Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE SEPTIYEMBRE 2012

 Sulat Gikan sa Gresya

Pagsangyaw sa Habagatang Tumoy sa Uropa

Pagsangyaw sa Habagatang Tumoy sa Uropa

ANG nagbuntaog nga Levká Mountains sa isla sa Creta nagkagamay samtang ang among barko nagpaingon sa usa ka gamayng isla sa Mediteranyo. Sakay niini ang among grupo nga 13 ka tawo, nga naghinamhinam nga mosangyaw sa isla sa Gavdos, usa ka gamayng tulbok diha sa mapa, nga nagtimaan sa habagatang tumoy sa Uropa.

Angay untang linaw ang among biyahe kay ting-init man. Apan sa wala madugay mihuros ang makusog nga hangin ug mikusokuso sa barko. Gidagat ko, ug akong nahinumdoman ang asoy sa Bibliya bahin kang apostol Pablo, kinsa nakasinatig makusog nga unos niini nga katubigan kasiglohan kanhi—sa dihang ang Gavdos nailhan pang Cauda. (Buhat 27:13-17) Nanghinaot kong makaabot mi sa Gavdos nga luwas.

Sa kataposan nakita ra namo ang among destinasyon, daw usa ka dakong bato nga titip ug mga pangpang. Halos patag kini, nga mga 300 metros lang ang gihabogon, ug walay bungtod. Ang isla nga mga 26 kilometro kuwadrado, halos nalukop sa bagang kakahoyang pino ug sa mugbong mga kahoy. Sa pipila ka dapit, ang mga kahoyng junipero nanubo bisan hangtod sa baybayon.

Dihay panahon nga mga 8,000 ka tawo ang namuyo sa isla. Karon, ang permanenteng molupyo dinhi wala na makaabot ug 40. Daw wala makaabot sa Gavdos ang modernong sibilisasyon. Bisag subsob nga molabay niini ang mga barko sa kargamento ug mga tangker, talagsa ra ang biyahe gikan sa Creta, nga sagad madelatar o makanselar tungod sa dili-maayong panahon.

Mangadto mi sa Gavdos aron tanyagan ang mga tawo ug makapalipayng mensahe—usa ka segurado ug mas maayong kaugmaon ug paglaom nga mabuhi sa way kataposan sa hingpit nga panglawas. Sa dihang hapit na ming modunggo, naghinamhinam ming manganaog aron ipaambit kanang maayong balita.

Ang among barko gilambalamba sa mga balod sulod sa 4 1⁄2 ka oras, ug makita sa among luspad nga mga nawong nga dili linaw ang biyahe paingon sa Gavdos. Apan human mi makatagpilaw ug makainom ug kape, kami nalagsik na usab. Human sa mubong paghisgot sa asoy sa Bibliya bahin sa panaw ni apostol Pablo, maingon man sa kinasingkasing nga pag-ampo, andam na ming mosangyaw.

 Ang mga tawo dinhi mahigalaon ug maabiabihon. Ila ming padayonon ug dalitag meryenda. Gawas sa pagpaambit kanila sa maayong balita gikan sa Bibliya, gipakita namo ang among apresasyon kanila pinaagi sa paghatag ug praktikal nga tabang kon gikinahanglan. Samtang nakigsulti sa usa ka babaye, may kauban ming elektrisyan nga nakamatikod sa kasangkapang guba diha sa iyang tindahan ug giayo kana. Ang babaye natandog ug midawat sa literatura sa Bibliya nga among gitanyag ug gikomendahan mi sa among ministeryo. Laing babaye ang nagpahayag ug apresasyon, “Ang inyong buluhaton gikan sa Diyos, dili sa tawo, ug dayag kini kay kamo nanganhi aron mosangyaw niining layo kaayo nga isla.”

Daw gipabilhan pag-ayo sa mga tawo ang mga literatura nga among dala. Usa ka lalaki ang midawat sa mga magasing Bantayanang Torre ug Pagmata! ug buot niyag dugang literatura nga mabasa panahon sa tingtugnaw. Ang laing lalaki nangayog basahon dili lang para kaniya kondili para usab sa iyang mga kustomer sa tindahan. Gihatag niya ang iyang adres aron mapadad-an namo siyag mga magasin kada bulan. Ang usa ka pamilya nalipay kaayo sa dihang gipakita kanila nga ang ilang gamayng isla gihisgotan sa Bibliya. Midawat usab sila sa among mga magasin.

Bisag makapadasig kaayo ang ilang sanong, ang pagduaw sa Gavdos nakapahinumdom sa pipila kanamo sa makapasubong panghitabo. Duol sa Sarakíniko Bay, dunay tinukod nga gipapuy-an kanhi sa politikal nga mga binilanggo. Si Emmanuel Lionoudakis, usa ka Saksi ni Jehova, nadestiyero dinhi sa ulahing bahin sa katuigan sa 1930 tungod sa iyang pagsangyaw. * Ang Gavdos nianang panahona gihubit ingong “umaw nga isla nga gipuy-an lamag makamatayng mga tanga, usa ka dapit diin daghan ang . . . nangamatay tungod sa kagutom, kalisod, ug sakit, [usa ka dapit] nga haom gitawag ug isla sa kamatayon.” Si Lionoudakis mangisda aron makakaon, apan puliki usab siya sa pagsangyaw sa ubang binilanggo, kay siya ray Saksi dinhi. Sa pagkakita sa dapit nga iyang giestaran mga 70 ka tuig kanhi, ang iyang anak nga babaye, umagad nga lalaki, ug apo nga babaye nakahilak. Alang namo, ang iyang panig-ingnan nakadasig namo sa pagpabiling maunongon ug aktibo diha sa ministeryo.

Alang niadtong nadestiyero dinhi, ang Gavdos dili gayod maanindot nga dapit. Apan alang namo, kini maoy mahigalaong dapit samtang kami nagsangyaw sa tibuok isla niining hinapos sa semana, nga nakapahimutag 46 ka magasin ug 9 ka brosyur sa maabiabihong mga tawo didto. Naghinamhinam ming makita pag-usab ang among bag-ong mga higala!

Dali ra kaayong milabay ang oras, ug panahon nang mobiya mi. Apan sa makausa pa naglain na usab ang panahon, ug wala madayon ang among alas 5:00 sa hapon nga biyahe. Misakay mig tungang gabii, nga nag-andam sa among kaugalingon sa laing baloron nga biyahe. Sa kataposan, nakalarga mig alas 3:00 sa kadlawon, ug human nga gilambalamba sa balod ang among barko ug mga lima ka oras, nakaabot mi sa Creta. Kami gikapoy kaayo ug nagpangurog sa pagkawas namo sa barko, apan nalipay mi nga among napaila ang ngalan ni Jehova sa Gavdos. (Isaias 42:12) Kaming tanan makaingon nga wala makawang ang among paningkamot. Ang kalisdanan nga among naagoman makalimtan ra sa dili madugay, apan segurado mi nga amo gayong handomon kini nga kasinatian.

^ par. 11 Alang sa sugilanon ni Emmanuel Lionoudakis, tan-awa Ang Bantayanang Torre, Septiyembre 1, 1999, panid 25-29.