Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE MAYO 2009

Brooklyn Bethel—100 ka Tuig Na

Brooklyn Bethel—100 ka Tuig Na

ANG tuig 1909 maoy usa ka halandomong tuig alang sa New York City. Ang Queensboro Bridge gibuksan, nga nagsumpay sa distrito sa Queens ug Manhattan, ug ang Manhattan Bridge gibuksan usab, nga nagdugtong sa Manhattan ug Brooklyn.

Bethel Home 122-124 Columbia Heights

Kana usa ka halandomong tuig usab alang sa mga Saksi ni Jehova. Una pa niana, nakita ni Charles Taze Russell, nga presidente sa Watch Tower Bible and Tract Society (legal nga korporasyon nga gigamit sa mga Saksi ni Jehova), nga posibleng ipakaylap sa tibuok kalibotan ang pagsangyaw sa maayong balita sa Gingharian sa Diyos. (Mateo 24:14) Siya nagtuo nga ang pagbalhin sa hedkuwarter sa Sosyedad gikan sa Pittsburgh, Pennsylvania, ngadto sa Brooklyn, New York, maoy usa ka hinungdanong tikang sa pagpalampos niana. Ang preparasyon gisugdan sa 1908, ug gibalhin kana sa sayong bahin sa 1909.

Nganong sa Brooklyn man Mobalhin?

Ang nanguna sa buluhaton niadtong panahona nahibalo nga ang pagsangyaw pinaagig mga sermon nga gipatik diha sa mga mantalaan maoy epektibong paagi sa pagpakaylap sa kamatuoran sa Bibliya. Gani, pagka 1908, ang senemanang mga sermon sa Bibliya ni Russell mabasa diha sa 11 ka mantalaan nga niana 402,000 ka kopya ang gipatik kada semana.

Mga sermon ni Russell nga gipatik sa mantalaan

Apan, si Russell misulat: “Ang mga igsoon nga nasayod sa pamaagi sa mga magpapatik ug mantalaan . . . nagpasalig kanamo nga kon ang senemanang mga sermon maggikan sa usa ka [inilang dapit] lagmit mapatik ang mga sermon diha sa tanang mantalaan sa United States; nga sulod sa usa ka tuig lagmit gatosan ka mantalaan ang regular nga magpatik niana.” Busa, nangita sila sa kinamaayohang lokasyon diin mapalambo nila ang buluhatong pagsangyaw.

117 Adams Street (1927 hangtod karon)

Nganong sa Brooklyn man? Si Russell miingon: “Human mangayog giya sa Diyos, kami nakahinapos nga ang Brooklyn, N.Y., nga dakog populasyon . . . ug nailhan ingong ‘Siyudad sa mga Simbahan,’ mao ang labing haom nga sentro sa buluhatong pagpangani.” Ang resulta nagpakita nga maalamon kadto nga desisyon. Sa mubo lang nga panahon, 2,000 ka mantalaan ang nagpatik sa mga sermon ni Russell.

Aduna pay laing rason kon nganong haom nga dapit ang New York. Pagka 1909, natukod na ang mga sangang buhatan sa Gran Britanya, Alemanya, ug Australia, ug daghan pa ang mosunod. Busa, haom nga ang tibuok-kalibotang hedkuwarter mahimutang sa usa ka siyudad duol sa pantalan nga daghan usab ug mga karsada ug riles paingon sa ubang mga lugar.

Nganong Gitawag Kini ug Bethel?

Ang unang hedkuwarter sa Watch Tower Bible and Tract Society gitukod sa katuigan sa 1880, didto sa Allegheny (karon bahin sa Pittsburgh), Pennsylvania. Kaniadto, gitawag kini ug Bible House. Pagka 1896, dihay 12 ka membro ang maong pasilidad.

35 Myrtle Avenue (1920-1922)

Apan, pagbalhin nila sa Brooklyn niadtong 1909, ang bag-ong puy-anan gitawag na ug Bethel. * Nganong Bethel man? Ang propiedad nga napalit sa Watch Tower Society sa 13-17 Hicks Street gipanag-iya sa usa ka prominenteng klero nga si Henry Ward Beecher ug nailhan kini ingong Beecher Bethel. Ang kanhing puloy-anan ni Beecher, nga nahimutang sa 124 Columbia Heights, napalit usab. Ang Marso 1, 1909, nga gula sa The Watch Tower nag-ingon: “Talagsaon kaayo nga atong napalit ang Beecher Bethel ug sa wala damha napalit usab ang iyang kanhing puy-anan. . . . Ang bag-ong puy-anan atong tawgong ‘Bethel,’ ug ang bag-ong buhatan ug awditoryum, ‘The Brooklyn Tabernacle’; kining mga ngalana maoy mopuli sa terminong ‘Bible House.’”

Karon, ang gipadak-ang pasilidad sa Brooklyn ug ang pasilidad nga anaa sa New York State, Wallkill ug sa Patterson, lakip na ang puy-anan, imprentahan, ug mga opisina, gitawag ug Bethel. Sa pagkatinuod, aduna nay mga puy-anang Bethel diha sa 113 ka nasod sa tibuok kalibotan. Kini adunay kapin sa 19,000 ka membro nga nagtabang sa pagpanagtag ug impormasyon bahin sa Bibliya.

Imprentahan sa Wallkill

Usa ka Mainit nga Pag-abiabi sa mga Bisita

Patterson Educational Center

Ang pasilidad gidedikar niadtong Enero 31, 1909. Ang Lunes, Septiyembre 6, 1909, maoy adlaw nga gigahin sa pag-abiabi sa mga bisita. Gatosan ka Estudyante sa Bibliya, nga maoy pagtawag kaniadto sa mga Saksi ni Jehova, ang misuroy sa pasilidad. Daghan kanila ang gikan pa sa usa ka Kristohanong kombensiyon nga gipahigayon sa Saratoga Springs, mga 329 kilometros paamihanan sa New York City. Si Charles Taze Russell mismo ang miabiabi sa mga bisita. *

Karon, mahimo gihapong moduaw sa Bethel ang mga bisita. Gani, kada tuig kapin sa 40,000 ka tawo ang mosuroy sa pasilidad sa Brooklyn. Ang Brooklyn Bethel aduna gihapoy hinungdanong papel sa pagpakaylap sa intereses sa Gingharian ni Jehova, nga nagdalag panalangin sa milyonmilyong katawhan.

^ par. 11 Ang Hebreohanong pulong “Bethel” nagpasabot ug “Balay sa Diyos.” Sa Bibliya, ang Bethel maoy usa ka prominenteng siyudad sa Israel. Ang siyudad sa Jerusalem lang ang mas subsob nga gihisgotan.

^ par. 14 Alang sa dugang detalye, tan-awa ang Mga Saksi ni Jehova—Mga Magmamantala sa Gingharian sa Diyos, panid 718-723, nga gipatik sa mga Saksi ni Jehova.

18 Concord Street (1922-1927)