Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) OKTUBRE 2015

Mag-alagad Kang Jehova nga Walay Kabaldahan

Mag-alagad Kang Jehova nga Walay Kabaldahan

‘Si Maria nagpadayon sa pagpamati sa pulong [ni Jesus]. Si Marta, nalinga sa pag-atiman sa daghang buluhaton.’—LUC. 10:39, 40.

AWIT: 94, 134

1, 2. Nganong gihigugma ni Jesus si Marta, apan unsay nagpakita nga dili siya hingpit?

UNSAY mosantop sa imong hunahuna dihang hisgotan ang karakter sa Bibliya nga si Marta? Bisag siya lang ang babayeng ginganlan sa Bibliya nga gihigugma ni Jesus, may lain pang diyosnong mga babaye nga gipakitaan usab ni Jesus ug putli ug dili mahakogong gugma, sama sa iyang minahal nga inahan, si Maria, ug ang igsoon ni Marta nga si Maria. (Juan 11:5; 19:25-27) Nan, nganong ingon man niana ang paghisgot kang Marta diha sa Ebanghelyo?

2 Gihigugma ni Jesus si Marta dili lang tungod sa iyang pagkamaabiabihon ug pagkakugihan kondili tungod usab sa iyang espirituwalidad. Siya nagtuo gayod sa gitudlo ni Jesus. Si Marta wala magduhaduha nga si Jesus ang gisaad nga Mesiyas. (Juan 11:21-27) Ug sama natong tanan, siya dili hingpit. Sa usa ka higayon, samtang giabiabi nila si Jesus sa ilang panimalay, giingnan niya si Jesus nga tul-iron ang usa ka situwasyon nga iyang gituohang sayop. Si Marta miingon: “Ginoo, walay bale ba kanimo nga gipasagdan ako sa akong igsoong babaye nga nag-inusara sa pag-atiman sa mga butang? . . . Sultihi siya nga motabang kanako.” (Basaha  ang Lucas 10:38-42.) Unsay atong makat-onan niini?

SI MARTA NALINGA

3, 4. Sa unsang paagi gipili ni Maria ang “maayong bahin,” ug unsang leksiyon ang nakat-onan ni Marta? (Tan-awa ang hulagway sa sinugdan sa artikulo.)

3 Ingong apresasyon sa ilang pagkamaabiabihon, natukmod si Jesus sa paghatag kang Marta ug Maria ug usa ka espirituwal nga gasa. Gipahimuslan ni Maria ang kahigayonan sa pagkat-on gikan mismo sa Dakong Magtutudlo ug siya milingkod ‘sa tiilan sa Ginoo nga namati sa iyang pulong.’ Mahimo pod unta tong buhaton ni Marta. Seguradong komendahan ni Jesus si Marta kon namati pa kini kaniya.

4 Apan, si Marta puliki kaayo sa pag-andam ug espesyal nga pagkaon ug paghimo sa ubang buluhaton aron mahimong komportable ang pag-estar ni Jesus. Pero kining tanan nakahatag kang Marta ug sobrang kabalaka, ug siya nasuko kang Maria. Namatikdan ni Jesus nga daghan ra kaayog gibuhat si Marta, busa siya mabinationg miingon: “Marta, Marta, ikaw nabalaka ug napuliki bahin sa daghang butang.” Dayon, misugyot siya nga igo na ang usa ka potahe. Unya iyang gidayeg si Maria tungod sa pagpamati kaniya: “Sa iyang bahin, gipili ni Maria ang maayong bahin, ug dili kini pagakuhaon gikan kaniya.” Tingali makalimtan ra ni Maria ang iyang gikaon nianang espesyal nga okasyon, apan dili gyod niya makalimtan ang maong komendasyon ug ang espirituwal nga pagkaon nga iyang nadawat pinaagi sa pagpamati pag-ayo kang Jesus. Kapig 60 ka tuig sa ulahi, si apostol Juan misulat: “Gihigugma ni Jesus si Marta ug ang iyang igsoong babaye.” (Juan 11:5) Kining inspiradong mga pulong nagpakita nga gidawat ni Marta ang mahigugmaong pagtul-id ni Jesus ug nagmatinumanon siya kang Jehova sa tibuok niyang kinabuhi.

5. May kalainan ba ang atong panahon karon sa kapanahonan sa Bibliya, ug tungod niini unsang pangutana ang motungha?

5 Maylabot sa mga kabaldahan, may kalainan ba ang atong panahon karon sa kapanahonan sa Bibliya? “Sa kasaysayan, karon pa nahitabo nga ang mga tawo nagpasigarbo bahin sa modernong paagi sa komunikasyon, paspas nga mga imprentahan, daghag kolor nga mga magasin, radyo, pelikula, telebisyon. . . . Adlaw-adlaw may ipasiugda silang mga kabaldahan . . . Di pa dugay, daghan ang naghunahuna nga ang atong panahon mao ang ‘Panahon sa Kalamdagan.’ Apan karon, nahimo na kining ‘Panahon sa Kabaldahan.’” Kini gisulti ngadto sa usa ka grupo sa mga estudyante sa United States kapig 60 ka tuig kanhi. “Ang mga kabaldahan,” matod pa sa The Watchtower sa Septiyembre 15, 1958, “lagmit modaghan samtang magkaduol ang kataposan niining kalibotana.” Tinuod gayod kana! Tungod niini, motungha ang importanteng pangutana: Unsay atong buhaton aron malikayan ang mga kabaldahan ug mahisama kang Maria, nga magpokus sa espirituwal nga mga butang?

AYAW GAMITA SA BUG-OS ANG KALIBOTAN

6. Sa unsang paagi gigamit sa katawhan ni Jehova ang teknolohiya sa kalibotan?

6 Sa pagpalambo sa matuod nga pagsimba, ang yutan-ong bahin sa organisasyon sa Diyos naggamit sa teknolohiya sa kalibotan. Pananglitan, tagda ang “Photo-Drama of Creation,” nga kombinasyon sa mga eslayd ug pelikula, nga may kolor ug tingog. Una pa ug panahon sa Gubat sa Kalibotan I, milyonmilyon sa tibuok kalibotan ang nahupayan niini nga presentasyon, diin ang konklusyon naghubit sa umaabot, malinawong Usa ka Libo ka Tuig nga Pagmando ni Jesu-Kristo. Sa ulahi, ang mensahe sa Gingharian gisibya sa radyo ug nadungog sa minilyon pa sa tibuok yuta. Karon, ang teknolohiya sa computer ug ang Internet gigamit sa pagpakaylap sa  maayong balita, nga nakaabot sa mga tawo sa hilit nga mga isla ug sa tanang dapit sa yuta.

Ayawg tugoti ang dili hinungdanong mga butang nga makabalda sa espirituwal nga mga kalihokan (Tan-awa ang parapo 7)

7. (a) Nganong peligroso kon gamiton nato sa bug-os ang kalibotan? (b) Unsay dili nato angayng pasagdan? (Tan-awa ang footnote.)

7 Ingon sa gipasidaan sa Bibliya, peligroso ang paggamit sa bug-os sa gitanyag sa kalibotan. (Basaha ang 1 Corinto 7:29-31.) Mahimong mausik ang panahon sa usa ka Kristohanon diha sa mga butang nga dili unta sayop, sama sa mga hilig, pagbasag sekular nga mga basahon, pagtan-awg TV, pagsuroysuroy, paglaaglaag sa mall, ug pagpangitag kinabag-ohang gadyet o mahalong mga butang. Ang social networking, pag-text, pag-email, ug pagsigeg susi sa kinabag-ohang balita ug mga sports event makausik usab sa atong panahon ug makaadik pa gani. * (Eccl. 3:1, 6) Kon dili nato limitahan ang panahon nga atong gigugol diha sa dili importanteng mga butang, mahimong mapasagdan ang labing hinungdanong buluhaton—ang atong pagsimba kang Jehova.—Basaha ang Efeso 5:15-17.

8. Nganong hinungdanon kaayo ang tambag nga dili higugmaon ang mga butang sa kalibotan?

8 Gihimo ni Satanas kining kalibotana nga makapadani ug makabalda kanato. Tinuod kana sa unang siglo, ug ilabina gayod karon. (2 Tim. 4:10) Busa, kinahanglang sundon nato ang tambag: “Ayaw ninyo higugmaa . . . ang mga butang nga anaa sa kalibotan.” Pinaagi sa padayong pagkinabuhi nga uyon nianang tambaga, dili kita malinga ug modako ang atong “gugma sa Amahan.” Kon buhaton nato kana, mahimong mas sayon para nato ang pagbuhat sa kabubut-on sa Diyos ug pagpabiling suod kaniya sa walay kataposan.—1 Juan 2:15-17.

HUPTING YANO ANG IMONG MATA

9. Unsay gisulti ni Jesus bahin sa atong simbolikong mata, ug giunsa niya pagpakitag ehemplo?

9 Ang mabinationg tambag ni Jesus kang Marta kaharmonya gayod sa iyang gitudlo ug ehemplo. Giawhag niya ang iyang mga tinun-an nga huptang “yano” o nakapokus ang simbolikong mata aron sa pagpangagpas sa intereses sa Gingharian nga walay kabaldahan. (Basaha ang Mateo 6:22, 33.) Si Jesus wala makabatog daghang materyal nga mga butang; wala siyay balay o yuta.—Luc. 9:58; 19:33-35.

10. Unsang ehemplo ang gipakita ni Jesus sa sayong bahin sa iyang ministeryo?

10 Daghang panghitabo sa ministeryo ni Jesus ang mahimong makabalda kaniya, pero  wala siya magpalinga. Sa sayong bahin sa iyang ministeryo, human siya makasangyaw sa panon sa katawhan ug makahimog mga milagro sa Capernaum, gihangyo siya sa mga tawo sa pagpabilin una sa ilang siyudad. Apan unsay sanong ni Jesus niining maayo unta nga hangyo? Siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:42-44) Tuod man, gilibot ni Jesus ang Palestina aron sa pagsangyaw ug pagpanudlo. Siya hingpit, pero may panginahanglan gihapon sama kanato ug usahay mobati siyag grabeng kakapoy tungod sa iyang buluhaton sa pag-alagad sa Diyos.—Luc. 8:23; Juan 4:6.

11. Unsay giingon ni Jesus sa usa ka tawo nga may problema sa iyang pamilya, ug unsay gipasidaan ni Jesus?

11 Sa ulahi, samtang nagtudlo si Jesus sa iyang mga sumusunod kon unsaon pag-atubang ang pagsupak, usa ka tawo ang misagbat: “Magtutudlo, sultihi ang akong igsoon nga bahinan niya ako sa panulondon.” Apan wala mangilabot si Jesus sa ilang problema. Siya miingon: “Tawo, kinsa ang nagtudlo kanako nga maghuhukom o tigbahin taliwala kaninyo?” Dayon nagpadayon si Jesus sa iyang pagpanudlo, nga nagpasidaan sa iyang mga mamiminaw labot sa kapeligrohan nga malinga sa materyal nga mga butang, imbes magpokus sa pag-alagad sa Diyos.—Luc. 12:13-15.

12, 13. (a) Pipila ka adlaw una pa sa kamatayon ni Jesus, nganong nakadayeg kaniya ang pipila ka Gregong kinabig? (b) Unsay reaksiyon ni Jesus sa posibleng kabaldahan?

12 Ang kataposang semana sa kinabuhi ni Jesus sa yuta makapabalisa kaayo. (Mat. 26:38; Juan 12:27) Daghan pa siyag angayng buhaton, ug hapit na siyang makaagom sa makauulaw nga husay ug masakit nga kamatayon. Tagda pananglitan ang nahitabo sa Dominggo, Nisan 9, 33 C.E. Ingon sa gitagna, si Jesus misulod sa Jerusalem sakay sa usa ka asno, ug ang panon sa katawhan nagtawag kaniya ingong “ang Usa nga nagaanhi ingon nga Hari sa ngalan ni Jehova.” (Luc. 19:38) Pagkasunod adlaw, si Jesus misulod sa templo ug maisogong nag-abog sa hakog nga mga negosyante kinsa naggamit sa balay sa Diyos sa pagpangilkil sa ilang isigka-Hudiyo.—Luc. 19:45, 46.

13 Apil sa panon sa katawhan nga didto sa Jerusalem mao ang pipila ka Gregong kinabig kinsa nakadayeg kaayo sa gibuhat ni Jesus mao nga ilang gihangyo si apostol Felipe kon puwede ba silang makigkita kang Jesus. Apan si Jesus wala magpalinga niana kondili giuna niya ang mas importanteng butang. Dili niya gustong mangitag mga tawo nga mopaluyo ug modepensa kaniya batok sa mga kaaway sa Diyos. Nahibalo siya nga labawng hinungdanon ang paghalad sa iyang kinabuhi. Busa, human niya ipatin-aw nga hapit na siyang patyon, siya miingon kang Andres ug Felipe: “Siya nga magamahal sa iyang kalag magalaglag niini, apan siya nga magadumot sa iyang kalag niining kalibotana magatipig niini alang sa kinabuhing walay kataposan.” Inay makigkita sa maong mga Grego, iyang gipasiugda ang pagsundog sa iyang nagsakripisyo sa kaugalingon nga pagkinabuhi ug gisaaran sila: “Kon si bisan kinsa moalagad kanako, ang Amahan magpasidungog kaniya.” Sa walay duhaduha, gisulti ni Felipe kining positibong mensahe ngadto sa maong mga Grego.—Juan 12:20-26.

14. Bisag giuna ni Jesus ang pagsangyaw, unsay nagpakita nga siya balanse?

14 Bisag dili gusto ni Jesus nga mabalda sa iyang pangunang katuyoan, ang pagsangyaw sa maayong balita, dili puro trabaho na lang ang iyang gihunahuna. Siya midawat ug labing menos usa ka imbitasyon sa kasal ug nakatampo sa kalipay sa maong okasyon pinaagi sa milagrosong paghimo sa tubig nga bino. (Juan 2:2, 6-10) Midawat sab siyag imbitasyon sa panihapon uban sa suod nga mga  higala ug potensiyal nga mga tinun-an. (Luc. 5:29; Juan 12:2) Labaw sa tanan, si Jesus naggahin ug panahon alang sa pag-ampo, pagpamalandong, ug sa pagpahulay.—Mat. 14:23; Mar. 1:35; 6:31, 32.

‘TANGTANGA ANG TANANG KABUG-AT’

15. Unsay gitambag ni apostol Pablo, ug giunsa niya pagpakitag maayong ehemplo?

15 “Tangtangon usab nato ang tanang kabug-at,” misulat si apostol Pablo, kinsa nagpakasama sa kinabuhi sa usa ka dedikadong Kristohanon ngadto sa lumba sa dagan. (Basaha ang Hebreohanon 12:1.) Gibuhat gayod ni Pablo kon unsay iyang giwali. Iyang gitalikdan ang usa ka maayong karera sa Judaismo nga makapahimo unta niyang dato ug inila. Siya nagpokus sa “mas hinungdanong mga butang” ug nagmakugihon sa pag-alagad sa Diyos, nga nagbalikbalik ug biyahe tali sa Sirya, Asia Minor, Macedonia, ug Judea. Si Pablo misulat bahin sa iyang paglaom nga walay kataposang kinabuhi sa langit: “Ginakalimtan ang mga butang sa luyo ug nagapangab-ot sa mga butang sa unahan, ako nagapangagpas sa tumong alang sa ganti.” (Filip. 1:10; 3:8, 13, 14) Kay gipahimuslan ni Pablo ang iyang pagkatagsaanon, siya nakapadayon sa “pag-alagad sa Ginoo nga walay pagkalinga.”—1 Cor. 7:32-35.

16, 17. Tagsaanon man o minyo, unsaon nato pagsundog ang ehemplo nga gipakita ni Pablo ingong tinun-an ni Kristo? Pag-asoy ug eksperyensiya.

16 Sama kang Pablo, ang pipila ka alagad sa Diyos mipili sa pagpabiling tagsaanon aron diyutay ra ang ilang responsabilidad sa pamilya ug makapokus sila sa pag-alagad sa Gingharian. (Mat. 19:11, 12) Ang minyong mga alagad sa Diyos sagad mas daghag responsabilidad sa pamilya. Pero tagsaanon man o minyo, ang tanan makahimo ‘sa pagtangtang sa tanang kabug-at’ ug makaalagad sa Diyos nga diyutay rag kabaldahan. Magkinahanglan tingali kini nga undangon ang mga kalihokan nga makausik sa panahon ug himoong tumong ang pagpauswag sa panahon nga gigugol diha sa pag-alagad sa Diyos.

17 Tagda ang magtiayong taga-Wales, si Mark ug Claire, nga ang matag usa nagpayunir pagkahumag eskuyla ug nagpadayog payunir human sila maminyo. “Amo pang napasimple ang among kinabuhi pinaagi sa pagbaligya sa among balay nga may tulo ka kuwarto ug pagbiya sa among partaym nga trabaho aron makaboluntaryo sa internasyonal nga buluhaton sa pagpanukod,” misaysay si Mark. Sa milabayng 20 ka tuig, sila nakabiyahe sa tibuok Africa, nga nagtabang sa pagpanukod ug mga Kingdom Hall. Dihay higayon nga 15 dolyares na lang ang ilang kuwarta, pero wala sila pasagdi ni Jehova. Miingon si Claire: “Nakahatag namog katagbawan ang paggugol sa matag adlaw diha sa pag-alagad kang Jehova. Daghan kaayo mig nahigala, ug wala mi makulangi. Ang among gisakripisyo wala ra sa kumingking kon itandi sa kalipay nga among gibati diha sa pag-alagad kang Jehova nga bug-os panahon.” Daghang bug-os panahong mga alagad ang may susamang mga eksperyensiya. *

18. Unsang mga pangutana ang angayng isukna sa pipila?

18 Komosta sa imong bahin? Unsay imong buhaton kon imong mamatikdan nga dili na sama ka dasig sa una ang imong pagpangagpas sa intereses sa Gingharian tungod sa mga kabaldahan? Tingali mahimong pauswagon nimo ang imong paagi sa pagbasa ug pagtuon sa Bibliya. Sa unsang paagi mahimo nimo kana? Ipatin-aw kana sa sunod nga artikulo.

^ par. 17 Tan-awa usab ang sugilanon sa kinabuhi ni Hadyn ug Melody Sanderson sa artikulong “Pagkahibalo Kon Unsay Husto ug Pagbuhat Niana.” (Ang Bantayanang Torre, Marso 1, 2006) Ilang gibiyaan ang ilang maayog kita nga negosyo sa Australia aron mosulod sa bug-os panahong pag-alagad. Basaha kon unsay nahitabo human sila mahutdig kuwarta samtang nag-alagad ingong mga misyonaryo sa India.