Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE DISYEMBRE 2011

Gisilotan ba Kita sa Diyos?

Gisilotan ba Kita sa Diyos?

 Gisilotan ba Kita sa Diyos?

“Tembatsu (silot sa Diyos) tingali ni, pero naluoy ko sa mga biktima sa katalagman,” nag-ingon ang usa ka ilado nga politikong Hapon human sila makaagom ug 9.0 nga gikusgong linog ug tsunami niadtong Marso 2011.

Sa dihang kapin sa 220,000 ka tawo ang nangamatay sa linog sa Haiti niadtong Enero 2010, usa ka inilang tigwali sa TV ang miingon nga tungod kadto kay “ilang gibaligya ang ilang kalag sa yawa” ug kinahanglan silang “moliso sa diyos.”

“Buot sa Diyos nga kita mahigmata kay gikubalan na ang atong konsensiya,” matod sa usa ka Katolikong pari sa dihang 79 ka tawo ang nangamatay sa usa ka stampede sa Manila, Pilipinas. Usa ka mantalaan didto nagreport nga “bayente-uno porsiyento sa mga hamtong nagtuo nga ang Diyos nagpakita sa iyang kapungot pinaagig mga pagdahili sa yuta, bagyo, ug uban pang katalagman” nga kanunayng naghampak sa nasod.

DILI na bag-o ang pagtuo nga ang Diyos nagpahinabog katalagman aron silotan ang mga daotan. Niadtong 1755, human mangamatay ang mga 60,000 ka tawo tungod sa linog, sunog, ug tsunami nga nahitabo sa Lisbon, Portugal, nangutana ang iladong pilosopo nga si Voltaire: “Mas daotan ba diay ang Lisbon kay sa Paris diin mas daghag kahilayan?” Sa pagkatinuod, minilyon ang naghunahuna kon gigamit ba sa Diyos ang mga katalagman aron silotan ang mga tawo. Gani, sa daghang nasod ang maong katalagman giisip nga pagbuot sa Diyos.

Tungod niini, makapangutana kita: Gigamit ba gayod sa Diyos ang katalagman aron silotan ang mga tawo? Silot ba gikan sa Diyos ang sunodsunod nga katalagman nga nahitabo ning bag-o pa?

Sa ilang pagbasol sa Diyos, gipunting sa pipila ang mga asoy sa Bibliya diin ang Diyos nagpahamtang ug silot pinaagig katalagman. (Genesis 7:17-22; 18:20; 19:24, 25; Numeros 16:31-35) Apan kon susihon kining mga asoya, gipakita niini ang tulo ka dagkong butang nga nakapalahi niini. Una, diha unay pasidaan. Ikaduha, dili sama sa mga katalagman karon, nga makapatay sa maayo ug daotang mga tawo, pinili lang ang gilaglag sa Diyos. Kadto lang wala mobiya sa pagkadaotan o wala mamati sa mga pasidaan ang gilaglag. Ikatulo, naghimog paagi ang Diyos aron maluwas ang mga matarong.—Genesis 7:1, 23; 19:15-17; Numeros 16:23-27.

Sa dili maihap nga katalagman nga nakapahinabog kadaot sa minilyon karon, walay ebidensiya nga ang Diyos maoy hinungdan niana. Nan, unsa man diay hinungdan sa nagkadaghang katalagman karon? Unsaon nato kana pagsagubang? Moabot ba ang panahon nga wala nay katalagman? Tubagon kini sa sunod nga mga artikulo.