Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Ang Bantayanang Torre  |  Oktubre 2012

Nganong ang Korapsiyon Nagpadayon?

Nganong ang Korapsiyon Nagpadayon?

“Ang tawo nagmando sa tawo alang sa iyang kadaotan.”—ECCLESIASTES 8:9.

KANANG mga pulonga haom nga naghubit sa kasaysayan sa pagmando sa tawo. Kini maoy nakaingon sa grabeng pag-antos ug kagul-anan. Sulod sa katuigan, ang maayog-intensiyon nga mga tawo kinsa naningkamot sa pagpatunghag mas makiangayong katilingban kanunayng napakyas tungod sa kahakog ug korapsiyon. Ngano man? Nganong ang korapsiyon nagpadayon? Sa panguna, tungod sa mosunod nga tulo ka daotang impluwensiya.

1. Ang impluwensiya sa sala.

Ang Bibliya tin-awng nag-ingon nga kitang tanan “nailalom sa sala.” (Roma 3:9) Samag dili-matambalang sakit nga napanunod, ang sala “nagpuyo” kanato. Sulod sa libolibo ka katuigan, ang sala “nagmando” sa katawhan samag usa ka hari. Ang “balaod” niini padayong naglihok dinhi kanato. Tungod sa makasasalang hilig daghan ang nag-una sa ilang intereses o nagsentro sa ilang kinabuhi sa pagbaton ug materyal nga kabtangan o awtoridad bisag mabentahaan ang uban.—Roma 5:21; 7:17, 20, 23, 25.

 2. Ang impluwensiya sa daotang kalibotan.

Ang kalibotan puno sa kadalo ug kahakog. Sa maong kahimtang, ang pipila nalisdan nga mahimong lahi. Tungod sa hakog nga ambisyon, sila nahimong uhaw sa gahom. Naugmad usab nila ang kusganong tinguha alang sa dugang salapi ug kabtangan—nga labaw kay sa ila gayong gikinahanglan. Ikasubo, andam silang manglimbong aron makab-ot ang maong mga tumong. Inay makigbisog sa daotang impluwensiya, ang maong mga tawo ‘nagsunod sa panon sa katawhan alang sa daotang katuyoan.’—Exodo 23:2.

3. Ang impluwensiya ni Satanas nga Yawa.

Si Satanas, nga usa ka rebelyosong espiritung linalang, “nagpahisalaag sa tibuok gipuy-ang yuta.” (Pinadayag 12:9) Siya malipay sa pagkontrolar sa mga tawo. Mahimong malansison niyang pahimuslan ang kinaiyanhong tinguha sa usa ka tawo nga maharuhay hangtod sa punto nga kini manglimbong.

Nagpasabot ba kana nga kita mga kikokiko lamang nga gikontrolar ni Satanas—nga mapugos pagsunod sa iyang pagmaniobra? Atong masayran ang tubag sa sunod nga artikulo.