoran. Si Jesus nagtudlo bahin sa Gingharian sa Diyos, usa ka kagamhanan sa langit nga magpatunghag pakigdait sa tibuok yuta. Iyang gitagana ang paglaom nga mabuhi sa dayon. (Juan 4:14; 18:36, 37) Siya nagtudlo usab ug daghang butang bahin sa pagpangitag tinuod nga kalipay. (Mateo 5:3; 6:19-21) Siya nagtudlo pinaagig panig-ingnan. Pananglitan, iyang gipakita kon sa unsang paagi buhaton ang kabubut-on sa Diyos bisan sa lisod nga kahimtang. Sa dihang gimaltratar, siya wala mobalos.—Basaha ang 1 Pedro 2:21-24.

Gitudloan ni Jesus ang iyang mga sumusunod ug masakripisyohong gugma. Siya daghag pribilehiyo sa langit uban sa iyang Amahan, bisan pa niana siya mapainubsanong misugot sa iyang Amahan ug mianhi sa yuta aron magkinabuhi taliwala sa katawhan. Wala nay molabaw kang Jesus sa pagpakitag maayong panig-ingnan sa gugma.—Basaha ang Juan 15:12, 13; Filipos 2:5-8.

4. Unsay nalampos sa kamatayon ni Jesus?

Gipadala usab sa Diyos si Jesus aron mamatay alang sa atong mga sala. (Juan 3:16) Kitang tanan makasasala, nga nagpasabot nga kita dili hingpit ug makasala. Mao nay hinungdan nga kita masakit ug mamatay. Sa kasukwahi, ang unang tawo, si Adan, maoy hingpit. Siya walay sala ug dili gayod unta mamatay o masakit. Apan giwala niya ang kahingpitan sa dihang misupak siya sa Diyos. Atong napanunod kang Adan ang sala ug ang bayad niini, ang kamatayon.—Basaha ang Roma 5:12; 6:23.

Si Jesus, nga usa ka hingpit nga tawo, wala mamatay alang sa iyang mga sala. Siya namatay alang sa atong mga sala. Tungod niana, kita mahimong makabatog kinabuhing dayon ug makatagamtam sa panalangin sa Diyos.—Basaha ang 1 Pedro 3:18.

Pagkat-og Dugang

Unsay Tinuod nga Gitudlo sa Bibliya?

Kinsa si Jesu-Kristo?

Sayra kon nganong si Jesus ang gisaad nga Mesiyas, kon diin siya gikan, ug kon nganong siya ang bugtong Anak ni Jehova.

Unsay Tinuod nga Gitudlo sa Bibliya?

Ang Lukat—Ang Labing Maayong Gasa sa Diyos

Unsa ang lukat? Sa unsang paagi ka makabenepisyo niini?