Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE MARSO 2011

“Ikaw Mangandoy”

“Ikaw Mangandoy”

 Pakigsuod sa Diyos

“Ikaw Mangandoy”

SAKIT kaayong sud-ongon nga mag-antos ug mamatay ang atong minahal. Natural lamang nga kita masubo niini. Apan, malipay kitang masayod nga ang atong Maglalalang, si Jehova nga Diyos, nakasabot sa atong kasubo. Labaw pa niana, siya nagtinguha gayod sa paggamit sa iyang gahom sa pagbanhaw sa mga patay. Matikdi ang paglaom diha sa mga pulong ni Job, nga girekord sa Job 14:13-15.

Tagda kini nga panghitabo. Si Job, usa ka tawong may talagsaong pagtuo, nakaagom ug grabeng mga pagsulay, lakip ang pagkahanaw sa iyang kabtangan, pagkamatay sa iyang minahal nga mga anak, ug grabeng sakit. Sa iyang hilabihang kaguol, siya mitawag sa Diyos: “Oh nga sa Sheol [komon nga lubnganan sa tawo] imo unta akong tagoan!” (Bersikulo 13) Gibati ni Job nga matapos na ang iyang pag-antos didto sa Sheol. Didto, nga samag bahandi nga gitagoan sa Diyos, siya wala nay kalisdanan ug kasakit. *

Ang Sheol ba mahimong permanenteng pinuy-anan ni Job? Dili kini maoy pagtuo ni Job. Siya nagpadayon sa iyang pag-ampo: “Oh nga . . . imo unta akong tagalan ug panahon ug hinumdoman ako!” Masaligon si Job nga siya dili magdugay didto sa Sheol ug nga siya dili kalimtan ni Jehova. Gipakasama ni Job ang panahon nga iyang gigugol didto sa Sheol sa “pinugos nga trabaho”—usa ka yugto sa paghulat nga gipugos pagpatuman. Unsa kadugay? “Hangtod moabot ang akong kahupayan.” (Bersikulo 14) Ang maong kahupayan nagkahulogan nga siya makagawas sa Sheol—buot ingnon, mabanhaw gikan sa mga patay!

Nganong kombinsido si Job nga kini nga kahupayan moabot? Tungod kay nasayod siya kon unsay gibati sa atong mahigugmaong Maglalalang bahin sa Iyang matinumanong mga magsisimba nga nangamatay. Si Job miingon: “Ikaw motawag, ug ako motubag kanimo. Kay ikaw mangandoy sa buhat sa imong mga kamot.” (Bersikulo 15) Giila ni Job nga siya binuhat sa Diyos. Ang Maghahatag-Kinabuhi nga maoy nag-umol kang Job sa tagoangkan tinong makabanhaw kaniya human siya mamatay.—Job 10:8, 9; 31:15.

Ang mga pulong ni Job nagpakita kanato kon unsa ka mahigugmaon si Jehova: Siya may linaing pagmahal niadtong, sama kang Job, misalig ug nagpaumol Kaniya aron sila mahimong tilinguhaon sa Iyang mga mata. (Isaias 64:8) Gipabilhan ni Jehova ang iyang matinumanong mga magsisimba. Siya ‘nangandoy’ niadtong mga matinumanon nga nangamatay. Ang Hebreohanong pulong nga gigamit dinhi maoy “usa gayod sa labing puwersadong mga pulong sa pagpahayag sa gibating kamingaw,” matod sa usa ka eskolar. Oo, dili lamang kay si Jehova nahinumdom sa iyang mga magsisimba kondili siya usab nangandoy nga banhawon sila.

Mapasalamaton kita nga sa basahon sa Job, usa sa unang mga basahon sa Bibliya nga gisulat, gibutyag ni Jehova ang iyang katuyoan sa pagbanhaw sa mga patay. * Buot niya nga ikaw mahiusa pag-usab uban sa imong mga minahal nga nangamatay. Kini makapahupay kanimo. Nganong dili ka man mokat-on ug dugang bahin niining mahigugmaong Diyos ug magpaumol kaniya aron ikaw mismo makasaksi sa katumanan sa Iyang katuyoan?

Sugyot nga pagbasa sa Bibliya sa Marso:

Ester 1Job 15

[Mga Potnot]

^ par. 4 Ang usa ka basahon nag-ingon nga ang pulong ni Job nga ‘tagoan mo ako’ mahimong magkahulogan nga “tipigan [ako] nga hilwas ingong bililhong manggad.” Ang laing reperensiya nag-ingon nga kining mga pulonga nagpasabot nga “tagoi ako ingong bahandi.”

^ par. 8 Aron makakat-on ug dugang bahin sa saad sa Bibliya sa pagkabanhaw diha sa usa ka matarong bag-ong kalibotan, tan-awa ang kapitulo 7 sa librong Unsay Tinuod nga Gitudlo sa Bibliya? nga gipatik sa mga Saksi ni Jehova.