Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Disyembre 2012

 Mga Magbabasa Nangutana . . .

Nganong ang Pipila Dili Mosaulog ug Pasko?

Nganong ang Pipila Dili Mosaulog ug Pasko?

Sa tibuok kalibotan, duolag duha ka bilyon ang magsaulog ug Pasko matag Disyembre 25, samtang mga 200 ka milyon ang magsaulog sa adlawng-natawhan ni Jesu-Kristo sa Enero 7. Apan, minilyon usab ang midesisyon nga dili gayod mosaulog ug Pasko. Ngano?

Ang usa ka rason mao nga sila tingali sakop sa relihiyon nga dili bahin sa Kakristiyanohan. Pananglitan, sakop tingali sila sa Judaismo, Hinduismo, o Shintoismo. Ang uban, sama sa mga ateyista, agnostiko, libre-pensador, o mga tawong nagtuo nga magmalipayon ang usa bisag walay relihiyon, nag-isip sa Pasko ingong sugilambong lang.

Apan, ikatingala nga daghang nagtuo kang Jesus ang nagsalikway sa mga tradisyon sa Pasko. Ngano? Duna silay labing menos upat ka rason.

Una, sila wala magtuo nga si Jesus natawo sa Disyembre o kaha sa Enero. Ang Bibliya wala maghatag ug espesipikong petsa. Kini nag-ingon: “May mga magbalantay usab niadtong dapita nga nagpuyo sa gawas ug nagpadayon sa pagbantay sa ilang mga panon sa kahayopan sa kagabhion. Ug sa kalit ang manulonda ni Jehova mitindog sa duol nila, ug . . . ang manulonda miingon kanila: ‘. . . Natawo kaninyo karong adlawa ang usa ka Manluluwas, nga mao ang Kristo nga Ginoo.’”—Lucas 2:8-11.

May mga pamatuod nga si Jesus natawo sa sinugdan sa Oktubre sa dihang ang mga magbalantay ug ang ilang mga karnero mahimo pang magpalabay sa kagabhion diha sa sibsibanan. Ang kabanikanhan palibot sa Betlehem makasinatig kinabugnawang klima sa mga bulan sa Disyembre ug Enero. Busa, aron mainitan panahon sa kagabhion, ang mga karnero dad-on sa silonganan.

Ikaduhang rason: Ang bugtong selebrasyon nga espesipikong gisugo ni Jesus sa iyang mga sumusunod nga handomon mao ang iyang kamatayon, dili ang iyang pagkatawo, ug kini pagahimoon ingong yanong pagsalog kaon. (Lucas 22:19, 20) Dugang pa, ang Ebanghelyo ni Marcos ug Juan wala maghisgot bahin sa pagkatawo ni Jesus.

Ang bugtong selebrasyon nga espesipikong gisugo ni Jesus sa iyang mga sumusunod nga handomon mao ang iyang kamatayon, dili ang iyang pagkatawo

Ikatulong rason: Walay pamatuod sa kasaysayan nga ang mga Kristohanon kaniadto nagsaulog sa pagkatawo ni Kristo. Apan ilang gihandom ang iyang kamatayon. (1 Corinto 11:23-26) Miabot pag kapin sa 300 ka tuig human sa pagkatawo ni Jesus nga ang Kakristiyanohan nagsugod pagsaulog sa Pasko sa Disyembre 25. Makaiikag nga sa tungatunga sa ika-17ng siglo, ang usa ka balaod sa parliamento nagdili sa pagsaulog sa Pasko didto sa England. Sa United States, mao sab kanay gibuhat sa Massachusetts General Court. Ngano? Ang librong The Battle for Christmas, nag-ingon: “Walay pamatuod sa Bibliya o sa kasaysayan nga si Jesus natawo sa Disyembre 25.” Kini midugang nga alang sa mga Puritano, “ang Pasko maoy usa ka paganong pista nga nagtakoban ingong Kristohanong selebrasyon.”

Kana motultol nato sa ikaupat nga rason: Ang dili-maayong sinugdanan sa Pasko. Ang sinugdanan niini mahimong masubay ngadto sa paganong Roma ug sa daghang pista niini nga nagpasidungog sa diyos sa agrikultura nga si Saturno ug sa diyos sa adlaw nga si Sol Invictus, o Mitra. Ang antropologong si Christian Rätsch ug Claudia Müller-Ebeling, mga awtor sa librong Pagan Christmas, misulat: “Sama sa daghang kostumbre ug pagtulon-an una pa sa mga Kristohanon, ang karaang pista nga naghandom sa tinuig nga pagbalik sa adlaw gigamit na karon sa pagsaulog sa pagkatawo ni Kristo.”

Base sa nahisgotan na, nakita ba nimo kon nganong ang matuod nga mga Kristohanon dili mosaulog ug Pasko?