Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

ANG BANTAYANANG TORRE (TUN-ANANG EDISYON) AGOSTO 2015

Pangandam Karon Alang sa Kinabuhi sa Bag-ong Kalibotan

Pangandam Karon Alang sa Kinabuhi sa Bag-ong Kalibotan

“[Ingna sila] nga magbuhat sa maayo, . . . aron sila makapangupot pag-ayo sa tinuod nga kinabuhi.”—1 TIM. 6:18, 19.

AWIT: 125, 40

1, 2. (a) Unsang pisikal nga mga panalangin sa Paraiso ang labing gikahinaman nimo? (Tan-awa ang hulagway sa sinugdan sa artikulo.) (b) Unsang espirituwal nga mga panalangin ang atong matagamtam sa bag-ong kalibotan?

“TINUOD NGA KINABUHI.” Alang sa kadaghanan kanato, kana nga ekspresyon nagpahinumdom sa kinabuhing walay kataposan sa Paraiso. Gani, si apostol Pablo naglangkit sa “kinabuhing walay kataposan” ngadto sa “tinuod nga kinabuhi.” (Basaha ang 1 Timoteo 6:12, 19.) Kita nangandoy ug kinabuhi nga magpadayon sa walay kataposan ug maghatag kanatog dumalayong kalipay ug katagbawan. Dili nato bug-os mahanduraw kon unsa unya ang atong bation matag buntag nga mobangon kita uban ang maayong kondisyon sa panglawas, hunahuna, ug emosyon. (Isa. 35:5, 6) Hunahunaa kon unsa ka malipayon ang pagpakig-uban sa atong mga minahal ug higala, lakip na niadtong mga binanhaw! (Juan 5:28, 29; Buh. 24:15) May kahigayonan usab kita sa pagpauswag sa atong kahanas sa siyensiya, musika, arkitektura, o sa ubang natad sa kahibalo.

2 Gusto gayod natong matagamtam ang maong maayong mga butang, apan ang pangunang panalangin sa bag-ong kalibotan maoy espirituwal. Makapalipay gayod ang pagkahibalo nga nabalaan ang ngalan ni Jehova ug nabayaw ang iyang pagkasoberano! (Mat. 6:9, 10) Maghinamhinam kitang makita nga natuman ang orihinal nga  katuyoan ni Jehova alang sa yuta ug sa katawhan. Ug handurawa nga samtang anam-anam kitang mahingpit, mahimong mas sayon alang kanato ang pagpakigsuod kang Jehova!—Sal. 73:28; Sant. 4:8.

3. Unsay angay natong pangandaman karon?

3 Matagamtam nato kining maong mga panalangin kay si Jesus nagpasalig nga “sa Diyos ang tanang butang posible.” (Mat. 19:25, 26) Apan kon kita nangandoy nga mopuyo sa bag-ong kalibotan—ug padayong mabuhi human sa Usa ka Libo ka Tuig nga Pagmando ni Kristo—kinahanglan kitang molihok karon aron “makapangupot pag-ayo” sa kinabuhing walay kataposan. Kita kinahanglang magkinabuhi nga nagpaabot sa kataposan niining daotang kalibotan, ug angay tang mohimog positibong mga lakang karon aron makapangandam alang sa kinabuhi sa bag-ong kalibotan. Sa unsang paagi nato kini mahimo samtang ania pa kita niining daotang sistema sa mga butang?

KON SA UNSANG PAAGI MAKAPANGANDAM

4. Iilustrar kon unsaon nato pagpangandam karon alang sa kinabuhi sa bag-ong kalibotan.

4 Unsaon nato pagpangandam karon alang sa kinabuhi sa bag-ong kalibotan sa Diyos? Aw, ibutang ta nga nagplano tang mobalhin sa laing nasod. Sa unsang paagi kita mangandam? Tingali magsugod kita pinaagi sa pagkat-on sa pinulongan ug kostumbre sa mga tawo nga nagpuyo didto. Puwede natong tilawan ang pipila sa ilang mga pagkaon. Sa usa ka sukod, mahimo tang magkinabuhi nga daw tua na didto. Kay pag-abot nato didto, ingon man gyod niana ang atong buhaton. Sa susama, makapangandam kita karon alang sa kinabuhi sa bag-ong kalibotan kon karon pa lang magkinabuhi na kita nga daw tua na didto. Maylabot niini, atong tagdon ang pipila ka pananglitan.

5, 6. Nganong ang pagkamasinugtanon sa mga instruksiyon sa organisasyon ni Jehova makatabang nato sa pagpangandam alang sa kinabuhi sa bag-ong kalibotan?

5 Sa bag-ong kalibotan, ang pagkasoberano sa Diyos bug-os nga pagabayawon. Pagkalahi niana sa atong makita sa pagkaindependente nga gipasiugda sa kalibotan nga gimandoan ni Satanas! Gipalabi sa pipila ang pagkaindependente ug dili makataronganong pag-insistir sa gusto, apan unsay resulta? Ang ilang pagsalikway sa giya sa Diyos miresultag pag-antos, kasakit, ug trahedya pa gani. (Jer. 10:23) Pagkanindot unya sa panahon dihang ang tanang tawo magpasakop sa mahigugmaong pagmando ni Jehova!

6 Sa bag-ong kalibotan, ikalipay gayod nato ang pagsunod sa mga kahikayan ni Jehova samtang magtinabangay kita sa paghimo sa yuta nga usa ka paraiso, pagtudlo sa mga binanhaw, ug pagbuhat sa kabubut-on ni Jehova alang sa katawhan. Apan komosta kon dili ta ganahan sa gisugo kanato nga buhaton? Magmasinugtanon ba kita pinaagi sa paghimo sa atong kinamaayohan sa pagtuman niana ug magmalipayon sa atong asaynment? Kadaghanan kanato seguradong motubag ug oo! Nan, nagmasinugtanon ba usab kita karon sa instruksiyon gikan sa organisasyon ni Jehova? Kon gihimo nato kana, kita nangandam alang sa kinabuhing walay kataposan ilalom sa pagmando ni Jehova.

7, 8. (a) Nganong angay kitang makigkooperar sa mga nagapanguna kanato? (b) Unsang mga kausaban ang nasinati sa pipila ka Kristohanon? (c) Sa unsa kita makaseguro maylabot sa kinabuhi sa bag-ong kalibotan?

7 Makapangandam kita alang sa kinabuhi sa bag-ong kalibotan dili lang pinaagi sa pagkamasinugtanon sa mga kahikayan ni Jehova karon kondili sa pagkat-on usab sa pagkakontento ug pagtinabangay. Kon kita mokooperar niadtong nagapanguna kanato karon, tingali magmakontento ug magmalipayon sa bag-ong mga asaynment, lagmit ingon usab niana ang atong tinamdan sa bag-ong kalibotan. (Basaha ang Hebreohanon 13:17.) Sa Yutang Saad, ang panulondon sa mga Israelinhon gibahinbahin pinaagig ripa. (Num. 26:52-56; Jos. 14:1, 2) Siyempre, wala ta mahibalo karon kon asa ta papuy-on sa bag-ong kalibotan. Apan,  ang pagtinabangay moresultag pagkakontento ug dakong kalipay samtang buhaton nato ang kabubut-on ni Jehova bisag asa man kita magpuyo nianang panahona.

8 Ang pribilehiyo nga magkinabuhi ilalom sa pagmando sa Gingharian takos sa atong paningkamot nga makigkooperar sa organisasyon ni Jehova ug mag-atiman sa teokratikanhong mga asaynment. Siyempre, ang atong kahimtang mahimong mausab paglabay sa panahon. Pananglitan, ang pipila ka Bethelite sa United States giasayn sa kanataran ug karon malipayong nagtagamtam sa dagayang mga panalangin sa laing matang sa bug-os panahong pag-alagad. Tungod sa katigulangon o ubang hinungdan, ang pipila diha sa nagapanawng buluhaton giasayn ingong mga espesyal payunir. Kon kita magmakontento, mag-ampo sa Diyos alang sa tabang, ug magbuhat sa atong maarangan diha sa pag-alagad, kita magmalipayon ug makadawat ug daghang panalangin bisan niining malisod nga kataposang mga adlaw. (Basaha ang Proverbio 10:22.) Komosta sa umaabot? Tingali duna tay nahunahunaang dapit nga gusto natong puy-an sa bag-ong kalibotan, pero basig pabalhinon ta sa laing lugar. Bisan asa man kita mag-alagad ug bisan unsa man ang atong buluhaton nianang panahona, makaseguro ta nga kita magmapasalamaton, magmakontento, ug magmalipayon nga tua ta didto.—Neh. 8:10.

9, 10. (a) Sa unsang mga bahin tingali nga kita kinahanglang magpakitag pagkamapailobon sa bag-ong kalibotan? (b) Unsaon nato pagpakita nga kita mapailobon?

9 Sa bag-ong kalibotan, may mga higayon tingali nga kinahanglan tang magmapailobon. Pananglitan, mabalitaan tingali nato nga ang pipila nalipay kaayo kay ang ilang mga paryente ug higala nabanhaw na. Apan, kita tingali kinahanglan pang maghulat sa pagkabanhaw sa atong mga minahal. Kon kana ang kahimtang, magmalipayon ba kita para sa uban ug magmapailobon? (Roma 12:15) Ang atong pagkamapailobon sa katumanan sa mga saad ni Jehova karon makatabang kanato nga magmapailobon sa umaabot.Eccl. 7:8.

10 Makapangandam sab kita sa kinabuhi sa bag-ong kalibotan pinaagi sa atong pagkamapailobon maylabot sa mga kausaban sa atong pagsabot sa kamatuoran. Kita ba makugihong nagtuon ug nagmapailobon samtang nagakatin-aw ang atong pagsabot sa mga kamatuoran sa Bibliya karon? Kon mao, lagmit dili kita malisdan sa pagpakitag pagkamapailobon sa bag-ong kalibotan sa matag higayon nga ipadayag ni Jehova ang iyang kinahanglanon alang sa katawhan.—Prov. 4:18; Juan 16:12.

11. Nganong angay natong ugmaron karon ang pagkamapinasayloon, ug sa unsang paagi kini makatabang nato sa bag-ong kalibotan?

11 Ang laing hiyas nga makatabang nato sa pagpangandam alang sa kinabuhi sa bag-ong kalibotan mao ang pagkamapinasayloon. Sa Usa ka Libo ka Tuig nga Pagmando ni Kristo, tingali dangtan pag pipila ka panahon una mahingpit ang mga matarong ug dili matarong. (Buh. 24:15) Magmahigugmaon ba kita sa usag usa nianang panahona? Kon atong ugmaron karon ang pagkamapinasayloon ug likayan ang dili pagsinabtanay, mahimong mas sayon para nato ang paghimo niini sa bag-ong kalibotan.—Basaha ang Colosas 3:12-14.

12. Ipatin-aw kon unsay kalabotan tali sa atong gidahom sa umaabot ug sa atong paagi sa pagkinabuhi karon.

12 Sa bag-ong kalibotan, dili tingali nato kanunayng makuha dayon ang atong gusto. Hinunoa, kinahanglan kitang magmapabilhon ug magmakontento bisag unsay atong kahimtang samtang nagatagamtam kita sa mga kaayohan sa pagpasakop sa mahigugmaong pagmando ni Jehova. Nagpasabot kana nga atong ipakita ang mga hiyas nga gitudlo ni Jehova kanato nga ugmaron. Pinaagi sa pagkinabuhi karon nga daw tua na ta sa bag-ong kalibotan, atong maugmad ang mga hiyas nga kinahanglan natong ipakita hangtod sa kahangtoran. Mapalig-on nato ang atong pagtuo sa “puloy-anang  yuta sa umaabot.” (Heb. 2:5; 11:1) Dugang pa, mapakita nato nga naghinamhinam gyod kita sa matarong nga kahimtang nga maglungtad sa yuta. Oo, kita nagapangandam alang sa kinabuhing walay kataposan sa bag-ong kalibotan sa Diyos.

PAGTAKDAG ESPIRITUWAL NGA MGA TUMONG

Magmadasigon sa pagsangyaw

13. Unsang mga kalihokan ang mahimo natong prayoridad sa bag-ong kalibotan?

13 Tagda ang lain pang paagi nga kita makapangandam alang sa tinuod nga kinabuhi sa umaabot. Bisag kita gisaaran nga sa bag-ong kalibotan dagayang itagana ang pagkaon ug ubang panginahanglan, mas dako ang atong kalipay kay matagbaw ang atong espirituwal nga panginahanglan. (Mat. 5:3) Ang espirituwal nga mga kalihokan mao unya ang atong prayoridad, ug magmalipayon kita sa pag-alagad kang Jehova. (Sal. 37:4) Pinaagi sa pag-una sa espirituwal nga mga butang karon, kita nagapangandam alang sa tinuod nga kinabuhi sa umaabot.—Basaha ang Mateo 6:19-21.

14. Unsang espirituwal nga mga tumong ang makatabang sa mga batan-on sa pagpangandam alang sa bag-ong kalibotan?

14 Sa unsang paagi nato madugangan ang atong kalipay sa teokratikanhong mga kalihokan? Ang usa ka paagi mao ang pagtakdag espirituwal nga mga tumong. Kon ikaw usa ka batan-on ug gihatagan nimog seryosong pagtagad ang karera sa pag-alagad kang Jehova, nganong dili nimo repasohon ang pipila ka artikulo nga naghisgot bahin sa lainlaing matang sa bug-os panahong ministeryo ug magtakdag usa niini ingong tumong? * Mahimo kang makig-estorya sa pipila nga dugay nang nag-alagad nga bug-os panahon. Pinaagi sa paghimo sa ministeryo nga imong karera, ikaw nangandam alang sa padayong pag-alagad sa Diyos sa bag-ong kalibotan, diin makatabang nimog dako ang imong teokratikanhong pagbansay ug kasinatian.

Makigbahin sa teokratikanhong mga kalihokan

15. Unsang espirituwal nga mga tumong ang mahimong itakda sa mga magmamantala sa Gingharian?

15 Ingong mga magmamantala sa Gingharian, unsang espirituwal nga mga tumong ang mahimo natong itakda? Puwede natong himoong tumong ang pagpauswag sa atong kahanas sa usa ka bahin sa ministeryo. O mahimo tang maningkamot sa pagpauswag sa atong pagsabot sa mga prinsipyo sa Bibliya ug sa kapadapatan niini. Mapauswag ba usab nato ang atong pagkaepektibo sa pagbasa sa publiko, pagpakigpulong, o pagkomento sa mga tigom? Seguradong may nahunahunaan ka pang puwedeng pauswagon. Kini ang punto: Ang pagtakdag espirituwal nga mga tumong makapauswag sa imong kadasig alang sa teokratikanhong mga kalihokan ug makatabang nimo  sa pagpangandam alang sa kinabuhi sa bag-ong kalibotan.

NAKATAGAMTAM NA KITAG PANALANGIN KARON!

Magpabili sa espirituwal nga pagkaon

16. Nganong ang pag-alagad kang Jehova mao ang labing maayong paagi sa pagkinabuhi?

16 Ang paggahin bag panahon sa pagpangandam alang sa bag-ong kalibotan nagpasabot nga way lami ang atong kinabuhi karon? Wala! Ang pag-alagad kang Jehova mao ang labing maayong paagi sa pagkinabuhi. Wala kita mag-alagad kaniya kay gipugos kita o aron lang maluwas sa dakong kasakitan. Gidisenyo kita nga moalagad sa Diyos, ug mao kana ang maghatag ug kinalabwang kalipay. Ang pagpagiya kang Jehova ug pagtagamtam sa iyang maunongong gugma mas labaw pa kay sa bisan unsa. (Basaha ang Salmo 63:1-3.) Siyempre, dili na ta kinahanglang magpaabot sa bag-ong kalibotan aron matagamtam ang espirituwal nga mga panalangin nga resulta sa atong kinasingkasing nga pag-alagad kang Jehova—ato na kining matagamtam bisan karon! Gani, ang pipila kanato dugay nang nagtagamtam sa maong mga panalangin, ug nasayod kita base sa atong kasinatian nga kini lang ang makahatag ug dakong katagbawan.—Sal. 1:1-3; Isa. 58:13, 14.

Magpagiya sa Kasulatan

17. Sa Paraiso, unsay dapit sa mga butang nga gusto natong himoon ug sa paglingawlingaw?

17 Sa bag-ong kalibotan, may panahon kita alang sa mga butang nga gusto natong himoon ug sa paglingawlingaw. Kon buot hunahunaon, nganong gilalang man kita ni Jehova nga may ingon niini nga tinguha kon dili pa niya katuyoan nga tagbawon kini? (Eccl. 2:24) Niini ug sa uban pang paagi, si Jehova kanunayng ‘nagtagbaw sa tinguha sa tanang buhing butang.’ (Sal. 145:16) Kinahanglan tang maglingawlingaw ug magpahulay, apan mas magmalipayon kita kon unahon nato ang atong relasyon kang Jehova. Ingon usab niana sa Paraiso. Maalamon gayod ang pagkat-on nga ibutang sa hustong dapit ang mga butang nga gusto natong himoon samtang atong gipangita pag-una ang Gingharian ug gisentro ang atong pagtagad sa espirituwal nga mga panalangin nga ginatagamtam sa katawhan ni Jehova karon!—Mat. 6:33.

18. Unsaon nato pagpakita nga nangandam kita alang sa walay kataposang kinabuhi sa Paraiso?

18 Sa umaabot nga Paraiso, atong bation ang kalipay nga wala pa nato masinati sukad. Hinaot nga atong ipakita kon unsa ka dako ang atong tinguha alang sa tinuod nga kinabuhi pinaagi sa pagpangandam karon alang niana. Ugmaron nato ang diyosnong mga hiyas ug magmalipayon diha sa madasigong pagsangyaw sa Gingharian nga gisugo kanato. Hinaot nga magmalipayon kita sa pagtakdag espirituwal nga mga tumong. Ug uban ang bug-os nga pagsalig sa mga saad ni Jehova, hinaot nga mangandam kita karon alang sa kinabuhi sa bag-ong kalibotan!

^ par. 14 Tan-awa ang Mga Pangutanang Gisukna sa mga Batan-on—Mga Tubag nga Mosaler, Tomo 2, p. 311-318.