Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE OKTUBRE 2012

Posible Bang Mahimong Matinud-anon sa Kalibotang Punog Korapsiyon?

Posible Bang Mahimong Matinud-anon sa Kalibotang Punog Korapsiyon?

‘Buot namong magmatinud-anon sa tanang butang.’—HEBREOHANON 13:18.

BISAN pag ang atong pagkamakasasala, ang kalibotan nga atong gipuy-an, ug ang Yawa mahimong magpit-os kanato, kita makasukol sa ilang impluwensiya! Sa unsang paagi? Pinaagi sa pagpakigsuod sa Diyos ug sa pagpadapat sa mapuslanong mga prinsipyo gikan sa iyang Pulong, ang Bibliya. Tagda ang duha ka pananglitan.

PRINSIPYO SA BIBLIYA: “Ayaw na pagpahiuyon sa mga paagi niining kalibotana.”—Roma 12:2, Ang Biblia, Bag-ong Hubad nga Binisaya.

“Ang Bibliya nakatabang nako nga makita ang mga benepisyo sa pagkamatinud-anon.”—GUILHERME

Tinuod nga kasinatian: Si Guilherme maoy malamposong negosyante sa Brazil. Iyang giadmitir nga dili sayon nga magmatinud-anon. “Ang usa ka negosyante dali rang makapanglimbong, tingali aron makab-ot dayon ang mga tumong sa kompaniya o aron makalahutay sa kalibotang punog kompetisyon,” siya miingon. “Alang sa daghan, normal lang ang paghatag ug pagdawat ug hiphip. Kon ikaw bag-ohan pa sa  negosyo ug daghag bayronon, usa gayod ka hagit nga magmatinud-anon.”

Bisan pa niana, nasuklan ni Guilherme ang pagpit-os nga manglimbong. Matod niya: “Bisan pag naa ka sa palibot nga dinawat o gikonsentir ang panglimbong, posibleng magmatinud-anon. Kinahanglang lig-on ang imong mga prinsipyo. Ang Bibliya nakatabang nako nga makita ang mga benepisyo sa pagkamatinud-anon. Ang tawong matinud-anon may hinlong konsensiya, kalinaw sa hunahuna, ug pagtahod sa kaugalingon. Mahimo siyang maayong impluwensiya niadtong anaa sa iyang palibot.”

PRINSIPYO SA BIBLIYA: “Kadtong buot madato mahiagom sa tentasyon ug malit-ag sa daghang mga binuang ug makadaot nga mga tinguha nga maoy makabanlud sa mga tawo ngadto sa kaalaotan ug kalaglagan. Kay ang tinubdan sa pagkamahigugmaon sa salapi maoy tinubdan sa tanang pagkadaotan.”—1 Timoteo 6:9, 10, Ang Bag-ong Maayong Balita Biblia.

“Mapasalamaton ko nga tungod sa pagpadapat sa taas nga moral nga sukdanan sa Bibliya, nakabaton kog maayong reputasyon.”—ANDRÉ

Tinuod nga kasinatian: Si André tag-iya sa kompaniya nga manaod ug sistema sa seguridad. Usa sa iyang mga kliyente ang dakong klab sa saker. Usa ka higayon niana, human sa dakong dula, si André miadto sa opisina sa klab aron ipakita ang resibo sa serbisyo nga iyang nahimo. Ang departamentong nagdumala niini puliki pa sa pag-ihap sa mga halin sa tiket. Kay gabii na, ang superbisor nagdalidalig bayad sa mga suplayer, lakip na kang André.

“Sa akong pagpauli, akong nakita nga sobra ang gibayad sa superbisor,” matod ni André. “Nasayod ko nga lagmit dili gyod siya mahibalo kon kinsay nakadawat sa sobrang kuwarta. Apan nasayod sab ko nga siyay makatapal niini! Midesidir kong mobalik. Miuliot ko taliwala sa nagpunsisok nga mga tawong nanan-aw sa dula ug gibalik ang sobrang kuwarta. Nakurat ang superbisor. Wala pa gyoy nakauli niyag kuwarta sukad.”

“Tungod niana, akong naangkon ang pagtahod sa superbisor,” si André miingon. “Daghang tuig na ang milabay, apan sa tanang orihinal nga suplayer, ako lang ang duna gihapoy kontrata sa klab. Mapasalamaton ko nga tungod sa pagpadapat sa taas nga moral nga sukdanan sa Bibliya, nakabaton kog maayong reputasyon.”

Makapadasig masayran nga sa tabang sa Diyos, makasukol ta sa makadaot nga mga impluwensiya. Apan, ang tagsatagsa ka paningkamot dili gayod bug-os makawagtang sa korapsiyon. Ang mga hinungdan niini nakagamot na pag-ayo nga dili na kini masulbad sa dili-hingpit nga mga tawo. Nan, nagpasabot ba kini nga dili na gayod matapos ang korapsiyon? Ipasiugda sa kataposang artikulo niini nga serye ang makapadasig nga tubag sa Bibliya.