Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE NOBYEMBRE 2012

Pangutana 3: Nganong Gitugot man sa Diyos nga Mag-antos Ko?

Pangutana 3: Nganong Gitugot man sa Diyos nga Mag-antos Ko?

ANG amahan ni Ian palahubog kaayo. Bisag nagdako si Ian nga haruhay ang kinabuhi, wala niya matagamtam ang pagmahal sa iyang amahan. “Wala ko masuod niya tungod sa iyang pagkapalahubog ug sa iyang pagtratar kang Mama,” matod ni Ian. Samtang nagdako si Ian, siya nagduhaduha sa paglungtad sa Diyos. “‘Kon duna gayoy Diyos,’ ako miingon, ‘nganong gitugot man niyang mag-antos ang mga tawo?’”

Nganong makapangutana niana?

Bisag wala ra kaayo kay problema, maglagot ka kon may inosenteng mga tawo nga mag-antos tungod sa inhustisya. Apan, ang pangutana bahin sa pag-antos mahimong mas makahuloganon kon ikaw, sama kang Ian, makasinatig mga problema o kon ang imong minahal masakit o mamatay.

Unsay tubag sa pipila bahin niana?

Ang pipila nagtuo nga ang Diyos nagtugot sa pag-antos aron tudloan kita nga mahimong mapainubsanon ug maluluy-on. Ang uban mibati nga ang mga tawo nag-antos niining kinabuhia tungod sa mga sala nga ilang nahimo sa kanhi nilang kinabuhi.

Unsay gipasabot sa maong tubag?

Ang Diyos dili matandog sa pag-antos sa tawo, mao nga lisod siya higugmaon. Siya mapintas.

Unsay gitudlo sa Bibliya?

Ang Bibliya tin-awng nag-ingon nga ang Diyos dili maoy mabasol sa pag-antos sa tawo. “Sa dihang pagasulayon, dili siya angay moingon: ‘Ako gisulayan sa Diyos.’ Kay ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Gani, ang ideya nga ang Diyos maoy mabasol sa pag-antos wala gayod mahiuyon sa personalidad sa Diyos nga gihubit sa Bibliya. Ngano man?

Ang usa sa pangunang mga hiyas sa Diyos mao ang gugma. (1 Juan 4:8) Sa pagpasiugda niana, ang Bibliya naghulagway sa Diyos ingong dunay pagbati nga sama nianang sa nagpasusong inahan. “Malimot ba ang usa ka asawa sa iyang masuso nga sa ingon dili niya kaluy-an ang anak sa iyang tiyan?” ang Diyos nangutana. “Bisan kining mga babayhana makalimot, apan ako mismo dili makalimot kanimo.” (Isaias 49:15) Duna ba goy mahigugmaong inahan nga tinuyong  magpahinabog kadaot sa iyang anak? Wala gayod. Sa kasukwahi, ang mahigugmaong ginikanan maningkamot sa paghupay sa pag-antos sa iyang anak. Sa susama, ang Diyos dili maoy hinungdan sa pag-antos sa inosenteng mga tawo.—Genesis 18:25.

Bisan pa niana, ang inosenteng mga tawo nag-antos. Makapangutana ka tingali, ‘Kon ang Diyos nagmahal kanato ug gamhanan kaayo, nganong dili man niya wagtangon ang hinungdan sa pag-antos?’

May maayong mga rason kon nganong gitugotan sa Diyos ang pag-antos karon. Tagda ang usa niana: Ang mga tawo maoy kasagarang hinungdan sa pag-antos sa uban. Daghang tigdaogdaog nga nagpahinabog kasakit sa uban ang dili gayod gustong mag-usab. Busa aron mawagtang ang pangunang hinungdan sa pag-antos, kinahanglang laglagon sa Diyos kanang mga tawhana.

Sa pagsaysay kon nganong wala pa laglaga sa Diyos ang mga mamumuhat ug daotan, si apostol Pedro misulat: “Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Ang pailob ni Jehova nga Diyos maoy pamatuod sa iyang gugma ug kaluoy.

Apan sa dili madugay, si Jehova nga Diyos molihok. Siya “mobalos ug kasakitan niadtong nagsakit” sa mga inosente. Kadtong nagpahinabog pag-antos “makaagom sa hudisyal nga silot sa walay kataposang kalaglagan.”—2 Tesalonica 1:6-9.

Si Ian, nga gihisgotan sa sinugdan, nakakaplag ug makapatagbawng tubag sa iyang mga pangutana bahin sa pag-antos. Ang iyang nasayran nakapausab sa iyang panglantaw sa kinabuhi. Basaha ang iyang asoy sa panid 13 niining gulaa.sa sunod artikulo nga nag-ulohang “Ang Bibliya Makabag-o sa Kinabuhi”.

Pagkat-og Dugang

Nganong Gitugotan sa Diyos ang Pag-antos?

Daghan ang nagtuo nga Diyos ang mabasol sa tanang pag-antos sa kalibotan. Unsay imong hunahuna? Sayra ang giingon sa Diyos bahin sa mga hinungdan sa pag-antos.