Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE MARSO 2010

Ang Bibliya ba Pulong sa Diyos?

Ang Bibliya ba Pulong sa Diyos?

“Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.”—2 TIMOTEO 3:16, 17.

PAGKAPUWERSADO nga pahayag ni apostol Pablo bahin sa kabililhon sa Bibliya! Siyempre, ang iyang gitumong mao ang bahin sa Bibliya nga mabatonan sa maong panahon—ang mga sinulat nga sagad gitawag nga Daang Tugon. Apan ang mga pulong ni Pablo ikapadapat sa tanang 66 ka basahon sa Bibliya, nga naglakip sa gisulat sa matinumanong mga tinun-an ni Jesus sa unang siglo C.E.

Sama ba usab kang Pablo ang imong pagpabili sa Bibliya? Ikaw ba nagtuo nga ang mga magsusulat sa Bibliya inspirado sa Diyos? Mao kanay gituohan sa unang-siglong mga Kristohanon. Wala kana mausab bisan sa paglabay sa ginatos ka katuigan. Pananglitan, ang Ingles nga pari sa ika-14 nga siglo, si John Wycliffe, nag-isip sa Bibliya ingong “hingpit nga sukdanan sa kamatuoran.” Bahin sa mga pulong ni Pablo nga gikutlo sa itaas, ang The New Bible Dictionary nag-ingon nga ang “pag-inspirar [sa Diyos] . . . naggarantiya nga matuod ang tanang gitudlo sa Bibliya.”

Nausab ang Tinamdan sa mga Tawo Bahin sa Bibliya

Apan sa atong panahon, ang mga tawo wala na kaayoy pagsalig sa Bibliya. “Sa teoriya,” sumala sa librong The World’s Religions, “ang tanang Kristohanon may pagsalig [gihapon] sa Bibliya, ingong giya sa ilang mga panggawi ug pasukaranan sa ilang mga tinuohan.” Apan sa tinuoray, dili kana ang aktuwal nga nahitabo. Para sa daghan karon, ang Bibliya mao lamay “rekord sa tawhanong mga tradisyon ug ideya nga dili kasaligan.” Bisan tuod giisip nila nga ang mga magsusulat sa Bibliya dakog pagtuo sa Diyos, para nila kining dili-hingpit nga mga tawo naningkamot lang sa pagpatin-aw sa lawom nga mga kamatuoran apan walay kahibalo ug katin-awan nga sama sa atong nabatonan karon.

Sa pagkatinuod, diyutay na lang kaayo karon ang naghimo sa Bibliya ingong giya sa ilang panghunahuna ug panggawi. Pananglitan, kanunay ka bang makadungog nga ang mga tawo moingon nga ang mga sukdanan sa Bibliya bahin sa moralidad kinaraan na ug dili praktikal? Dali ra kaayong pakamenoson sa daghan ang mga balaod ug mga prinsipyo sa Bibliya—o ibalewala pa gani kini kon malisdan sila sa pagsunod niini. Ang pipila nga nag-angkong Kristohanon dayag nga nagbalewala kon unsay giingon sa Bibliya bahin sa pakighilawas, panapaw, panglimbong, ug paghuboghubog.—1 Corinto 6:9, 10.

Nganong nahitabo kana? Sa sayong bahin sa ika-20 nga siglo, ang arkeologong si Sir Charles Marston mihatag ug usa ka rason diha sa iyang librong The Bible Is True. Siya miingon nga ang mga tawo dali kaayong “modawat nga walay pag-ukon-ukon sa daghang opinyon sa modernong mga magsusulat” nga mikuwestiyon sa pagkakasaligan sa Bibliya. Ingon ba usab niana ang tinamdan sa mga tawo karon? Unsay imong hunahuna sa mga opinyon ug teoriya sa mga eskolar nga walay pagsalig sa Bibliya? Tan-awa kon unsay giingon sa sunod nga artikulo bahin niini.